1st Is 50:4-7, 2nd Phil 2:6-11, Gos Mt 26:14-27:66
Nawku hpung gaw ndai lu sha gam Ladaw laban kru ya ngu na Laban shani hpe Palm Sunday hte Passion Sunday hku nna galaw nga ai. Palm Sunday gaw, “Hosanna” ngu ai poi galaw ai nsen kaw nna, Yesu a shagrit shanem ai, madat mara ai, tinang hkum hpe n-gun n jaw ai tsawra myit hpe madi madun let, Passion ngu ai n-ni n-kri hkam la ai “Shi hpe wudang hta jen da u” ngu ai nsen de htawt sit mat nga ai. Chyoi Pra ai Bat de shang wa ai shaloi, masha wunawng wuwa lai ai lam hpe lai nna, anhte a wudang gun hpai let, nni nkri hkrum nga ai mungkan hta Hkristu a hkye hkrang la ai tsawra myit hpe sakse hkam na matu anhte hpe shadut ya nga ai .
anhte hpe hkye hkrang la ai mabyin ni hpe bai myit dum, bai hkam sha lu na matu, Nawku hpung gaw anhte hpe masat da ya rai nga ai. Ndai bat laman anhte myit dum galaw ai lam gaw, Yesu si hkam nna bai hkrung rawt wa ai lam sha n rai, anhte hkum nan yubak mara hte tinang hkum hpe sha myit ai lam ni hpe Yesu hta a hkrung rawt wa ai marang e, anhte hpe shamai shatsai ya ai, htinglu htinglai ya ai, hkye hkrang la ai lam ni hpe lu la na re. Chyoi Pra ai bat magam nawku daw jau ai lam hta myit maju jung let shang lawm ai gaw Karai Kasang hte hku hkau lam grau sung wa nna, Makam masham grau jat wa ai, Yesu a sape ni hku nna anhte a prat hpe ngang kang wa shangun na re. Dai ni na nawku daw jau ai lam hta, n bung ai aten ni hpe kahkyin gumdin da ai, langai mi gaw hpung shingkang, langai mi gaw nni nkri hkrum ai lam: Yerusalem mare hta Yesu hpe hkawhkam hku hkap tau la ai lam, hkalem hkalau ai tara jeyang ai lam, Hkristu hpe wudang hta jen da ai, si hkam ai, makoi mayang ai lam ni du hkra galaw ga ai.
Daini na daw 1 hta Esaia a Mayam Mahkawn mali hta na masum ngu na gaw, kaga mahkawn masum zawn, Yesu a prat hte sasana magam hpe tau hkrau tsun dan nga ai. Dai ni na mahtai jaw ai Shakawn Kungdawn (Shk 22) a Refrain,”Nye a Karai Kasang e, Nye a Karai Kasang e, hpa majaw ngai hpe kau da n ta?” Hkristu a tsin-yam tsindam a myit masin kata de anhte hpe lup bang ya ai. Daw Lahkawng gaw, Pawlu a Hpilipi masha ni hpang de ka dat ai laika kaw na la ai rai nna, moi na Hkristan mahkawn langai rai nna, Yesu kadai re ai hpe, shi a sasana magam gaw anhte hpe yubak hte si hkrung si htan kaw na gara hku hkye la ai lam hpe, shawng nnan na Hkristan ni a chye na ai lam hpe madi madun nga ai. Dai ni na Kabu Gara Shiga a shawng na daw hta, Tsanlun Bum hte Yerusalem mare lapran deng lahkawng daram tsan ai shara de shi hte rau hkawm sa ai shi hpe shakawn ai ni kaw nna hkawhkam zawn hkap tau hkalum la ai lam hpe tsun dan da ai. Daini na Kabu Gara Shiga a lahkawng ngu na daw hta, Mahte laika hta ka da ai Hkristu a tsin-yam tsindam hpe hti ai lam hpe madat/shang lawm ga ai. Anhte gaw, Passion labau hta lawm ai masha nkau mi a nhtoi hta, anhte a prat hpe jep joi yu na matu shadut hkrum ga ai – Yesu hpe nyet kau ai Petru, Yesu hpe ap kau ai Yuda, Yesu hpe jahpoi asawng ai Herod, Yesu hpe wudang ntsa e sat kau na matu tara jeyang ai shaloi shi a myit masin hpe ninghkap ai hku galaw ai Pilat, Yesu kaw na shanhte a shara hpe makawp maga ai hku nna mung shawa ningbaw ningla ni zawn re ai ni.
Anhte a ntsa e Yesu hkrap ngu hkrap ngoi ai lam n galaw ga. De a malai, “Sumsing lamu gaw myit malai lu ai mara kap ai wa hpe kabu gara shangun nna, myit malai n lu ai, myit ja ai wa hpe myi prwi pru shangun ai” ngu ai Yuda masha ni a ga hpe dum let, anhte a mara ni a matu myit malai lu nna hkrap nga ga. Anhte gaw, n hkru n kaja ai kasha hpe kasi la nna, tsawra myit rawng ai Kawa Karai Kasang hpang de, ndai hpang jahtum na Lusha gam ai aten hta, mara raw Sakramentu hku nna bai nhtang wa nna, Hkristu a hkrung rawt ai kabu gara lam hta hkum tsup hkra shang lawm ra ai. 2) Anhte gaw asi si ai, n-gun n rawng ai, maihpang hpun ni tai ra ai. Karai Kasang gaw ngai hpe n-gun n rawng ai wenyi prat hpe n-gun jaw na malai, chyoi pra ai, san seng ai, tara rap ra ai, shagrit shanem ai, madat mara ai, tsawra myit, mara raw ya ai asi ni hpe shapraw na matu myit mada nga ai. 3) Anhte a myit masin hpe awu asin di kau nna, Yesu hpe Shi a shinglet hte jasan jaseng na matu n shadut ga. Anhte a wenyi, Chyoi Pra ai Wenyi a nawku htingnu hpe, n kaja ai, n tara ai, n san seng ai myit mang lam, ga si, galaw ai lam ni a majaw, anhte a wenyi hpe awu asin di kau ai hpe Yesu n hkam sharang lu na re. 4) Shi hpe madi shadaw ai ni Palm Sunday hta galaw ai Chyoi Pra ai bat magam laman hta, anhte a Madu hte Hkyela Madu hku nna anhte a prat hta lam shagu de Shi hpe hkap tau la ai, “Hosanna” ngu ai mahkawn hpe mahkawn ai, ndai Chyoi Pra ai Bat laman anhte a prat hpe Yesu kaw ap nawng ai hku nna, laksan hku nna anhte a myit masin kata de hkap tau la ra ai. 5) Yesu hpe hpai ai shagrit shanem ai lawze zawn tai na matu jin jin rai nga ra ai. Anhte gaw Yesu hpe mungkan de “hkap la” ai shaloi, Palm Sunday hta Yesu hkam la ai zawn hkap tau hkalum la ai lam hpe hkam la lu na re, raitim, hpang de mung dai zawn ninghkap ai lam, udang, chyam dinglik ai lam ni hpe hkam la lu na re. Lawze zawn anhte mung Hkristu hpe n chye ai mungkan de hpai sa na matu shaga la hkrum ga ai. Dai majaw, ndai Chyoi Pra ai Bat laman hta, kaga masha ni anhte hta Yesu a mungkan ting tsawra myit, n-gun n rawng ai mara raw ya ai lam, hkungga jaw ai magam bungli ni hpe mu lu hkra, asan sha Hkristan ni tai wa ga.