Daini na Ja Chyum Mungga hpe hti sum ru yu ai shaloi e, mara n dat ya ai mayam a lam hpe na lu ga ai. Daini na kabu gara shiga hta, Madu Yesu gaw anhte a ganawn mazum lam hte wenyi hkrun lam hta ahkyak ai mara raw ya hkat ra ai lam hpe sharin shaga ya nga ai. Kasa Petru gaw tinanga kahpu kanau wa hpe kade lang mara raw ya ra na kun ngu san ai majaw, Yesu gaw mara n raw ya ai mayam wa a lam hpe ga shadawn jaw nna, bai htan ya ai hpe mu mada lu nga ai. Mara raw ya ai ngu ai gaw, hkam sha lam n re. Anhte ni kaw nna, tinang hkrai lata la nna, dawdan masin jahkrat let galaw sa ra ai rai nga ai.

Madu a hkam sha ai lam n re. Madu Karai nan mara raw ya ai zawn, anhte mung mara raw ya na matu saw shaga nga ai re. Kaga wa hpe hkyam sa n jaw ya lu yang, tinang hkum tinang sha hkra machyi wa ai re. Dai zawn re lam ni nga ai majaw, wenyi lam yam hta sha n ga, myit a hkam sha ai lam hta mung dingbai dingna byin wa ai gaw, ana zinli pyi byin wa ai re. Shingrai  ndai lu sha gam ladaw hta grau ahkyak ai gaw, masha shagu hpe mara dat hkyam sa ya ai. Myit masin hte hkum hkrang mung hkam kaja na matu Karai Kasang a hkyam sa ya ai hpe hkam la nna, wenyi hkam kaja lam hpe mung lu la hkra shakut sa nga ga. Ndai lam ni hpe ta tut hkan galaw sa nga ga law.