Readings: 1st: Is 55, 10-11; Ps: 64, 10-14; 2nd: Rom 8, 18-23; Gos: Mt 13, 1-25
Daini 15 ngu na Laban shani hta, anhte a myit masin hta Karai Kasang a mungga nli gat hkai ai Hkristu hpe anhte shagrau nga ga ai. Esaia a myihtoi ga hte Hkristu a Nli gat ai wa a ga shadawn hpe yu nna, Karai Kasang a mungga hte anhte a matut mahkai lam hpe jep joi yu na matu Nawku hpung gaw anhte hpe hkang da nga ai. Dai majaw, dai ni anhte hkum anhte san ra ai, Karai Kasang a mungga gaw nye a prat hta hpa hpe awng dang shangun ai (sh) galai shai shangun ai kun?
Daw 1 hta, Esaia gaw Karai Kasang a mungga hpe ga ntsa de htu hkrat ai marang hte hkyen hte shingdaw da ai: “Ga hpe hka n jaw ai sha, sumsing lamu kaw nna marang hte hkyen zawn…nye a ga gaw, shi a lit hpe n shadik shatup ai sha, ngai hpang de kaman lila bai wa na nrai.” Karai Kasang a mungga gaw asak hkrung lu ai hte shamu shamawt lu ai majaw re. Anhte a prat hpe bai gram lajang ya lu ai atsam hpring tup nga ai. N shan lahkawng tu ai nhtu zawn (Heb 4:2) langai hpe mara raw ya nna mara shagun ya ai. Dai majaw, gara hku mi rai rai, shi a sasana magam hpe shadik shatup lu ai: “Karai Kasang a mungga gaw, Rai sa, Amen rai nga ai” (1 Kor 1, 20).
Daw lahkawng hta, Pawlu gaw grai ahkyak ai ga hpe tsun da nga ai. “Karai Kasang a kasha dan pru wa na hpe hpan da ai ni gaw myit mada let ala nga ai.” Ndai hpaw shadan dan ai lam gaw anhte a kata kaw nga ai hpe hpaw shadan dan ai lachyum rai nga ai. Dai majaw, Karai Kasang a mungga hte hpring ai di bu ni hku nna, hpang jahtum e dan dawng wa ai shaloi, manam pyaw ai baw hpe shapraw na hpe myit mada da nga ai.
Hpaw shadan na gaw Karai Kasang a mungga hku nna Chyoi Pra ai Wenyi a asi ni hte Hkristu hta anhte hkam la lu ai namman chya ai lam ni rai nga ai. Karai Kasang a mungga hpe gun hpai ai Karai Kasang a kashu kasha ni hku nna, myit mada shara kaba nga ai. Dai majaw, ndai myit mada lam a akyu gaw kaja ai lam rai ra ai. Anhte hta gat hkai da ai kabu gara shiga a nli gaw, grin nga lu ai majaw, n-gun jaw ai lam rai ra ai.
Dai ni na kabu gara shiga hta, Yesu gaw anhte langai hte langai hpe shi hkum nan Nli gat ai wa a ga shadawn hpe jai lang let tsun shaga nga ai. Daini na ga shadawn a nhtoi hta anhte hkum anhte teng sha jep joi yu yang, dai ga shadawn kata hta anhte a shara hpe hkam la mai ai hpe mu lu na re. Nli tum ni hpe ga a shingra tara hte gara kaw hkrat sum ai hpe n sawn ai sha shara shagu de chyam bra wa ai gaw Karai Kasang a mungga hpe masha shagu na lu na matu ahkang jaw mayu ai hpe madun nga ai. Hkye hkrang la ai lam a mungkan ting hpe hkap la ai lam hpe madun dan nna, Karai Kasang hta ra sharawng ai lam n nga ai kumla mung rai nga ai. Amyu bawsang yawng kabu gara shiga na lu nna, myit malai lu nna asak hkrung lu na hpe ra sharawng nga ai (Kasa 10:34).
Daw 1 hte kabu gara shiga lahkawng yan kaw nna lam langai mi dan dawng nga ai. Ndai gaw Karai Kasang a mungga gaw nli tum (viable seed) re ai lam rai nga ai. Tsun mayu ai gaw, manghkang gaw nli tum hta n re. De a malai, manghkang gaw galoi mung hkap la ai wa hta sha rai nga ai. Dai gaw Karai Kasang a mungga hpe langai ngai a myit masa hta hkan nga ai.
Kaja wa myit n pyaw hpa gaw, Karai Kasang a mungga gaw anhte nkau mi a matu lachyum n pru mat sai. Prat law law hta bai kahtap tsun ai moi na maumwi langai zawn tai mat wa sai. Kalang mi bai madat nna, anhte a prat hpe matut hkawm sa wa ga! Kaga ni a matu gaw, anhte a lam hta pat shingdang ai lam rai nga ai, Pawlu tsun ai zawn: “…Anhte gaw Yuda masha ni a matu ahtu kataw shara rai nga ai, maigan masha ni a matu angawk ai lam rai nga ai, wudang hta jen da hkrum ai Hkristu (Karai Kasang a Mungga hpe anhte hkaw tsun nga ga ai” (1 Kor 1:23). Hpung shingkang gaw Karai Kasang kaw rai nga ai, masha law law a matu, dai gaw naw hkrung nga ai, shani shagu ningnan rai nga ai.
Karai Kasang a mungga hpe gara hku hkap la, manu shadan, galaw ai lam ni gaw anhte kadai re ai hpe dawdan ya nna, dai mungga gaw anhte hta, anhte a matu hpa awng dang wa ai hpe dawdan ya nga ai. Hkap la nna quarantine galaw na matu n re. De a malai, dai hpe sak hkrung na matu anhte hta nga ai. De a malai, lusha gaw shan hpe shabyin nna, anhte a si chye ai hkum hkrang hte langai sha tai wa ai zawn, anhte hpe bau maka na matu hte langai sha tai wa na matu yaw shada ai. Anhte a arawn alai hpe hkrang shapraw ya ai ngu sawn la mai ai. Dai hku anhte asak hkrung, tsun shaga, hkawm sa, kanawn mazum nga ga ai. Dai majaw, dai hpe shangun dat ai Karai Kasang hte langai sha rai nga ai zawn (shawng nnan e, Yhn 1:1-4), dai ni aten hta mung, galoi mung anhte hte langai sha tai wa na matu yaw shada ai re.
Hpang jahtum Karai Kasang a mungga gaw anhte a makam masham hpe shachyaw ya nna, anhte a makam masham mung dai hta madung nga ai. Dai majaw, Pawlu gaw, “Kam sham ai gaw, mungga hpe na la ai kaw nna pru wa ai rai nna, dai mungga hpe Hkristu a mungga hku nna na la lu ai” ngu nna shadum nga ai. (Rom 10:10 -17).
Karai Kasang gaw shani shagu na lu ai Shi a asak jaw ai mungga a marang e anhte a makam masham hta galu kaba kung hpan wa hkra karum ya u ga law. Amen.