Mungkan hta tsin-yam hkrum sha nga ai masha ni hte rau, Nawku Hpung gaw hkawm sa nga ai ngu ai lam hpe madun ai Mungkan Hpyen Yen Masat Nhtoi hpe ( 21 June 2026 ) ya Laban jahpawt St. Columban Cathedral, Aungnan hta shara shagu na hpyen yen masha ni sa du shang lawm nna Missa Hkungga hpe jawm nawng ya ai. Missa Hkungga hta Myitkyina Saradaw Sasana a Vicar General Msgr. Dr. Peter Hka Awng Tu woi awn nna Wa jau marai ( 5 ) nawng jau ya ai
Daini na Mungkan Hpyen Yen Masat Nhtoi galaw ai a yaw shada lam gaw majan a majaw shim lam n nga ai hte, yakhkak ai masa lam ni a majaw, tinang a nta buga hte, lu da ai rung rai, du sat yam nga, yi sun hkauna ni, yawng hpe tawn kau da nna, hprawng yen ra mat ai hpunau nauna ni hpe, myit dum nna, shanhte a matu, nawku hpung gaw shanhte hte arau rai nga ga ai ngu ai hpe madun ai, shanhte a matu laksan akyu hpyi ya ai lam rai nga ai. Ndai lamang hpe Myitkyina Sasana kata na hpyen yen tsin yam masha ni hpe garum shingtau ya nga ai, wuhpung wuhpawng ni hte Nawku hpung kaw nna woi awn galaw ai rai nga ai.
Ndai lamang hpe madung lit la woi awn nga ai wuhpung ni gaw –
- Jesuit Refugee Service (JRS)
- Justice and Peace Commission (JPC)
- Diocesan Commission for Education (DCE)
- KMSS Myitkyina
- Columban Missionaries
- Community Health and Development (CHAD)
- Myitkyina Diocesan Catholic Health Commission (MDCHC)
Mungkan hta tsin-yam hkrum sha nga ai masha ni hte rau, Nawku Hpung gaw hkawm sa nga ai, shanhte a lam ni hpe madat ya nna, shanhte a myit mada lam ni hpe, garan kachyan ya nga ai hpe shadum ya ai lam rai nga ai.
Hpyen majan, n tara ai lam hte yakhkak jamjau hkrum nga ai mungkan hta, bu htawt masha ni hte hpyen yen ni gaw “madu a myit mada lam hpe sakse hkam ai ni” byin wa lu ai lam, Wa Sarabyin Leo XIV gaw anhte yawng hpe shadum da nga ai. Shanhte a nden marai hte shakut sharang ai lam gaw, yakhkak jamjau ai aten hta pyi, myit mada lam matut nga ai hpe madun dan ai, rai nga ai.
Dai ni na Missa Hkungga hta, hpyen yen nga ai, kun dinghku masha ni a yakhkak jamjau ai lam ni, shanhte a yupmang ni, shanhte a sum mat ai lam ni, simsa lam hte grau kaja ai htawm hpang prat lu na matu shanhte a myit mada lam ni, ndai lam ni yawng hpe Karai Kasang a, man de anhte la sa nna, hkungga nawng jau ya ai lam rai nga ai.
Ndai lamang hta Kachin State hta nga ai, Hpyen Yen Masha ni a hkrun lam hta, ra kadawn ai lam ni hpe hkrang shapraw ai kumla ni hpe madun dan ai hku nna – Malu masha lam, Wenyi lam, hpaji lam, hkamja lam, Tara rapra ai hte simsa lam, Makam Masham lam, Shingra tara hpe makawp maga lam, ndai lam ni yawng gaw anhte a lit rai nga ai hpe, madun dan ai kumla hku nna Alu Ap ai lamang hta hkrang shapraw sak jaw ai lam galaw ai.
1. Lusha hte Hka (Food Security)
Kumla: Hkai Nu, Mam, Hka
Ndai Hkai Nu, Mam hte Hka hpe sak jaw ai lam gaw: Anhte yawng hte hpyen yen masha ni yawng a prat hta, shani shagu na matu, malu masha hte san seng ai ntsin gaw asak hkrung na lam a matu ahkyak dik ai lam, Hpyen koi yen nga ai dinghku ni law law gaw, shanhte a shani shagu na ra kadawn ai lam ni hpe lu na matu, karum shingtau ai lam hte, karum shingtau ai lam ni hpe kamhpa nga ai lam hpe madun ya ai kumla rai nga ai. Chyum Mungga: “Dai ni anhte ra ai lusha, dai ni anhte hpe jaw mi“. – Mahte 6:11.
2. Wenyi Malu Masha (Spiritual Nourishment)
Kumla: Chyum Laika
Chyum Laika sak jaw ai lam gaw – Anhte gaw makam masham hte myit mada lam a kumla hku nna Chyum Laika hpe garan jaw ai. Yakhkak jamjau hkrum ai aten hta, Karai Kasang a Mungga gaw n-gun atsam, nden marai hte kadai mung shi hkrai n hkawm sa ai, ngu ai ga sadi hpe jaw ya ai lam a kumla rai nga ai.
Chyum Mungga daw: “Madu gaw nye a sagu rem wa rai nga ai, ngai hpa mung ra nga na n rai”. Shakawn 23:1
3. Hpaji Lam (Education)
Kumla: Matsing Laika buk langai
Matsing laika buk hpe sak jaw ai lam gaw – Hprawng yen nga ai aten hta pyi, sharin la ai lam gaw, yup mang ni hpe matut makawp maga ya nna, kaja ai htawm hpang prat lu na matu ma ni hte ramma ni hpe sharin achyin ya ai lam hte myit mada ai lam hpe jaw ya ai kumla rai nga ai.
Chyum Mungga: “Nye a amyu masha ni gaw, chye chyang ai myit n rawng ai majaw, hten byak hkrum ma ai“. – Hosea 4:6.
4. Hkamja Lam (Health Care)
Kumla: Tsi Mawan hte Seng ai rung rai ni
Ndai tsi mawan hte seng ai rung rai ni hpe sak jaw ai lam gaw – kawn lajang ya ai lam hte shamai shatsai ya ai lam, hkamja lam gaw shinggyim masha langai a lu gying ai ahkaw ahkang rai nga ai hte, grau nna myit tsang ra ai masa lam hta sak hkrung nga ai ni a matu ahkyak ai lam hpe madun ya ai, kumla rai nga ai.
Chyum Laika Daw: “Ngai machyi makaw hkrum yang, nanhte ngai hpe lanu lahku myit dai.” Mahte 25:36
5. Tara Rapra Lam hte Simsa Lam (Justice and Peace)
Kumla: (Payawng deng Wan Shadaw)
Payawng deng wan hpe sak jaw ai lam gaw – hpyen yen kun dinghku nta masha ni yawng a matu, akyu hpyi htinglu htinglai ya ai hte, hkrit tsang ai lam n-nga ai sha shim lum ai hku, nta bu ga de bai nhtang wa lu na lam a kumla hte, tengman ai shim lum lam gaw Karai Kasang a kumhpa langai mi rai nna, anhte yawng hta lit nga ai lam hpe shadum ya ai kumla rai nga ai.
Chyum Mungga: “Ngwi pyaw simsa lam a matu galaw gunhpai ai ni gaw a lu ma ai; kaning rai nme law, shanhte hpe Karai Kasang a kashu kasha ni, ngu na shamying na maru ai.” Mahte 5:9
- Shingra Tara hpe Makawp Maga Lam (Environmental Care)
Kumla: Hpun Bawng
Hpun bawng sak jaw ai lam gaw – Karai Kasang anhte hpe ap ya ai lamu ga, hka nu ni hte hpan da ai lam ni hte shinggyim masha gaw shada da shamyet shanat let matut mahkai nga ai hpe shadum ya ai. Hpyen yen ai masha ni a asak hkrung lam gaw, shanhte a makau grupyin hta madung nga ai. Hpan da ai lam hpe lanu lahku ai gaw, shinggyim masha ni a sari sadang hpe makawp maga ai lam re ai hpe shadum ya ai kumla rai nga ai.
Chyum Mungga: “Madu Karai Kasang gaw dai masha wa hpe woi la nna, Edin sun hpe yu lajang na hte sin na matu, tawn da wu ai.” Ningpawt Ninghpang 2:15
- Mali Hka Wudang – Care for Creation
Symbol: Mali Hka Wudang
Mali Hka wudang sak jaw ai lam gaw – Karai Kasang gaw anhte shinggyim masha ni hpe, yakhkak jam jau ai ten ni hta, myit mada lam hte hkam jat lu ai n-gun atsam jaw ya nna, Karai Kasang hpan da ai lamu ga hpe lanu lahku, makawp maga ra ai, lit magam nga ai hpe, shadum ya ai kumla rai nga ai.
Chyum Mungga: “Karai Kasang gaw anhte a shingbyi shara hte n-gun rai nga ai; ru tsang hkrum ai aten ni hta karum la na, tut nawng jin jin rai nga ai.” Shk: 46:1
Dai ni anhte sak jaw ai kumla ni gaw, anhte Wunpawng Mungdan hta hpyen yen nga ai hpu nau ni yawng a, sak hkrung lam, shakut shaja nga ai lam hte myit mada ai lam ni hpe bai myit dum let, kyu hpyi shangun ai lam rai nga ai.
Mungkan Hpyen Yen Masat Nhtoi (World Refugee Day) gaw, Mungkan ting na hpyen yen masha ni hpe, shagrau sha-a na matu, Mungkan Wunpawng Hpung (United Nations) kaw nna masat da ai, Mungkan nhtoi langai mi rai nga ai. Shaning shagu June shata 20 ya shani hta, galaw ai rai nna, majan hte zingri zingrat hkrum ai kaw na lawt lu na matu, tinang a buga, Mungdan kaw na hprawng yen ra mat ai, masha ni a n-gun atsam hte nden marai hpe, masat ya ai rai nga ai. Mungkan Hpyen Yen Masat Nhtoi gaw, shanhte a yakhkak ai lam hpe, chye na ya ai hte, shanhte a prat hpe, bai gawgap lu ai atsam hpe, masat ya ai lam mung, rai nga ai. Minit shagu hta masha marai 20 gaw, majan a majaw zingri zingrat ai hte, hkrit kajawng ai lam ni kaw na, lawt lu na matu, yawng mayawng hpe kau da nna, hprawng hkawm nga ma ai.
Dai ni na aten gaw, hpyen yen ni hte tinang a nta masha ni a, sari sadang, nden marai ni hte, myit mada lam hpe chye na ra ai, aten rai nga ai. Shanhte gaw karum shingtau ra gadawn nga ai, masha ni sha n re ai sha, anhte a kanu kawa, hpunau nauna ni hte, Karai Kasang a kashu kasha ni rai nga ai.
