Myitkyina Saradaw Sasana kata, Jau Ginwang shagu na, Ramma Ningbaw ni a, ningja jat hkrum zup sharin hpawng hpe, 22-28, April, 2026 ya shani du hkra, Myitkyina Edin, San Luka College Chyum Jawng hta galaw sa nga sai rai nga ai.
22 April 2026 ( Bat 3 Ya ) Shana de, 4;30 Pm aten, Sagurem Wa, Wasaradaw John Mung Ngawn La Sam hte Wa Saradaw ni, Wajau ni, Wuhpung Shagu na Mama ni, Brother ni hpung a myitsu kanu kawa ni , sharin hpawng hta sa lung ai ramma ni law law hte, Sharin Hpawng Hpaw Hpang, lamang hte Missa Hkungga hpe Wa Saradaw hte Wa Jau ni Diocesan Youth Director, Wa Jau Paul Uga La Lung ni kaw nna, woi awn let, awng dang ai hku galaw la lu saga ai
Ndai sharin hpawng hta, Jau Ginwang -33 nga ai kaw na Ramma Marai 520 hte ap nawng ram ma ni marai 50 tup sa du shang lawm nga ai hpe mung mu lu ga ai.
Ya na zawn, Ramma ni a hkrum zup hpawng kaba hpe, lai wa sai 2016 ning hta galaw la ngut ai hpang 3 ning hta kalang galaw na matu myit hkrum daw dan da ga ai raitim, masa lam amyu myu a majaw n-lu galaw mat ai rai timung, dai ning bai galaw la lu sai hte, ndai sharin hpawng kaba hta, Myitkyina Saradaw Ginwang Ginjaw Ramma Commission hta, 2026-2029 ning du hkra, ap nawng magam gun mat wa na Ramma ningbaw ni hpe mung lata sa wa na re lam chey lu ga ai.
