PRAN WAN LADAW LABAN (3)

( 3rd Ordinary Sunday in Year A)

Mungga Daw Ni:

Esaia 8: 23-9:3

1Korinhtu 1:10-13,17

Mahte 4:12-23

Chyoi Pra ai Kanu Nawku Hpung gaw, A Shaning a Laban 3 shani hta, Karai kasang a n htum n wai ai hpaji byeng-ya, tsawra myit hte, shi a tsawra ai kashu kasha ni hpe, Nhtoi Kaba Yesu Hkristu hpang de, kayin wa shangun nga ai. Anhte a hkum hkrang hte prat a tengman ai lam hpe hkum tsup hkra dan dawng wa lu na matu, anhte a prat hpe uphkang nga ai shingnip ni yawm mat wa lu na matu, Shi hte grau ni htep wa na matu shi hkang da nga ai. Dai majaw anhte a prat hta nsin sin ai shara yawng hta Karai Kasang a hpung shingkang htoi tu shangun na matu, Nhtoi Kaba hpang de kayin wa ra ga ai. Dai majaw Nawku hpung gaw, anhte hpe dai ni sharawt ya ai, shinggyim masha galaw ai nhtoi ni hta myit n dik nga ai sha Hkristu a n-htoi hkawm ra nga ga ai.

Daw 1 hta Esaia gaw anhte a myit mada lam hpe pop and pump up galaw ya ai. Ndai myit mada lam gaw Madu Karai Kasang shi nan anhte a nhtoi tai na matu lata la ai kaw nna pru wa ai re. Anhte hpa naw ra nga ai kun? Ndai lam gaw, Shakawn Kungdawn Sara ni anhte hpe tsun nga ai: “Madu Karai Kasang ra amyu masha ni gaw ngwi pyaw nga ma ai” (Shk 33, 12)! Shawng de anhte hpe ka-up da nna zingri zingrat ai nsin a atsam kaw na lawt lu na shiga rai nga ai. Esaia ndai hku ndau shana da ai: “Nsin kata e shanu nga ai amyu gaw, nhtoi kaba mu lu nna, sung htum ai mung hta shanu nga ai ni a ntsa e, nhtoi htoi tu nga ai.” Karai Kasang shi nan rai nga ai nhtoi gaw, Zebulon hte Naphtali mungdan zawn shagrit shanem ai Karai Kasang a kasha langai ngai a prat hta n mai byin ai lam law law hpe galaw lu ai atsam nga ai. Nhtoi Kaba gaw anhte hpe lit li shangun ai kandang hpe la kau ya nna, lam madun ya ai hte anhte a myit masin kata na myit ung ang ai lam ni, hkrit tsang ai lam yawng hpe yeng seng kau ya ai majaw, anhte mung Shakawn Kungdawn Sara hte rau ndai hku bai kahtap tsun lu na re: “Madu gaw nye a nhtoi hte nye a hkye hkrang la ai wa rai nga ai, kadai hpe ngai hkrit na rai ta?” (Shk 27, 1).

Daw Lahkawng hta, Pawlu gaw Korinhtu kaw na Nawku Hpung (sh) Wuhpung Wuhpawng hpe myit n pyaw ai lam tsun dan ai. Shanhte a akyang lailen hku nna, nsin hte n chye chyang ai lam a shingnip kata hta naw shingbyi nga ai majaw, shi shanhte hpe daru kau ai. Shanhte a ga law hkat ai lam ni hte garan ginhka ai lam ni gaw, kabu gara shiga a nhtoi htoi tu ai atsam a shingdu kaw na shanhte hpe pat kau ya ai.

Dai majaw Pawlu gaw shanhte a lapran na ga law hkat ai lam ni, myit rawt ai lam ni gaw Hkristu a nhtoi hpe hkam la lu sai ngu ai kaja ai kumla n re ai hpe shadum ya nga ai. Dai majaw, shanhte a lapran e nga ai yaw shada lam hpe bai myit dum shangun ai: “…Karai Kasang gaw ngai hpe kasin kamun jaw na matu n rai, kabu gara shiga hkaw tsun na matu shangun dat ai.” Dai majaw shanhte a “n san seng ai nawku hpung” mung masa (sh) shanhte a garan ginhka nna uphkang ai ngu ai masa hta champion byin na matu shi ningdang kau ai. Raitim, Pawlu gaw kashin kamun hkam ai gaw shi a sasana magam hta n lawm ai ngu tsun mayu ai n re.

De a malai, kabu gara shiga gaw kashin kamun hkam na matu wenyi hpe htoi tu shangun nna hkyen lajang ya ai nhtoi re ngu sharin ya nga ai. Marai Langai ngai kashin kamun garai n hkam shi yang, kanu kawa langai ngai (sh) langai ngai a kanu kawa ni hpe kabu gara shiga a htoi tu ai nhtoi hpe jai lang nna, hkrak hkra tara ga sharin ya ra ai. Tsun mayu ai gaw, Pawlu gaw, nsin hte n chye chyang ai lam a shingnip ni hpe kabai kau nna, kashin kamun hkam na matu hkyen lajang ya ai lam rai nga ai, kabu gara shiga a madung lam hpe anhte a myit hpe shadut ya nga ai.

Kabu gara shiga hta Esaia a myihtoi ga gaw Hkristu a magam bungli hku nna dik wa sai. Shi gaw, Kaperna-um mare masha ni a prat hpe mung, htingbu Zebulun hte Naphtali mare ni a prat hpe mung, grai galai shai shangun ai. Shanhte a myit masin hte ginra de nhtoi hpe shi shapraw ya ai. Shi a nhtoi gaw shamai shatsai ai lam hte hkye hkrang la ai lam hpe jaw ya ai hpe hkam sha lu ai. Shi gaw shanhte a “Gilead mung na tsi” re ai hpe sakse madun dan ai (Yer. 8, 22). Ndai kaw na anhte sharin la ra ai lam gaw, Nhtoi Kaba a hkrang bung sumla ni hku nna, anhte a nga nga ai lam hpe mung hkam sha lu nna, masha ni a prat hta nga ai nsin hpe yeng seng kau ra ai. Anhte hta rawng ai kabu gara shiga gaw masha ni a manghkang ni hpe shayawm ya ra ai; shanhte a shingnip ni hpe shayawm kau lu hkra, anhte a Nhtoi Kaba Hkristu hte grau ni htep hkra galaw ya ra ai.

Daini Nawku hpung gaw anhte a myit masin yawng hpe Nhtoi Kaba, Yesu Hkristu hpang de galai shai na matu shadut nga ai: “Ngai gaw mungkan ga a nhtoi rai nga nngai, ngai hpang hkan nang ai wa gaw nsin hta hkawm sa na n rai, asak a nhtoi hpe lu la na ra ai” (Yh 8, 12). Ndai Nhtoi Kaba nga ai shara shagu hta nsin gaw n-gun n rawng mat ai, shingjawng hkat ai lam ni hkoi mat ai, myit daw myit hten ai, hkrit tsang ai, pawt sindawng ai, myit marin ai, hkalem hkalau ai, masu hkalem ai hte kaga n hkru n kaja ai lam yawng hkoi mat wa ai. Kabu gara shiga hte Hkristu a nhtoi htoi tu ai shara shagu hta, “nsin kata e nga ai amyu masha ni gaw Nhtoi Kaba hpe mu lu ma ai.” Dai majaw, Nhtoi Kaba Yesu Hkristu hpe hkan nang nna grau ni htep wa yang, anhte hkum nan nhtoi tai wa nna, anhte a grup yin hta shingnip shingna n nga mat na re, hpa majaw nga yang, “Shi a nhtoi hta anhte nhtoi hpe mu lu ga ai” (Shk 36,9)!