Hkaw Hkam Masum Poi, Year A
Readings:
1st: Is 60:1-6;
Ps: 71;
2nd: Eph 3:2-3.5-6;
Gos: Mt 2:1-12
Daini gaw hkaw hkam masum poi rai nna, anhte a myit sumru yu na lam a ga baw gaw, Tsawra ai hpu nau ni, Rawt u, Htoi tu u! Ndai hpung shingkang rawng ai Meshia shangai wa ai aten hte shaning nnan aten hta grau kaja ai aten n nga ai. Shing nip hpun gaw, jan hpe ndai hku tsun ai, “Ngai hpe htoi tu shangun rit!” Jan gaw ndai hku bai htan ai: “Nang hkum hpe polish galaw u, ngai nang hpe htoi tu shangun na!” Dai majaw ndai aten hta anhte rawt nna htoi tu ra ai hpa majaw nga yang: “Shi a nhtoi hta anhte nhtoi hpe mu lu ga ai” (Shk 36, 9).
Epiphani ngu ai ga si gaw Greek ga kaw na pru wa ai, epiphaninen ngu ai ga si re. Lahta na ga si ni hte bung ai (sh) lachyum nga ai ga si langai mi re: “hpaw dan na,” “madun dan na” (sh) “chye shangun na” ngu ai ga si re. Yesu anhte hpe shi hkum shi lam amyu myu hku nna hpaw shadan dan ai lam hpe shagrau ai. Dai ni shi a sasana magam hte Karai Kasang a lam hpe nhtoi jahtoi ya ai mabyin masa ni lawm ai; Hpaji rawng ai sinpraw mung na hkaw hkam ni sa du kawan ai (Mt 2, 10-12); Yesu kashin kamun hkam ai (Mk 1, 9-11; hte Hkana mare na lamik kumla (Jn 2, 1-11) ni hta mu lu nga ai. tsun ga nga yang,anhte gaw kaja ai lam ni hpe sha hpaw shadan dan nna, n kaja ai lam ni hpe kaya kahpa n hkrum na matu makoi da chye ga ai.
Dai ni nadaw 1 hta, myihtoi Esaia kaw nna ndai hku hkang da nga ai: “Yerusalem mare e rawt u, htoi tu u, kaning rai nme law, na a nhtoi du wa sai, karai kasang a hpung shingkang gaw na a ntsa e htoi tu nga ai.” Ndai Madu a hpung shingkang gaw, anhte a lapran e nga nga na matu du sa ai Hkristu shi nan rai nga ai. Shi gaw mungkan ntsa na nhtoi yawng a npawt rai nga ai. Shi gaw shingra tara hte mungkan ga na nhtoi yawng a npawt nhpang rai nga ai Jan zawn rai nga ai. Nhtoi a atsam hpe n shayawm kau ai sha, nhtoi hpe hkap la nna, nhtoi hpe bai nhtang shapraw ya ai shata jan, pat chyam na ni zawn tai na matu anhte hpe shaga la ai. Ndai lam byin wa na matu, anhte a nhtoi hte asak a npawt nhpang rai nga ai Hkristu hte rau, axis hkretding langai ntsa hta tsap ra ai.
Daw Lahkawng hta, Pawlu gaw ahkyak ai hkye hkrang la ai lam hpe tsun da nga ai. Ndai gaw Hkristu anhte a ntsa e htoi tu shangun ai ndai nhtoi gaw garan ginhka ai lam n nga ai, tengman ai lam rai nga ai. Shi ndai hku ka da ai: “Dai gaw, tara maigan ni mung ya gaw sali wunli langai sha hkam la lu sai, shanhte gaw hkum hkrang langai sha a daw shan ni rai nna, kabu gara shiga hku nna, Hkristu Yesu hta e, shanhte hpe ga sadi langai sha jaw da sai ngu ai lachyum re.” Karai Kasang gaw shi a nhtoi/marang hpe kaja ai ni hte n kaja ai ni a ntsa e htu shangun ai ngu ai chyum daw hpe Pawlu gaw asan sha madi shadaw ya nga ai. Shi hpe grau kaja hkra galaw na matu kaja ai ni a ntsa e ahkang jaw nna, n kaja ai ni a ntsa e shi hpe kaja ai de galai shai shangun ai.
Dai ni na kabu gara shiga gaw, Hkristu gaw shi a shagan ni hku nna anhte hpe hpaw shadan dan ai lam hpe shadum ya nga ai. Dai majaw, dai ni kabu gara shiga hta lawm ai hpaji rawng ai masha masum zawn, anhte mung shi hpang hkan nna nawku na matu shaga la hkrum ga ai: “Madu e, amyu baw shagu gaw na a man e gum dagup na mara ai!” (Shk 71, 3). Raitim, anhte a nawku daw jau ai lam gaw, hkawhkam Herod a shut shai ai tang shawn ai lam zawn n rai, Hpaji rawng ai ni zawn, myit masin masin hte rai ra ai. Hkalem hkalau ai lam n lawm ai teng man ai nawku daw jau lam rai ra ai. Ndai lam hpe yu nna, anhte hkum nan hpe Shi hpe daw jau ra ga ai. Anhte a matu shangai wa ai hkawhkam wa hpe shagrit shanem let nawku daw jau nna, ging dan ai hte myit masin mahkra hte hkungga jaw ai rai yang, anhte a nhtoi hte shagan gaw maren sha htoi tu wa nna, kaga masha ni mung dai hpe mu nna, shi hpe hkungga jaw na matu anhte hpe tam na re.
Dai ni Karai Kasang gaw mai kaja ai hte tsawra myit rawng ai majaw anhte hpe shi hkum shi hpaw shadan dan nga ai. Dai ni anhte a ntsa e htoi tu nga ai nhtoi gaw asak a nhtoi rai nga ai. Daini Madu Yesu Hkristu gaw, tinang hkum hpe nyet kau nna, shi a tsawra myit hpe anhte hpe grau nna shalaw jat ya nga ai. anhte a prat a nsin hpe htoi tu shangun na matu, shi a nhtoi hpe anhte a ntsa e htoi tu shangun nga ai. Dai ni sharin la lu ai lam gaw, ndai shaning nnan hta Hkristu gaw shi a nhtoi hte Karai Kasang a shingnip shingna hte anhte a prat hpe htoi tu shangun ai zawn, anhte mung nhtoi hpe htawt gin len ya ra ga ai. Kaga langai mi gaw, anhte sumsing lamu de du mayu ai rai yang, Hkristu anhte hpe madun dan ai shagan hte nhtoi hta matut hkan nang ra ga ai.
Hpang jahtum, tinang hkum tinang hkalem n hkrum hkra, myit bra ai lam n nga hkra shakut ra ga ai. Karai Kasang anhte hpe lam n shadam na hpe kam let, htani htana prat de sa wa ai hkrun lam a daw hta shi a shagan hte nhtoi hpe matut nna yu ra ga ai. Anhte myit ung ang ai aten shagu (sh) prat hta lam numshe de du wa ai shaloi, anhte a prat hta Karai Kasang a lam matsun hte hpaji jaw ga ni hpe tam ra ai. Madu hpe hpyi nem nga ga: Wa e, na a nhtoi hte anhte hpe lam madun ya rit. Chyoipra hkum hta Hkristu hpe chye na nna, tsawra myit hte hkap hkalum lu na matu karum ya rit, hpa majaw nga yang, shi gaw htani htana Madu rai nga ai. Amen!