Readings: 1st: Gen 12:1-4; 2nd: 1 Tim 1:8-10; Gos: Mat 17:1-9
Dai ni gaw lu sha gam ladaw hta lahkawng ngu na Laban shani rai nga ai. Hkristu gaw shi hkum hkrang hpraw nsam galai shai lam hta shi a hpung hpe anhte hpe hpaw shadan dan nga ai. Anhte shi hta sadi dung let manoi manat kam hpa nga ai rai yang shi hpaw shadan dan ai hpung shing the awngdang lam gaw anhte yawng a matu rai nga ai. Ndai lusha gam ladaw hkrun lam hta atssam dat ai hte nden marai rawng nga na matu n-gun jaw nga ai.
Daw 1hta Karai Kasang gaw Abraham hpe Ga Sadi jaw nna shaman ya ai: “Nang hpe amyu kaba shatai na de ai…nang hpe shaman ya ai ni hpe ngai shaman ya nna, nang hpe dagam ai ni hpe dagam kau na nngai.” Ndai shaman chyeju ni hpring tsup wa na matu gara masa lam ni ra nga ai kun? Abraham gaw Karai Kasang a matsun hpe atsawm sha madat mara ya nna, “Ngai nang hpe madun na mungdan de sa wa u” ngu ai shaga la ai lam hpe atsawm sha galaw ai. Order words hku tsun ga nga yang, shi a ga shaka hta lawm ai daw gaw, shi a yak hkak ai sasana magam hpe hkap la ai hku nna Karai Kasang a ga hpe madat mara na matu rai nga ai.
Anhte gaw Abraham a shaman chyeju hte hpung shingkang hpe lu la na matu grai lawan ai hku galaw chye ga ai. dai gaw kaja nga ai. Raitim, ndai shaman chyeju hpe lu la na matu ra kadawn ai masa gaw Karai Kasang a myit ra ai lam hpe madat mara nna, shi a shaga la ai lam hte sasana magam hpe htai ya ai lam re ai hpe sadi ra ai.
Ndai lam gaw n loi ai. Kalang lang, ahkyak ai lam langai ngai hpe tawn da ra ai. Laklai ai lam langai ngai galaw ra na re. Tsun ga nga yang, shaga ai hpe htai ya ai gaw, nang hpe na a shimlum ai shara kaw na “pru mat” shangun ai. Ndai gaw Abraham a shaman chyeju hpe hkam la lu na matu ra kadawn ai lam rai nga ai. Karai Kasang a myit ra ai lam hpe ngang ngang jum tek da nna, shi a hkang da ai ga ni hpe madat mara ai ni a matu re.
Daw Lahkawng hta, Pawlu gaw ndai hku n-gun jaw da ai: “Kabu Gara Shiga a matu, tsin-yam tsindam hpe hkam sharang nga mu.” Anhte a shaga la ai lam hpe hkum tsup ai hku hkap la lu na matu madi shadaw ya ai gaw Karai Kasang a chyeju nan rai nga ai. “Aten hte hpan da ai lam garai n byin shi yang” nga lai wa sai ndai chyeju gaw, Yesu Hkristu dan pru ai hku nna dan dawng wa sai. Dai majaw, shi si hkam nna bai hkrung rawt wa ai hta anhte a htawm hpang na hpung shingkang hpe madi shadaw ya ai ndai moi na chyeju Hkristu hpe anhte mada yu ra ga ai.
Dai ni na kabu gara shiga gaw Hkristu a hpraw nsam galai shai ai lam hte seng ai re. Dai hku nna Hkristu gaw shi hkum nan hte shi a htawm hpang na hpung shingkang hpe anhte hpe hpaw shadan dan nga ai. Ahkyak dik gaw, hkum hkrang galai shai ai lam hte rau, Hkristu gaw shinggyim masha ni a prat hta n galai shai ai lam langai hpe anhte hpe hpaw shadan dan nga ai. Si hkrung si htan n lawm ai asak, hkra machyi ai lam n lawm ai kabu gara lam, hten za ai lam n lawm ai bai gram lajang ai lam n nga ai. Yawng gaw aten langai hta sha byin ai. Dai majaw, shi a htawm hpang na hpung shingkang gaw, Sagu Kasha a asai hta san seng ai hku kashin kamun hkrum ai ni a matu rai nga ai. Kabu gara shiga a matu “nni nkri hkrum” ai ni a matu re (Shr 12:11).
Petru a mau ai lam hte “Madu e, anhte ndai kaw nga lu ai gaw mau hpa rai nga ai” ngu tsun ai ga gaw myit lawm hpa rai nga ai. Raitim, shi gaw shinggyim masha sha rai nga ai. N rai, hkring sa na aten (sh) ndai hpung shingkang hpring tsup ai de shang na aten garai n rai shi ai. “A luta continua, vitória é certa” (Gasat gala ai lam matut manoi nga ai, awng padang gaw Hkristu a marang e teng sha rai nga ai). Karai Kasang a shaga la ai lam hte hkang da ai ga hpe shakut shaja let sadi dung let, awng padang lu ai nawku hpung hta lawm lu na hpe, galai shai ai drama gaw anhte hpe shadum ya nga ai. Ndai hpung shingkang gaw anhte a hpang jahtum du na shara a htawm hpang hpung shingkang a shingran langai sha rai nga ai.
Dai majaw, Hkristu a hpung shingkang hta shang lawm lu na matu, shi hte rau Kalvari bum de shawng hkawm sa ra ai. Bai nna, Abraham a shaman chyeju hte shakawn shagrau ai lam ni hpe hkam la mayu ai rai yang, “lam langai ngai hpe tawn da” na matu jin jin rai nga ra ai (N.N 12). Elia a namman chya hkam ai hte wenyi hpe lahkawng lang hkam la mayu ai rai yang, shawng nnan, anhte a aten na Yezebel hte Ahab hpe gasat gala nna dang kau ra ai (I Hkawhkam 19). Mawshe a myihtoi htoi ai atsam hte hpung shingkang hpe ra sharawng ai rai yang, shawng nnan, ndai mungkan mungdan a Hpara-u hpe gasat dang la ra ai (Pru 6: 13).
Daini na hpung shingkang gaw, anhte a hpang jahtum du na shara de sa wa na matu shadut ya ai “activation energy” hku nna magam gun ra ai. Hkrun lam gaw n ngut shi ai, teng sha tsun ga nga yang, n loi ai. Raitim, Hkristu gaw anhte hte rau rai nga ai. Dai majaw, Shi gaw anhte hpe n-gun jaw nga ai: “Hkum hkrit myit!”