Readings: 1st: Jer 20, 10-13; Ps: 68; 2nd: Rom 5, 12-15; Gos: Mt 10, 26-33
Ndai pranwan ladaw hta shi lahkawng ngu na Laban shani hta, anhte hte rau galoi mung nga nga ai, Anhte a Madu Hkristu hpe shagrau sha-a nga ga ai. Shi gaw anhte hpe jahkrit shama ai lam yawng kaw na matut nna hkye la nga ai, anhte a prat hpe yak hkak shangun nga ai lam ni hta zingri zingrat ai lam ni, yubak mara ni hte si hkrung si htan ni lawm nga ai.
Shawng na daw 1 hta, Karai Kasang gaw myihtoi Yeremia hpe si hkrung si htan maw mawn ai hte n hkru n kaja ai masha ni a lata kaw na hkye la ai. Anhte a mungkan gaw dinghpring ai ni hte mara n kap ai ni hpe jahkrit shama ai lam ni hte hpring nga ai. Dai ni aten hta, hkrit hpa shiga n na ai shani langai mi mung n lai nga ai mu chye lu nga ga ai. Ndai lam gaw, grau nna Karai Kasang hta n rai, ndai mungkan hpe sha kam hpa ai ni a matu, masha law law a matu hkrit tsang ai lam kaba hte myit npyaw ai lam kaba byin shangun nga ai.
Raitim, myihtoi wa zawn, Madu gaw shanhte maga de nga ai hpe chye na ai ni a matu, Karai Kasang gaw teng sha myit n pyaw shangun na n re. N-gun ja ai share wa hku nna, Shi teng sha galaw na re. Ndai hkrit hpa lam ni a jahkrit shama ai lam hte grai sawng ai lam gaw grai kaba ai zawn rai na re. Raitim, shanhte gaw shinggyim labau hta Karai Kasang hparan lai wa sai hta grau kaba ai gaw teng sha n rai nga ai.
Daini na daw lahkawng gaw, shawng na hte bung ai lam law law nga ai. Langai, myihtoi wa gaw shi hpe mara shagun ai, jahkrit shama ai lam yawng hta mara n nga ai sha, shinggyim masha ni gaw shi a kaji kawa ni (Adam yan Ewa) a ga n madat mara ai yubak mara a majaw si hkrung si htan hpe hkam la ra ma ai. Dai hte maren, Karai Kasang gaw mara n kap ai myihtoi wa Yeremia hpe shi a hpyen ni a maw lanyet hte hkrit hpa lam ni kaw na hkye la ai shaloi, lahkawng ngu na hta, Pawlu gaw Hkristu gaw shinggyim masha ni hpe si hkrung si htan a hkrit hpa lam ni kaw na gara hku hkye la ai lam hpe bai tsun dan nga ai.
Shing rai, Pawlu gaw anhte a hkye hkrang la ai labau hta grai ahkyak ai lam langai mi hpe myit maju jung shangun nga ai. Ndai lam gaw grau nna, yubak hte si hkrung si htan lapran na matut mahkai lam hte seng nna; bai nna, teng sha nga yang, Adam a n madat mara ai a akyu hte Hkristu a madat mara ai a akyu lapran na matut mahkai lam hpe mung tsun dan ai. Hpa majaw nga yang, Adam a ga n madat ai hte yubak mara gaw anhte hpe si hkrung si htan jaw ai raitim, Hkristu a madat mara ai lam gaw anhte hpe asak jaw ya ai.
Ndai gaw Hkristu anhte a matu galaw ya ai lam a sumtang rai nga ai. Shi a hkungga si hkam ai hte kawa a myit ra ai hpe madat mara ai hku nna, anhte a prat hpe jahkrit shama nga ai hkrit hpa lam ni hpe yeng seng kau ya nna, anhte a simsa lam hpe bai gram lajang ya sai. Shing rai, yubak mara a majaw, Adam yan Ewa a hkrat sum ai lam a majaw, ari jaw hkrum ai kaw na anhte hpe hkye la sai.
Kabu gara shiga hta Yesu anhte hpe ndai hku shadum jahprang nga ai: “Hkum hkrit myit, ya magap da ai yawng mayawng gaw magap da hkrum na n rai.” Dai hta dinghpring ai ni hpe zingri zingrat, jahten sharun na matu galoi mung jahkrit shama nga ai n hkru n kaja ai ni a masing ni mung lawm nga ai. Hkrit tsang ai lam hte si hkrung si htan hpe jahkrit shama ai lam gaw marai langai ngai hpe n-gun kya shangun lu ai hpe Hkristu chye nga ai hpe sadi ra ai. Hkrung nga ai ni hte si mat ai ni a Madu hku nna, hkum hkrang si ai gaw jahtum n re ai hpe chye nga ai. De a malai, htani htana prat de galai shai wa ai lam re. Dai majaw, shi anhte hpe ndai hku matut shadum da ai: “Hkum hkrang hpe sat kau lu nna, wenyi hpe n sat kau lu ai ni hpe hkum hkrit mu: hkum hkrang hte wenyi lahkawng yan hpe ngarai wan hta jahten kau lu ai wa hpe hkrit nga mu.”
Ndai shalan shabran ya ai hte kam hpa shangun ai Hkristu a ga ni hta, Hkristan ni hku nna anhte a myit mada shara hte htawm hpang prat hpe shim lum shangun lam jaw ya nga ai: ‘Na a baw ntsa na kara shagu hpe hti da sai. Dai majaw, hkrit tsang ra ai lam n nga ai!” Dai ni gaw Madu anhte maga de nga ai hpe sha madun dan nga ai. Yubak mara a akyu ara hte hkra machyi ai lam lahkawng yan kaw nna mung, anhte a shani shagu na prat hta hkrum katut nga ai jahkrit shama lam yawng kaw nna mung, anhte hpe hkye la na matu jin jin rai nga ai.
Dai ni Hkristu ga sadi jaw da ai makawp maga lam hpe lu la na matu anhte galaw ra ai lam yawng gaw, shi hpe kam hpa let shi a maga de nga na sha rai nga ai. Ndai lam gaw, anhte a lailen hte galaw sa wa ai lam ni hta tara rap ra ai hte mara n kap ai hku nga ra ai. Jet ai Hkristan tai ai ngu ai lachyum re. Teng sha nga yang, Hkristu hta e tsepkawp apnawng da ai lachyum mung rai nga ai.
Bai nna, Karai Kasang a ga sadi kaba nkau mi hpe aten loi mi jaw nna bai myit yu ga. Karai Kasang gaw lanu lahku nga ai – anhte langai hte langai gaw Shi a tsawra ai kasha ni rai nna, Shi gaw anhte langai hte langai hpe lanu lahku nga ai hpe adum nga ga.