Daini na Ja Chyum Mungga hpe hti sumru yu ai shaloi e, Jep ai tara hpe shatup shadik na matu Yesu du sa ai lam na la lu ga ai. Karai Kasang jaw ai tara kanu lam ni hpe hkan sa shatup ai rai yang, shaman chyeju lu la na teng sha rai nga ai hpe daini na Chyum laika daw (1) hta tsun da nga ai. Shingrai Madu Yesu mung, tara lam ni hpe jahkum shazup na lam hpe e, n-gup aga hte sha tsun ai n rai, shi hkum nan tatut hkan sa shatup nga ai hpe mu lu nga ga ai. Ndai tara lam ni hpe hkan sa shatup ai ngu ai gaw, Madu Karai Kasang ra sharawng ai lam hpe hkan sa shatup ai lam mung rai nga ai.

Dai zawn hkan shatup ai a marang e, Madu Karai a chyeju laklai ai hku hkam sha na rai nga ai. Madu Karai Kasang gaw anhte a makau kaw e nga nga let, ni htep ai hku bau sin ya nga ai hpe mung hkam la lu ga ai. Anhte a myit kraw kata hta myit sumru yaw shada da ai lam ni, hkum zup wa ai hpe tatut hkam sha lu ga ai. Dai sha n rai, anhte ni hkan sa shatup ai zawn, kaga masha ni hpe mung mai kaja ai lam madun ya ai gaw, grai ahkyak ai lam re hpe Madu Yesu tsun da nga ai. Dai zawn sha anhte a kanu kawa sara ni, tsun madun ya sai mai kaja lam ni, sharin achyin ya sai machye machyang lam ni nga mali ai re. Anhte a prat hta e mung n prai n mat rai, ngam taw nga na ra nga ai. Dai re majaw, anhte a mai kaja ai lai kyang arawn alai ni hpe ngam da na matu, Mau Karai anhte hpe shadum ya nga ai re.