HTAI YA AI WA – Wa Jau Dr. Joseph Gawlu Yung Wa
GA SAN 1 – Kathawlik Hpung masha nkau mi shawnglam e shaning hku nga, mara n lu raw ai majaw KBC Hpung Up ni kawan du ai shaloi, tsabyi poi-daw lu sha ai lam nga ma ai. Dai hpung masha ni mara lu na kun?
HTAI – San Yawhan ka da ai Madu Yesu a Kabu Gara Shiga (6:51) hta:“Ngai gaw sumsing lamu de na yu wa ai hkrung ai Muk rai nga nngai. Dai Muk hpe sha ai wa kadai mung, htani htana ahkrung nga na ra ai; mungkan ga a sask a matu ngai jaw na Muk gaw Nye a Ashan rai nga li ai” nga nna rawng nga ai.
Kanu Kahtawlik Nawku Hpung hku nna gaw – Missa Hkungga hta nawng ya ai muk the tsabyi chyaru gaw, mu mada lu ai nsam gaw muk the tsabyi chyaru rai nga tim, Madu Yesu a Hkum the Sai tai wa sai. Madu Yesu gaw shi a Karai Atai Masha Atai mahkra the dai Muk the tsabyi chyaru hta rawng nga ai ngu nna kam sham hkap la ai.
Dai Madu Yesu Hkristu a Hkum the Sai hpe anhte jawm hkam la ai shaloi, wenyi asak – htani htana asak hpe hkam la nna kam sham ai Hpung masha yawng gaw Hkristu hta jawm pawng nga ma ai.
Ndai lam a majaw, Nawku Hpung gaw Baptist nawku hpung ni kaw na poidaw ngu ai muk the tsabyi hpe hkam la na ahkang n jaw ai. Chyoi Pra Hkum ngu ai gaw shadang tup jawm pawng ai lachyum pru ai.
Baptist nawku hpung ni gaw – shinggyim masha ni yubak mara ni a matu Madu Yesu si hkam ya ai kumla hku nna hkap la kam sham ma ai; Madu Yesu a Hkum the Sai hpe nan kaja wa lu sha ai ngu nna n hkam la ma ai. Makam masham the wenyi malu masha hku nna sha, hkam la ma ai.
Protestant hpung ni law law nga ai hta, shanhte kaw na Chyoi Pra Hkum hku nna hkam la na matu Nawku Hpung ahkang jaw ai ai gaw grai taw nga ai: ga shadawn, dai nawku hpung hta Yesu a Hkum the Sai hpe teng sha hkam la ai ngu nna kam sham ai; bai hkam la na Kahtawlik Hpung masha gaw si wa na aten rai nhtawm, Kahtawlik Jau n lu, n du mai ai shara rai yang gaw, ahkang jaw ga ai.
GA SAN 2 – Shaning shanang kalang mara raw kau u nga tim, shaning hku magam gun let nam hkrai rawng, mara n lu raw ai ni mara kaba na kun?
Tinang the seng ang ai, shing n rai, nin nawng ai kaw na Nawku Hpung ningbaw ni (Jau, sara ni) hpe shana ya ga. Tinang shang lawm nga ai wuhpung wuhpawng ningbaw ningla ni hpe mung shana garum hpyi mai ai; shanhte hta lit nga ai.
