Readings: 1st: I Kg 3: 5. 7-12; Ps: 118; 2nd: Rom 8, 28-30; Gos: Mt 13, 44-52
Ndai 17 ngu Laban shani hta, Nawku hpung gaw sutgan yawng hta kaba dik ai sutgan gaw Karai Kasang a Mungdan re ai hpe shadum ya nga ai. Shi a tsawra myit hta, Karai Kasang shi nan anhte hpe lata la nna, shawng nnan kaw na anhte a matu lajang da ya sai. Dai majaw, Karai Kasang a mungdan hte makoi magap da ai lam ni a manu hpe chye na hkawn hkrang lu na matu, Shawlumon zawn hpaji byeng-ya hpyi na matu chyoi pra ai kanu nawku hpung gaw n-gun jaw nga ai.
Daini na daw 1 hta, Shawlumon a shara hta nang hpa hpe hpyi na kun? Nkau mi gaw mawdaw, nta, hkyepdin, malu masha, gumhpraw, ahkang aya, kashu kasha hte kaga law law hpe hpyi shawn na re! De a malai, Shawlumon gaw shi hte Karai Kasang a mungdan hpe akyu jaw na matu hpaji byeng-ya hpe hpyi shawn ai. Shi hpe chye na hkawn hkrang ai lam jaw na matu Karai Kasang hpe ndai hku hpyi nem ai: “Na a mayam wa hpe kaja ai hte n kaja ai hpe chye ginhka lu ai myit masin jaw e law.”
Chye na chye ai myit masin gaw Karai Kasang a kumhpa rai nga ai (Ga Shagawp 2: 6). Anhte awng dang na matu shani shagu hte anhte a prat hta lam shagu hta (dinghku, bungli, hpaji lam, prat a dawdan lam yawng hta) ra kadawn nga ai. Dai majaw, Kasa Yaku gaw anhte hpe ndai hku n-gun jaw ai: “Nanhte hta na marai langai ngai hpaji byeng-ya n rawng yang gaw, yawng mayawng hpe jaw ya ai Karai Kasang kaw hpyi mu, shaloi nanhte hpe jaw ya na ra ai (Yak 1:5) Hpaji byeng-ya hpe Shawlumon hpyi ai majaw jaw ai rai tim, Karai Kasang gaw anhte hpe hpaji byeng-ya hte, myit sawn sumru ai hku, tinang hkum hpe nmyit sha hpyi na hpe myit mada nga ai.
Daw Lahkawng hta, “Karai Kasang gaw shi a yaw shada ai hte maren shaga la hkrum ai shi hpe tsaw ra ai ni hte rau, lam shagu hta mai kaja ai amu galaw nga ai” nga nna Pawlu shadum da nga ai. Karai Kasang gaw prat a nbung laru ni hpe lai di nna anhte a nta hte shi a mungdan de woi sa wa nga ai. Anhte hpe dai de woi sa na matu, sadi maja let, anhte a prat hta byin ai mabyin yawng hpe Shi matsun ya nga ai. Ndai hpe anhte gaw providence ngu tsun ga ai. Tsun mayu ai gaw, Karai Kasang a n-gun ja ai lata gaw anhte a prat masa lam shagu hta lawm ya nga ai.
“Yawng mayawng” gaw tsep kawp lawm ai hte hkum tsup ai. Dai hta atsam marai, shadawn sharam n nga ai. Dai majaw, ndai chyum daw hta mung, shi a shingdu labau hta mung, pat shingdang ai lam (sh) masa lam ni hpe n tsun da ai. “Yawng mayawng” ngu ai gaw, mai byin ai lachyum hta hkum tsup ai hku lawm ai. Dai ni hta, na a ya na manghkang, na a myit masin lit li ai, na a matsan mayan, na a sut su lam, bungli n lu ai, na a awng dang ai hte hkrat sum ai, na a gawng kya ai hte atsam rawng ai, na a machyi makaw hte hkam kaja lam ni lawm nga ai. Kaja wa nga yang, “yawng mayawng” hte hpa mung n ngam da ai!
Karai Kasang n chye ai sha sumsing lamu hte ginding aga hta hpa mung n nga ai, byin ai lam n nga ai. “Yawng mayawng gaw anhte a matu rau jawm galaw nga ai” ngu tsun nna, Karai Kasang a lajang ya ai lam hta n hkrum n ra ai lam n nga ai hpe kam shangun na matu Pawlu shakut nga ai. Ndai lam gaw grau nna Hkristu hpe kam sham ai hku nna hpaji rawng ai hku Karai Kasang a jinghku tai wa sai ni a matu rai nga ai. Karai Kasang shi a Mungdan a matu lata la nna tau hkrau dawdan da ai ni hpe hpang jahtum hta hpa mung n mai galaw ai hpe mung kam shangun nga ai. Shi hte rau sadi dung let hkawm sa ai ni rai nga ai.
Dai ni na kabu gara shiga gaw, Karai Kasang a Mungdan lam hpe sharin ya na matu Yesu a ga shadawn ni hpe matut tsun dan nga ai. Dai majaw, Shawlumon zawn hpaji rawng na matu shaga la ai lam rai nga ai. Hpaji byeng-ya n nga yang, Hkristu a ga shadawn ni hpe chye na na matu mung n mai byin ai, Karai Kasang a mungdan hpe mung n tam lu na re. Dai ni na kabu gara shiga gaw anhte a matu manu dan dik htum ai hte Karai Kasang anhte hpe lata la ai lam hpe manu shadan na matu shaga la ai lam mung rai nga ai.
Daini na ga shadawn ni gaw, ndai mungkan hta sumsing lamu mungdan hpe grau ra sharawng nna, dai mungdan de shang na matu hpa mung pat shingdang ai lam n nga hkra sharin ya na matu yaw shada ai. Ndai ga shadawn ni hku nna Hkristu gaw htani htana asak a grau kaja ai hte tsawm htap ai lam ni hpe shadum ya nga ai. Karai Kasang a mungdan gaw ndai mungkan na hpaji rawng ai ni kaw na makoi da ai sutgan rai nga ai.
Karai Kasang a madang hte maren hpaji rawng ai ni sha dai hpe tam mu lu ai. Dai hpe tam na matu, shawng manu shadan ra ai; dai hpe mu jang, anhte a myit masin kata e makoi da ra ga ai. Dai majaw, anhte a matu kaja ai lam hpe chye ginhka lu na matu, Karai Kasang a mungdan hpe ahkyak shatai nna galaw lu na matu, Shawlumon zawn Karai Kasang kaw chye na hkawn hkrang ai hte hpaji byeng-ya hpe hpyi nga ga.