Pranwan Ladaw Laban 2, Year A
John 2:29-34
Lata a layung manga gaw shi bungli hte shi lit nga ai.
Raitim, ndai layung manga hta na langai mi gaw, grai n hkru n kaja ai magam bungli langai ni hta shang lawm chye ai…Dai Layung gaw … Lata yunglat rai nga ai.
Bai nna, dai yunglat a ayan magam bungli gaw, Mara shagun ai lam rai nga ai.
Index layung (sh) Pointer layung ngu nna mung tsun lang chye ai.
… kaga masha ni hpe mara tam na matu
… kaga masha ni hpe mara shagun na matu
… kaga masha ni hpe mara jaw na matu
Ndai lam hpe Finger-Pointing ngu nna mung shamying ma ai – mara tam ai lam (sh) lama ma a matu mara shagun ai lam hpe, kaga langai ngai hpe ap ya ai lam rai nga ai. Anhte gaw gara hku mi rai rai, chye na ai hku n chye ai hku, anhte a Index (sh) Forefinger hpe lang nna kaga masha ni hpe galoi mung mara tam, mara shagun ai akyang hpe galaw nna mara hpe kaga masha ni hpang de htawt sit ya ga ai.
Raitim, dai ni na Kabu Gara Shiga gaw, masha hpe“machyi makaw” byin shangun ai lata hte masa hpe hkap hkalum la ai lata de galai shai na matu madi madun ya nga ai.
Anhte hta kashin kamun sara rai nga ai Yawhan gaw mara shagun na matu n re ai sha, Mungkan a Hkyela Madu hpe madi madun na matu jai lang ai ai hpe mu lu nga ai.
Shi gaw, arawng sadang rawng ai hkrang hte, Yesu hpe madun dan nna… “Mungkan ga a mara hpe la kau ya ai Karai Kasang a Sagu Kasha hpe yu mu!” (Yh 1: 29)
Shi gaw anhte a myit masin hpe Yesu hpang de tawn da ya ai…
… aten na na myit mada da ai Meshia re ai hpe chye shangun na matu!
… shinggyim masha ni hpe hkye hkrang la na wa hpe mungkan de hpaw shadan dan nga ai!
… Shi a galu kaba ai lam hte hkye hkrang la ai lam jaw na lam hpe hkaw tsun na matu!
Yawhan baptista, Yesu hpe hkye hkrang la ai wa hku nna hpaw shadan dan na matu, mungkan ga hpe sakse hkam ai wa tai wa ai! Ndai Hkyela Madu hpe madun dan ai lam gaw, Yawhan baptista a myit kraw kata na atsam marai law law hpe hpaw shadan dan nga ai…
-Yesu a galu kaba ai lam hpe yin la ai hta shagrit shanem ai myit kaba hpe shi madun dan ai!
-Shi gaw lahkawng ngu na lit hpe gun hpai na matu n dang hti ai mai kaja ai lam hpe madun dan ai!
-Shi gaw Hkyela Madu Yesu hpang de myit maju jung na matu sumnung shingdi ai the madun dan ai!
-Shi gaw Tengman ai Meshia a shawng lam lajang ai shi a sasana magam hpe sadi dung ai lam madun dan nga ai!
Anhte a prat hta kalang lang kaga masha ni hpe “n kaja ai myit jasat” n kaja ai hku sha, zingri zingrat na matu sha mu mada chye ga ai.
Kaga masha ni hpe anhte layung madi ai shaloi…
… tara jeyang ai lam hte mara shagun ai lam hpe tawt lai lu na matu
… mara lu ai ngu ai hkam sha lam hpe jat bang na matu
… kaga masha ni a mara hpe shawa hpawng de shapraw dan na matu jai lang chye ga ai.
Anhte gaw kaja ai ningmu jahpaw ai lam hpe koi gam ai lam n re…
… shing nrai kaga ni hpe sumnung shingdi ai hku shading sharai ya ai
… shing nrai, kaga masha ni hpe shanhte a gawng kya ai lam ni hpe chye na shangun ai.
Raitim, Yawhan baptista kaw nna, kaga masha ni hpe madi madun na myit jasat hpe sharin la ra ga ai.
… N-gun jaw ai hte kam hpa ai myit hpe shalat ya u.
… Shanhte a manu dan ai hte akyu rawng ai lam ni nga nga ai hpe hkap la u.
… Kaga masha ni a mai nkaja ai hte arawng lu ai magam bungli ni hpe na ahkang jaw u.
Kaga masha ni hpe madi madun dan ai gaw, hkra machyi, mara shagun ai hte myit daw myit hten ai lam n byin ging ai… grau nna n-gun jaw ai hte hkap la ai lam galaw ra ai.
Kaga masha ni hpe madi madun dan ai gaw, mara tam ai hte mara shagun ai lam n rai ging ai… grau nna manu shadan ai hte shakawn shagrau ai ladat rai ra ai.
-Tengman ai hku hkap la ai amyu tai wa hkra shakut ga… akyu n rawng ai mara shagun ai lam nrai uga.
-Jet ai n-gun jaw ai amyu tai wa hkra shakut sa wa ga…mara tam dinglun ai hku tara jeyang ai lam n rai uga.