Chyum Mungga Daw Ni
Daw Langai – Esa – 35: 1-6,10
Daw Lahkawng – Yaku 5:7-10
Kabu Gara – Mt 11:2-11
Mungga – Wa Jau Thomas Salaw Brang Awng
Daini gaw Gaudete Laban shani rai nga ai. Ndai Advent ladaw masum ya ngu na Laban shani hta, Chyoi Pra ai Kanu Nawku Hpung gaw, kabu gara ai hte ban sa ai aten kadun mi hpe hkam la lu na matu, anhte hpe saw shaga nga ai. Nawku Hpung dai ni anhte hpe tsun nga ai gaw: “Gaudete in Domino Semper” (Madu hta galoi mung kabu gara nga mu, Hpp 4, 4). Gaudete ngu ai ga si gaw kabu gara ai ngu ai lachyum re! Ndai Laban shani na nawku daw jau ai nsam gaw rose re. Ndai gaw kabu gara ai myit masa a kumla rai nga ai.
Dai majaw, Gaudete Laban gaw anhte a Advent hkrun lam hta kabu gara ai mani sumsai hte anhte a myit masin hpe htoi tu shangun ai aten rai nga ai. Rai sa, Karai Kasang a ga sadi hpring tsup wa na aten de du wa sai majaw, ndai Laban shani hta kabu gara na matu shaga la hkrum ga ai! Gaudete Sunday gaw ndai Advent hta anhte a prat hkrun lam hta wenyi n-gun jat ya ai aten rai nga ai.
Daw 1 hta, Karai Kasang gaw shi a amyu masha ni hpe hkye hkrang la na matu du sa nga ai majaw kabu gara nga na matu myihtoi Esaia shagrau da nga ai. Shi anhte hpe ndai hku tsun ai: “N-gun ja nga mu, hkum hkrit myit, yu mu, nanhte a Karai Kasang du na ra ai.” Tsawra myit kaba ai Karai Kasang re majaw, anhte hpang de kumhpa law law hte du sa na re. Shi gaw “teng man ai Kawa Hkrismat par excellence” rai nga ai. Dai majaw, Madu du sa ai shaloi hpa la sa nna hpa galaw na ngu ai hpe myihtoi wa tsun dan ai: “Dai shaloi myi kyaw ai ni a myi hpaw wa nna, na n na ai ni a na hpe hpaw ya nna, mat mat ai chyeju ni ni hpe bai lu la na re.”
Ahkyak dik gaw Madu du sa ai shaloi kabu gara lam rau hkan nang na ra ai. Dai majaw, dai ni anhte a myit masin hta hpring chyat nga ai kabu gara lam gaw, Karai Kasang makoi magap da ai lam hte hpung shingkang hpring tsup ai lam hpe mungga gaw masha tai wa ai shaloi anhte hpe hpaw shadan dan na lam tau hkrau tsun da nga ai. Dai majaw, ndai aten hta anhte a hkrun lam hpe ngut kre hkra galaw lu na matu ra kadawn ai n-gun atsam gaw ndai Laban shani a kabu gara lam kaw na pru wa ai re.
Daw Lahkawng hta, Yaku gaw ndai hku n-gun jaw da ai: “Hpunau ni e, Madu du sa ai aten du hkra myit galu nga mu, myit hkum daw nga mu! Madu kade nna yang du sa na ra ai” Ndai aten na anhte a myit mada hkrun lam hta myit galu ai gaw ahkyak ai ga si langai rai nga ai. hkam sharang ai hte myit mada ai lam gaw anhte hpe shamu shamawt shangun ai, kabu gara lam hpe shabyin ya na matu rau jawm galaw nga ai.
Dai majaw, Madu du sa na matu hkyen lajang nga ai ten, ngam nga ai hkrun lam a matu ra kadawn ai myit galu kaba ai lam hpe Karai Kasang kaw hpyi nem nga ga. Anhte gaw ginsup ninghkring langai zawn, dai hpe galaw lu nna, dai de du lu na re ngu kam ging ai. Myit galu myit mada let anhte a Madu Yesu Hkristu hpe hkrum zup lu na rai nna, shi a du sa ai lam gaw anhte hpe kabu gara shangun na rai nga ai.
Daini na kabu gara shiga hta, Yesu a magam bungli hte galaw ai lam ni gaw grai laklai ai majaw, masha ni kaw nna kabu gara ai mahtai hpe lu la ai. Shi gaw Esaia a myihtoi ga hpe Yawhan baptista pyi shi htawng kata kaw nna na lu ai daram shadik shatup ya ai. Hkristu du sa ai shaloi anhte a prat hta myit masin mahkra hte hkap la ai rai yang, shi a ga hpe bai na lu shangun ai, dinghpring ai hku bai hkawm sa shangun ai, shi a ga hpe madat mara nna anhte myit mada ai lam ni hpe shadik shatup ya na re. Dai majaw, ndai lam gaw kabu gara lam hpe shaga nga ai.
Dai majaw, ndai Laban shani hta, nawku hpung gaw lamu mungdan a kabu gara lam hpe mu lu na, chyim yu na ahkang jaw nga ai. Dai majaw, anhte a shawng lam hta ngam nga ai hkrun lam hpe myit dum let kabu gara let, n-gun nnan lu la ga. Nawku hpung dai ni anhte hpe tsun nga ai gaw, Nehemia kalang mi shi a amyu masha ni hpe tsun ai zawn: “Sa nna, dwi sau ai malu masha ni hpe lu sha mu…dai shani gaw anhte a Madu a matu chyoi pra ai shani rai nga ai, Karai kasang a kabu gara ai lam gaw nanhte a n-gun atsam rai nga ai majaw, hkum yawn myit” (Neh 8, 10).