HTAI YA AI WA – Wa Jau Dr.Joseph Gawlu Yung Wa
GA SAN – Novena akyu hpyi ai shaloi, (9) ya hpyi ra ai hpe chye lu ai…Rai yang, malap mali byin nna lani mi n hpyi kau yang, tinang hpyi da ai shaman chyeju gaw hpring tsup na kun? Ningnan kaw nna bai hpyi ra ai kun?
HTAI – Novena ngu ai gaw (9)ya ngu ai lachyum re. Chyoi Pra ai Maria the Yesu a Kasa ni, shang na Hkristan ni marai (120) daram, Madu Yesu Kawa kaw nna shangun dat ya na Chyoi Pra ai Wenyi hpe akyu hpyi let ala nga ma ai; (90) lai nna (10) ngu na jahpawt e Chyoi Pra ai Wenyi shanhte a ntsa de yu wa sai. Dai hpe la nna Novena Akyu hpyi lamang ngu nna galaw ma ai.
Raitim, Madu Yesu shanhte hpe (9) ya na hkra hpyi mu ngu nna n htet da ai. Akyu hpyi let ala nga mu sha ngu ai. Dai majaw, Novena galaw ai shaloi “lani mi” malap kau, shalai kau re ai gaw ahkyak n rai nga ai. “N sim n sa” kam sham, myit mada, tsawra ai hte hpyi nga na mahtang she madung rai nga ai.
San ai wa – Manmaw Saradaw Ginwang, Namlim Pa Jau Aseng, Mung Lu Sara Nhtawn, Hpaga Rai mare kaw nga lai mat wa nna, ya, Myitkyina Saradaw Sasana, Mogawng Jau Ginwang, Nam Sheng mare lawk (3) kaw bai nga let, kan bau magam bungli a majaw Pang Wa ginra Hulu Shan de du nga ai Magdalena Lasang Hkawn Ra
