1st: Ish 11 1-10; Ps: 71, 1-2.7-8.12-13; 2nd: Rom 15, 4-9; Gos: Mtt 3, 1-12
Dai ni gaw Du sa ladaw hta a lahkawng ngu na laban rai nga ai. Karai Kasang a amyu masha dinghku langai hku nna, anhte a kaji kawa ni a makam masham hte Karai Kasang a ga sadi hpring tsup wa na hpe myit mada let matut hkawm sa nga ga ai. Dai majaw, ndai Laban shani hta, nawku hpung gaw, Madu du sa na myit mada shara kaba hte anhte hpe madi shadaw ya nga ai laman, nam mali kata e jahtau nga ai wa a nsen hpe madat mara ra ai: “Madu a lam hpe lajang mu, shi a lam hpe shading mu” ngu ai hpe madat mara ra ai. Dai ni na chyum mungga ni yawng hta bung ai langai mi lawm nga ai dai gaw, Shanhte yawng gaw Meshia hte seng ai Esaia a myihtoi ga hta ngang ngang kang kang rai nga ai.
Daw 1 hta, Esaia gaw Madu du sa na lam hpe asan sha tsun da ai. Shi gaw ndai ga sadi jaw da ai hkawhkam wa a atsam ningja ni hte masat kumla ni hpe maren mara tsun dan ai. Shawng nnan, Karai Kasang a wenyi hte hpring chyat nga na ra ai. Shi gaw sadi dung ai wa rai nna, tara rap ra ai hte dinghpring ai hku tara dara nna, shi a amyu masha ni hpe hkungga lara ai wa rai na rai wu ai.
Ndai aten hta myihtoi wa anhte hpe kade daram myit mada shara kaba jaw nga ai kun! Esaia gaw anhte a Meshia Hkristu hta htawm hpang prat gaw htoi tu nga ai hpe shadum ya nga ai. Shi gaw kaga hkawhkam ni hte n bung nna, shi a uphkang ai lam gaw n hkru n kaja ai hte dip sha roi sha hkrum ai kaw na lawt lu na re ngu ga sadi jaw da nga ai. Karai Kasang hte mung, shada da mung simsa lam lu shangun na re. Anhte amyu baw hpan hkum nga tim, anhte a kahkyin gumdin lam hpe grau ngang kang shangun na re.
Myihtoi wa ndai hku ka da ai: “Chyahkyawn gaw sagu kasha hte rau nga lu na ra ai, hkanghkyi gaw bainam kasha hte rau yup nga na ra ai, dumsu kasha hte hkanghkyi hte hpum sau ai yam nga rau nga nna, ma kaji gaw shanhte hpe woi na ra ai: shanhte gaw nye a chyoi pra ai bum ting hta n hkru n kaja ai hte jahten sharun ai lam n galaw na mara ai.” Kaja wa nga yang, Hkristu hpe myit masin mahkra hte hkap tau la yang, ndai lam gaw masha law law myit ai zawn utopian zawn n na lu na re. Anhte a mungkan gaw langai hte langai hkrit tsang let nga ra ai shara nrai nna, n-gun ja ai ni gaw n-gun kya ai ni hpe dip sha na shara n rai na re.
Daw Lahkawng hta, Pawlu gaw amyu bawsang yawng a matu myit mada shara langai sha hpe matut tsun nga ai. Shi anhte hpe ndai hku shadum ya ai: “Shawng de ka da ai ga mahkra gaw, anhte hpe sharin achyin ya na matu ka da nga ai.” Ndai myit mada lam langai sha ndai aten hta anhte hpe madi shadaw ya nga ai. Ndai aten ladaw htum wa maga de chyum laika hta ka da ai lam ni hpring tsup wa ai aten du hkra, makam masham, akyu hpyi, tsawra myit hta anhte hpe kahkyin gumdin shangun na re. Dai majaw, chyum daw ni hpe hkan sa let, Pawlu gaw Karai Kasang galaw na lam a matu kabu gara let shakawn shagrau na matu anhte hpe myit sharawt ya nga ai. Shi gaw Esaia kaw na shiga langai hte jahtum dat ai: “Masha amyu ni hpe up na matu rawt tsap wa ai Yese a ru arat gaw pru na ra ai rai nna, amyu baw ni shi hpe myit mada nga ma ai.”
Dai ni na kabu gara shiga hta, Hkalup sara Yawhan dan pru ai lam mung, Meshia du sa na aten ni wa sai ngu ai myit mada shara mungga rai nga ai. Raitim, anhte hpe ahkyak ai shiga langai mi la sa ya nga ai: “Sumsing lamu a mungdan gaw ni wa sai, myit malai lu mu!” Bai nna, “Madu a lam hpe lajang nna, shi a lam hpe shading sharai mu!”
Ndai Laban shani na Yawhan a mungga gaw ndai aten ladaw a ahkyak ai lam hpe madi madun nga ai. Arung arai hkyen lajang ai aten sha n re. De a malai, Karai Kasang mungkan de hpaw shadan dan na makoi magap da ai lam hpe sung sung myit sumru ai aten rai nga ai. Anhte a Madu hpe myit masin hte hkum hkrang hta tsawm htap ai masa hta hkap tau la na myit mada let, anhte a prat a n hkru n kaja ai shara ni hpe jasan jaseng nna, rap ra hkra galaw ai aten rai nga ai. Ndai shara hta Yawhan a mungga gaw anhte hpe tsun dan ai kaga ladat langai mi rai nga ai hpe shadum na matu: “Chyoi pra ai lam n lawm yang, kadai mung Madu hpe n mu lu na re” (Heb 12:14).
Myit malai ai lam, htinglu htinglai ai lam, myit masin chyoi pra ai lam ni gaw ndai aten ladaw htum wa maga de anhte a myit mada shara hpe dinghpring hkra galaw na matu ra kadawn ai lam ni rai nga ai. Dai majaw, ndai aten hta Hkristu hpe hkap la lu na matu pat shingdang nga ai yawng hpe yeng seng kau ga. anhte a Madu hte Hkawhkam wa hpe hkap la na matu hkyen lajang na matu, htinglu htinglai ai sakramentu hpe akyu jashawn la na matu nawku hpung gaw n-gun jaw nga ai.