Readings: ez 7:12-14; ps 129; 2nd: rom 8:8-11; gos: jn 11:1-45)
Dai ni gaw lu sha gam ladaw hta manga ngu na laban shani rai nga ai. Anhte a si chye ai hkum hkrang hpe asak jaw ya ai gaw karai kasang a wenyi re lam nawku hpung gaw anhte hpe shadum ya nga ai. Dai wenyi nan hkristu hpe easter shani hta bai jahkrung ya na re. Shi gaw karai kasang a kasha shagu a prat hpe galai shai shangun ai wa rai nga ai. Dai majaw, paschal poi a matu hkyen lajang ai shaloi, anhte hpe asak jaw ya ai karai kasang a wenyi hpe madat mara ra ai.
Daw 1 gaw myihtoi ezekela a laika hta na rai nga ai. Shi a hten za mat sai amyu masha ni a matu myit mada shara nga ai htawm hpang prat hpe ndau shana da ai. Dai gaw israela hpe bawng dung nga ai aten hta karai kasang jaw da ai ga sadi rai nga ai. Dai ni du hkra ndai ga sadi gaw anhte a madu hkristu a marang e anhte a matu grin nga ai. Yubak mara, machyi makaw, ndai prat a yak hkak ai lam ni a majaw gawng kya mat sai anhte a prat hpe bai gram lajang na the galai shai ya na ga sadi rai nga ai.
tinang a mungdan hta naw nga nga tim, karai kasang hte tsan gang nga chye ai hpe sadi ra ai. Ndai zawn re ai karai kasang hte garan ginhka ai lam, gaw “wenyi bawng dung ai (sh) si hkrum ai” ngu ai rai nga ai. Dai zawn re ai bawng dung ai (sh) si hkrum ai kaw na hkye la lu ai gaw karai kasang a wenyi sha rai nga ai. Dai majaw, karai kasang dai ni anhte hpe ga sadi jaw da ai gaw: “…ngai gaw nye a wenyi hpe nanhte hta bang ya nna, nanhte hkrung nga nna, nanhte a lamu ga ntsa e ngai nanhte hpe bai nga shangun na nngai…”
Daw lahkawng hta, yesu a wenyi sha anhte hpe bai hkrung rawt wa shangun lu ai lam hpe mung pawlu shadum da nga ai: “yesu hpe si ai kaw na sharawt la ai wa a wenyi nanhte hta rawng nga yang…nanhte a si chye ai hkum hkrang ni hpe shi jahkrung sharawt ya na ra ai…” Maga mi hku tsun ga nga yang, karai kasang a wenyi n lawm yang, si mat ai zawn rai nga ai. Hpa majaw nga yang, hkristu shi nan anhte hpe tsun ai gaw: “asak jaw ai gaw karai kasang a wenyi rai nga ai, hkum hkrang gaw hpa akyu n nga ai” (yhn 6, 63).
Dai lam hpe moi na israela hkawhkam shawlu a prat hta mu lu ai. Kalang ta karai kasang a wenyi shi hpe kau da nna, shi gaw matsan mayan hte n hkru n kaja ai wa tai wa ai (i sam 16: 14-16). Dai majaw, karai kasang a wenyi gaw anhte hta karai kasang a shamu shamawt ai lam hte asak hkrung ai lam a sakse rai nga ai. Dai majaw, pawlu gaw ndai hku sadi jaw nga ai: “…nanhte hpe madu ai karai kasang a masat dingsat rai nga ai karai kasang a chyoi pra ai wenyi hpe hkum shayawn myit…” (ehp 4, 30). Shi gaw anhte hpe lam matsun ya nna madi shadaw ya ai wa re ai majaw, ndai lam gaw grai ahkyak ai.
Ndai laban shani na kabu gara shiga gaw yesu a atsam hpe anhte hpe madun dan nga ai. Lazaru hpe si ai kaw nna jahkrung sharawt ya nna, hkristu gaw shi teng sha, hkrung rawt ai hte asak hkrung ai wa re ai hpe sakse madun dan ai. Chyoi pra ai wenyi a atsam n lawm yang ndai lam hpe shi n lu galaw na re. Bai gram lajang ai lam, bai hkrung rawt ai lam hte galai shai ai lam ni gaw chyoi pra ai wenyi a atsam hte byin wa lu ai. Anhte galaw ra ai gaw, shagrit shanem nna, shi anhte hpe jai lang na matu ahkang jaw ra ai.
Dai ni na kabu gara shiga kaw na sharin la mai ai lam nkau mi nga ai. Langai, ndai lamik kumla gaw tsawra myit hpe madun dan ai lam re. “nang tsaw ra ai wa gaw machyi nga ai” ngu ai shiga yesu kaw du wa ai shaloi anhte hpe dai hku tsun dan ai. Yesu gaw lazaru hte shi a nta masha ni hpe tsawra ai majaw sa wa ai re. Shanhte a kabu gara ai lam gaw shi a kabu gara lam rai nga ai zawn, shanhte a yawn hkyen ai lam mung shi a yawn hkyen ai lam tai wa sai. Dai majaw, “yesu hkrap ai!”
Lahkawng, anhte a matu gara mauhpa amu hpe mung galaw ya ai hta anhte a makam masham gaw grai ahkyak nga ai. Hkristu gaw maria yan marhta hpe ndai hku san ai: “ngai gaw hkrung rawt ai hte asak rai nga nngai…ndai lam hpe nanhte kam sham nga myit ni…?” Dai majaw, lazaru hpe bai hkrung rawt wa hkra, hkristu a tsawra myit hte shi a kanau num ni a makam masham a majaw rai nga ai. Dai majaw, masum ngu na sharin la lu ai lam gaw, hkristu hte rau, chyoi pra ai wenyi a atsam hte yawng mayawng byin mai ai ngu ai lam rai nga ai. Hpa majaw nga yang, yesu gaw asak hte si hkrung si htan hpe up hkang lu ai majaw re.
Hpang jahtum, yesu gaw anhte hpe hpa mi hkra machyi tim, galoi mung karum ya na matu jin jin rai nga ai. Wenyi lam hta si ai, bawng dung ai kade daram na sai ngu ai gaw ahkyak n re. Shi gaw anhte hpe chye ai, tsawra ai, “lazaru, pru wa rit!” Shi a nsen hpe madat nna madat mara ai rai yang, chyoi pra ai wenyi a atsam hte anhte a gawng kya ai hte si chye ai hkum hkrang ni hpe bai jahkrung ya na re.