Hkristu hta hkungga tsawra ai nu wa hpu nau ni dai ni a ngwi pyaw dinghku lamang hta gaw Ma ni a matu shim lum dik ai dum nta ngu ai lam hte seng nna bai gam garan ya na nngai.

Tsawra hkungga ai nu wa hpu nau ni anhte kashu kasha ma ni a matu gaw kanu yan kawa lahkawng yan a tsawra shawang myit hte hpring zup ai dum nta gaw mungkan hta shimlum dik ai shingbyi shara rai nga ga ai re.

Dai shimlum ai hte  kam hpa kam sham lam ni hpe anhte kanu kawa ni tinang hkum nan kashu kasha ma ni a prat ru ninghpawt ting hpe jahten kau ai hte  bung nga ai. Shinggan kaw nna jahkring sha pyaw ai lam ni gaw aten kadun hta gaw myit pyaw myit dik lam zawn raitim dum nta hta ngam nga ai kashu kasha ni a matu gaw prat ting tsi shamai nlu ai myit ningma ni hpe byin shangun chye nga ai.

Kashu kasha ni a kanu yan kawa a ntsa tawn da ai kam hpa kam sham ai myit ni hten mat ai shaloi ma ni gaw kadai hpe she matut nna kam ra na ngu ai lam ginhka nchye mat nna shingbyin shara nlu mat chye ma ai. Ndai ningma ni gaw shanhte a matu shawng lam prat kanawn mazum lam hte prat hkrun lam ting sin mak ai shingna gaw ka up mat mai nga ai.

Ma ni shanghte hkum nan kanu kawa byin tai wa aten du hkra pyi ndai machyi hkam sha lam ni gaw myit hta kap hkan nang taw nga  na re majaw ndai gaw anhte kanu kawa ni a ten kadun na myit ra sharawng ai lam langai a majaw jaw kau ra ai manu kawa dik ai arang rai nga ai.

Kun dinghku hta sadi dung nga ai ngu ai gaw ningrum langai a matu sha nrai nga ai.Kashu kasha ni myit hkamja lam hte myit pyaw lam a matu mung gawgap da ai makawp maga lam langai rai nga ai. Anhte tinang a jahkring mi na pyaw hpa lam a matu hta grau nna kashu kasha  ni shawng lam prat gaw htam law law grau ahkyak nga ai.

Ndai tengman sadi dung ai lam hpe manu shadan hkan sa ai lam gaw ngwi pyaw ai kun dinghku prat hpe byin shagun nna kashu kasha ma ni matu kaja dik ai Sali wunli hpe jaw ya lu na rai nga ai. Anhte tinang a jahkring jahkra na pyaw lam hpang hkan nna kashu kasha ni a prat a pyaw lam hpe n jasum kau ya ga.

Kun dinghku hta  tengman sadi dung ai lam ngu ai gaw kashu kasha ni shawng prat hpe shimlum shangun ai ja dik kaja dik ai hku makawp maga ya lu ai n gaw kaba rai nga ai. Tengman myit malang ai hte sadi dung ai lam gaw kashu kasha ni a matu kaja dik ai lam madun kaja ni rai na rai nga ai.

Dai majaw tsawra hkungga ai kun dinghku kanu kawa ni a anhte tinang a tinggyeng jahkring mi na pyaw ngawn lam a matu hta kashu kasha ni a prat tup myit simsa lam hpe ningshawng jaw ai lam gaw anhte kanu kawa  ni a jet ai tsawra shawang myit nan rai nga mali ai law..