Mayak Lam Ni Hpe Hkum Hkrit U

Anhte nang ngai ni yawng, sak prat hkawm sa ai hkrun lam kata, ten langai ngai mi hta, mayak mahkak lam ni, mang hkang ni hte hkrum katut wa chyalu rai nga ai, ndai zawn byin ai lam gaw, masha shagu a matu, mungkan a byin da masa ni kawn jaw da ai bungpre ai lam yan langai mung rai nga ai

Sahte ni hpe gaw, mayak lam kaji sha jaw nna, matsan jam jau ai ni hpe gaw mayak lam kaba jaw na ngu ai nbung ai lam ni gaw, mungkan shingra tara hta, myiman lata ai lam gaw nnga nga ai , raitim masha law malawng hta, mayak lam langai hkrum wa sai nga yang, Ngai kaw she byin i ngu nna tsun chye ga ai, kaja nga yang masha shagu ngu na daram a matu, mungkan shingra tara kaw na maren mara byin hkra gaw galaw da ya ai rai nga ai  dai hku tsun na ngai hta she, mayak lam ni jahkring hkring pru ai, byin ai ngu shadu da lam ni hpe shamat kau na ra nga saga ai re.

Kaja nga yang, mayak lam langai, mang hkang langai byin wa sai nga yang, man up hkrum kadup dat nna, mahtai tam dat ai lam gaw jaw di kai magam lam langai re nga ai, dai mayak lam ni, manghkang ni hpe nhparan nna tawn da yang grau kaba wa na lam sha nga nga saga ai, anhte nang ngai a myit kraw kata hta, mayak lam ni, mang hkang ni nrai nga tim,, shani shagu galaw nga ai magam lam ni hte sha pyi ngalaw ngut ai ten ni hta sha pyi, dai magam lam hpe shangut shakre na matu, ngwi lagawn ai lam ni byin chye nga ga ai, ndai zawn byin ai a madung lam gaw, tinang a nchye ai kraw kata hta, mayak lam ni hpe hparan na matu hkrit tsang nga ai majaw rai nga ai, dai zawn mang hkang lam ni hpe n hparan nna hkrit tsang nga ai hte sha nngut mat nga ai re hpe dum chye nga ra ga ai,

Anhte nang ngai ramma ni hta mung, mayak lam ni, mang hkang lam ni ngu ai gaw, shani shaman hkrum katut wa na gaw teng sha rai nga ai, dai zawn mayak lam ni shagu hta, hparan lu ai mahtai ngu ai nga nga chya lu mung rai nga ai, anhte nang ngai a myit kraw kata hta hkrit ai lam ni, ka up taw nga ai a majaw sha, mang hkang lam ni hpe nhparan gwi ai lam ni byin pru nga ga ai re, tinang hku nna gara aten, kaning re ai lapran hta mi rai rai mang hkang lam langai ngai byin pru wa sai nga yang, lawt lam tam nna hprawng nga na malai, dai lam ni hpe nhkrit nkang gwi gwi hkrum kadup dat ai lam gaw ya ya na mang hkang lam ni hpe hparan lu ai lam sha n ga, bai kahtap byinpru na mang hkamg mayak lam ni hpe mung, nhkrit ntsang ai myit hte, hkrum kadup na jin jin rai nga ai madang kaw mung du nga na rai nga saga ai lam tsun shadum mayu ai

Bai anhte ramma ni hta hpa lam ni mi rairai, kalang ta shakut nna, awng dang lam hpe kalang ta lu la lu ai ngu ai lam gaw loi yak na re, kalang sha shakut nna awng dang ai ni nga mat ai zawn, kahtap kahtap shakut nna she awng dang mat wa ai ni mung nga nga chye ga ai, ndai shara kaw langai chye da ra na gaw, kalang sha hkrat sum ga ai hte sha gaw ngai nbyin nna, ngai angya nna re ngu ai lam yan rai nga ai, tinang a atsam marai ni gaw, laga wa hta, madu hkum madu chye htum rai na re, masha shagu gaw lam magup shagu hku n ningtawn nga tim, lam shagu hta mung a’ngay nga ga ai nrai nga ai, dai majaw nkau lam yan ni hta, ttinang nchye ai, lam shagu tinang angya nga ai nre ai lam  sadi mu mada lu na ahkyak la nga ai, raitim masha ni a ningmu gaw laga hku rai nga ai,  tinang kung tinang chye taw nga ai hpe, laga wa nchye yang, dai masha angya nga ai ngu ai galoi mung sawn la kau chye nga ai lam rai nga ai dai zawn re masha hpe, tinang a mara hpe gaw nmu lu nna, laga masha wa a mara ni hpe sha tam nna tsun chye ai ni ngu masat ra na rai nga ga ai anhte nang ngai ni yawng hta, galaw lu ai atsam ningja ni gu dek lu nga ga ai, mahkawn chye hkawn ai ni, gaw hkrang shala ai lam hta ningra ai ni rai yang rai chye nga ga ai, dai zawn sha mawdaw gau ai lam hta ningtawn nga ai masha wa cycle gau ai lam mung nkung nga ra na i ngu sa tsun nmai nga ai, lahkawng maga byin taw nga ai wa zawn re hpe gaw chye na hkap la ra na rai nga ga ai

Ya prat masa ramma nkau ni , lam shgu na ningtawn nga ai ni nga nga ga ai, dai zawn ningtawn nga ai ramma ni hpe yu n gun lu nna, hpang na ramma ni shakut ra na rai nga ai, sak prat hkrun lam hpe  dang hkrat shakut nga ai hta, hkrat sum wa ai ten hta mung, hkap la ra na rai nna, awng dang ai lam hpe mung lu hkra la ra nga ga ai, masa lam hku nna galoi mung ndang nga ai zawn, galoi mung hkrat sum na nrai nga ai, dai hta raitimung asum yawm hkra gaw galaw nna, awng dang ai lam law law lu hkra gaw galaw shakut sa wa ga ngu ramma ni yawng hpe  n gun jaw shadum mayu nngai  sak prat ngu ai gaw, ndai ngut yang ndai sa na gara hku byin wa na ngu ai lam ni hpe tau nau tak sawn da nmai nga ga ai re, hpa ni byin wa yang, gara hku hparan na ngu ai lam ni sha galaw lu nga ga ai dai lam ni sha sak prat a lachyum hpaw tsun ai lam langai mi rai nga ai, dai majaw anhte ramma ni hku nna, sak prat ting hta, shingjawng ai lam ni zawn sha, shingjawng lawm ai ni hte, dang na sum na langai ngai  hpe lu hkra galaw shakut sa ra na sha rai nga ai, nkau shingjawng ai lam ni gaw, shajin sa wa ai lam nnga ai sha, kalang ta rawt shingjawng ra ai  lam ni nga nga ai zawn, atsawm sha hkrat shajin nna shingjawng ra ai sak prat shingjawng ai lam ni mung nga nga chye ga ai re, dai hta kaning ra ai shingjawng lam ni rai rai, awng dang ai lam lu hkra galaw shkaut ra ai gaw, tinang kaw n alai kadai nnga nga ai, hkrak re ai lam gaw masa lam amyu myu a majaw hkrat sum ga ai rai yang mung, hpang kalang bai shingjawng ai aten, awng dang ai lam lu hkra sak se madun lu hkra shakut lu ai rai yang tinang n angya ai lam shi chyu shi hkap la lu wa na gaw teng sha rai nga ai ngu

#Youth

#Rvakachinservice