Readings: 1st: Sirac, 27: 30-28:7; Ps 102; 2nd: Rom 14, 7-9; Gos: Mt 18, 21-35
Daini gaw, pranwan ladaw hta, 24 ngu na Laban shani rai nga ai. Lai wa sai bat hta, nawku hpung kaw nna, hpunau nauna bawngban jahkrup ai lam hte shada tsaw ra hkat ai lam hku nna htinglu htinglai hkat na ahkyak ai lam hpe shadum lai ya wa sai. Ndai bat hta gaw mara raw ya ai lam hpe myit sumru na matu saw shaga nga ai. Htinglu htinglai lam hte anhte a Hkristan makam masham hta ahkyak ai lam langai mi rai nga ai. Dai ni daw 1 hte kabu gara shiga yan a madung shiga rai nga ai.
Shut ai gaw shinggyim masha rai nna, mara raw ya ai gaw Karai Kasang re ngu ai mying kaba ai ga si langai nga ai. Tsun mayu ai gaw, yubak galaw ai wa gaw shinggyim masha hku galaw ai. Hpa majaw nga yang, shut ai (sh) yubak galaw ai gaw anhte a shinggyim arawn alai hta lawm ai majaw re. Maga mi de, mara raw ya ai wa gaw Karai Kasang hku galaw ai. Hpa majaw nga yang, mara raw ya ai gaw Karai Kasang a ahkyak ai atsam marai hte shingra tara langai mi hta shang lawm ai lam rai nga ai. Dai gaw Shi a Karai Kasang tai ai lam rai nga ai. Anhte a Karai Kasang gaw ndai hku chye ai. “Shi gaw matsan dum chye ai, tsawra chye ai hte mara raw dat kau ya chye ai” (Shk 102).
Dai ni na shawng na hti ai lam hta mara dat ya ai lam hpe madung tawn da ai. Langai, anhte a akyu hpyi ga ni hpe mahtai jaw na matu kaga masha ni a mara hpe raw dat ya ra ai hpe shadum ya nga ai. Lahkawng, anhte yawng gaw Karai Kasang a mara raw ya ai lam ra ai yubak kap ai ni re ngu ai hpe tau hkrau sawn la ai. Dai majaw, mara raw hkrum na matu, kaga masha ni hpe shawng mara raw ya ra ai. Dai majaw, Sirac anhte hpe ndai hku n-gun jaw ai gaw: “Na a htingbu wa nang hpe hkra machyi shangun ai hpe raw dat kau ya u, shaloi nang akyu hpyi yang, na a yubak mara ni hpe raw dat kau ya na ra ai.” Ndai gaw anhte hkum anhte lawt lu na matu hte shamai shatsai na matu kaga masha ni hpe lawt lu na matu shaga ai lam rai nga ai.
Daw Lahkawng hta, Pawlu gaw npawt nhpang lam langai hpe shadum ya nga ai. “Anhte langai hte langai a asak hkrung lam hte si hkrung si htan gaw kaga langai hpe shadut ya ai.” Bai nna, mara raw ya lu ai atsam gaw kaga masha ni hpe mung, anhte hkum nan hpe mung grau nna shadut ya lu ai. Dai majaw, mara raw ya ai gaw lahkawng lang akyu nga ai hpe dum ra ai. Masha langai (sh) law law hpe kalang ta shamai ya lu ai tsi langai sha re. Mara raw hkrum ai wa hpe lawt lu shangun nna, mara raw ya ai wa hpe shamai shatsai ya nga ai.
Kabu gara shiga hta, Hkristu gaw mara raw ya ai lam hpe kaga hku nna tatut galaw mai ai madang de woi sa wa ai. Ndai lam gaw Petru hte Hkristu a lapran na bawngban ai lam hta dan dawng nga ai. Petru gaw, “nye a hpunau wa hpe kade lang mara raw ya ra na kun?” Yesu gaw shi hpe tatut kaja dik htum hku htai ai: “sanit shi sanit lang.” Hkristu a mahtai gaw Hkristan mara raw ya ai lam hta shadawn sharam n nga ai hpe shadum ya nga ai. Anhte yawng hpe mara raw ya ra ai, galoi mung, htani htana, Sant Francisco of Assis a akyu hpyi ga hta tsun da ai hte maren: “Hkala nba (hpyen n-gun (sh) hkra machyi ai lam) nga ai shara shagu hta mara raw ya ra ai.”
Dai majaw, dai hpe madun dan na matu, Yesu gaw sumsing lamu mungdan hte seng ai ga shadawn langai tsun dan ai. N hkru n kaja ai mayam zawn kade lang galaw lai wa sai hpe myit sumru yu ga. Shi hta hka n lu wa ai hpe raw dat kau hkrum tim, htingbu wa hpe hka kaji mi hpe n lu raw kau ya ai. Shi hpe lawt lu shangun ai raitim, shi a htingbu wa hpe htawng jahkrat kau ai. Ndai ga shadawn a mungga gaw kaga masha ni hpe matsan dum myit hte kanawn mazum ra ai lam rai nga ai. Karai Kasang gaw anhte hpe shani shagu mara raw ya nga ai majaw mara raw ya ra ai. Anhte a htingbu wa hpe galoi mung n hkungga ai hku n mai hkam la ai. De a malai, Karai Kasang anhte a masa hpe galoi mung myit yu ai zawn, shanhte a masa hpe mung myit yu ra ai.
Yesu gaw yawng hpe htani htana mara raw ya na matu tsun ai. Yawng hpe htani htana mara raw ya ai ngu ai lachyum gaw hpa rai ta? Langai, “ngai nang hpe mara raw ya sai raitim, anhte garan hkawm ra ai,” shing nrai, ngai nang hpe mara raw ya sai raitim, nye a prat hta nang hpe bai n hkrum mayu ai,” shing nrai, ngai nang hpe mara raw ya sai raitim, ngai n malap na ngu ai lachyum n re. Grau sung ai lachyum re. Kahkyin gumdin lam hpe bai gram lajang nna, yaw shada lam langai de rau hkawm sa lu na hpe kam sham ai lachyum re. Hkala nma hpe nma n ngam hkra shamai ya ai lachyum re.
Kalang lang, tinang hkum hpe mara raw ya ra ai ngu ai hpe bai kahtap tsun na matu ahkyak nga ai. Tinang a prat hta shut ai majaw n htum n wai yawn hkyen ai (sh) mara shagun ai myit masin gaw tinang a prat hpe shagrit kau ya Lu ai. Wenyi lam hte arung arai lam lahkawng yan hpe rawt jat galu kaba wa na matu pat shingdang nga ai. Dai majaw, anhte hkum anhte mung mara raw ya ra ai, anhte hkum anhte simsa ai hku matut nna nga lu na matu.
Hpang jahtum, mara raw ya ai wa gaw Hkristu zawn galaw ai. Dai majaw, dai ni ndai misa hkungga hta anhte akyu hpyi ai zawn, “Anhte hpe mara raw ya ai ni hpe anhte raw dat kau ya ai zawn, anhte a mara ni hpe mung raw dat kau ya mi” ngu nna, ndai ga si ni hpe tatut sak hkrung hkawm sa let, tengman ai hku hkan sa lu na matu Karai Kasang kaw karum hpyi ga.