Daini na Ja Chyum Mungga hpe hti sumru yu ai shaloi e, Yesu hte Belzebul Nat Du yan a lam hpe na la lu ga ai. Shiga madat ni e jet ai atsam gaw Karai Kasang kaw na sa wa ai rai nga ai. Jet ai ngang kang ai ninggun atsam ni gaw, Karai Kasang kaw na sa wa ai nan re. Bai garan ginghka ai lam ni, lachyen lahka ai n ru, n ra byin ai lam gaw ningsin hte bung ai. Ndai n kaja ai baw hpam amyu myu kaw na sa ai re hpe dai ni Madu Yesu gaw, kabu gara shiga hku nna tsun nga ai. Madu Yesu gaw kahkyin gumdin lam hte shi a hpung dagu galu kaba ai lam gaw, Madu Karai Kasang a hpung dagu hte sha re ai lam madi madun tsun da nga ai.
Ndai zawn Madu Karai tsun ai lam hta ningsin hte ninghtoi, bai kaja ai hte n kaja ai lam ni gaw, arau sha n mai pawng nga lu ai majaw rai nga ai. Anhte mung dai zawn sha Madu Yesu hte arau nga nga lu ga ai kun? Shing n rai yang Nat tsadan hpang lawm taw nga ga ai kun? Ndai lahkawng hpe pu pu le le sumru dinglik yu ra nga ga ai. Anhte a prat hta e, yak hkak lam ni hte hkrum katut nga ai ten ni hta e, Madu Karai Kasang a lam madun la ai hpe, n gun la chye na mung grai nan ra kadawn nga ga ai. Ndai n’gun lu ai lam hpe aten law law chye la na mung ra ga ai. Shing rai ndai atang ahpa zawn sha re ai shaman shakyang ai lam rai tim mung, kalang lang hta e, anhte a mayak mahkak lam ni a lapran e, simsa lam hpe jaw ya nga ai law.