Readings: 1st: I Kg 19, 9. 11-13; Ps 84, 9-14; 2nd: Rom 9, 1-5; Gos: Mtt 14, 22-33
Nbung laru” ni gaw anhte shinggyim masha ni a prat hta daw chyen mi lawm nga ai. Nbung laru ni gaw panglai ni hta n mai koi yen ai zawn, shinggyim masha ni a matu si hkrung si htan mung n mai koi yen ai zawn, ndai mungkan hta prat a nbung laru ni hpe mung koi yen nmai nga ai. Ndai 19 ngu na laban hta Nawku hpung gaw, nbung laru ni gaw n mai koi yen ai sha, anhte hpe tsin-yam tsindam ni shabyin ya nga ai raitim, anhte a Madu hte Hkyela Madu Yesu Hkristu gaw anhte a prat na nbung laru ni hpe simsa shangun nna, anhte a simsa lam hpe bai gram lajang ya nga ai hpe kabu gara let shadum ya nga ai.
Daw 1 hta, hkrit kajawng ai hte ningdang ai myihtoi wa Elia gaw, shi a prat na nbung laru hpe shazim kau ya nna, shi a simsa lam hpe bai gram lajang ya ai Karai Kasang hpe mu hkrup ai. Elia gaw shi a prat a nbung laru hta shi hkrai sha nga ai hpe sharin ya ai raitim, Karai Kasang gaw shi hpe ndai hku tsun ai: “Nye a tsawra ai wa nang gaw nang hkrai sha n rai, galoi mung hkawm na n re, hpa majaw nga yang, na a simsa lam hpe bai gram lajang na matu ngai ndai kaw du nga ai!” Anhte a kata kaw simsa nga ai shaloi, anhte a myit masin hpe kata na nbung laru hte nsen ni kaw na tsan gang shangun ai shaloi, anhte a kata kaw na pawt sindawng ai lam ni hpe anhte hpa mung n chye ai lam ni, anhte a myit masin simsa lam hpe bai gram lajang ya lu ai lam ni hpe Karai Kasang tsun ai hpe anhte na lu na re. Hpang jahtum e Karai Kasang gaw nbung laru zim ai hpang Elia hpe tsun shaga ai ngu tsun ai gaw, Elia shi hkum shi dum wa nna, myit simsa wa ai, shi hpe ka-up da ai kata na hkrit tsang ai lam hte nbung laru kaw na htingnut mat wa ai aten hta rai nga ai. Law law lang, anhte gaw Karai Kasang hpe n hkru n kaja ai myit masin hte tam ai, myit bra ai lam ni grai law ai makau grup yin hta tam ai. Ndai lam ni hta Karai Kasang a nsen hpe anhte teng sha n na lu na re. Raitim, anhte dum wa ai shaloi, shi anhte hpe tsun ai hpe anhte na lu ga ai.
Daw Lahkawng hta, Pawlu gaw shi a amyu masha ni a matu shi a myit masin hta hkam sha nga ai yawn hkyen lam (sh) nbung laru hpe tsun dan nga ai. Shi a amyu masha ni hpe mau hpa hkye hkrang la ai lam hte simsa lam jaw ya ai Hkristu hpe nan ningdang kau ai shi a amyu masha ni hpe myit dum shangun nga ai. Dai ni aten hta Pawlu gaw shi hkum shi ndai hku tsun ai: “Nye a hpu nau ni hpe karum ya lu yang, ngai sharawng awng let tara jeyang hkrum na nngai.” Langai hte langai tsun ga nga yang, shi hkum nan hkye hkrang la hkrum ai zawn, shi a hpunau ni mung hkye hkrang la hkrum na matu grai ra kadawn nga ai ngu hkam sha nga ai. Dai majaw shi a simsa lam gaw hkum tsup ai shim lum lam n re shi a hpunau ni simsa lam hpe lu la na matu shi karum lai wa sai. Dai majaw Pawlu anhte hpe sharin ya ai gaw, anhte a matu sha n-ga, kaga masha ni a kaja ai lam hte hkam kaja lam hpe mung myit yu ra ai. Dai hku nna anhte hkum nan a kata na simsa lam hpe lu la nna, Karai Kasang hte hkum tsup ai hkrum shaga, hku hkau lam hpe hkam sha lu ai. Kaga masha ni shim lum lam n nga ai gaw anhte a grup yin hta n hkru n kaja ai lam ni nga ai, anhte mung shim lum ai lam n nga ai gaw anhte a simsa lam hpe jahten kau ai majaw re. Dai majaw, zingri zingrat ai lam gaw, Elia hpe ngwi pyaw simsa ai Karai Kasang hpe mu tam lu hkra karum ya ai zawn, anhte a hpu nau ni hpe mung, ngwi pyaw simsa lam a hkawhkam Yesu Hkristu hta grin nga lu ai simsa lam hpe mu lu hkra karum ya ra ai.
Dai ni na kabu gara shiga hta Yesu a shawng na sape ni gaw shanhte a prat hta nbung laru hpe hkam sha lai wa sai rai nna, shanhte a nbung laru hpe simsa hkra Yesu gaw jin jin rai nga ai. Ndai shawng na Yesu a sape ni zawn, anhte langai hte langai mung anhte a prat hta lam amyu myu hku nna nbung laru hpe hkam sha lai wa saga ai. Nkau mi gaw ndai homily hpe madat nga ai ya aten hta pyi hkrum sha nga na re. Dai nbung laru gaw anhte a machyi makaw ni, dinghku manghkang ni, gawng kya ai dinghku ni, myit ja baw ja ai ma ni, prat hta hkam sha ra ai lam law law, myit masin simsa lam n nga ai, lam amyu myu a majaw kashu kasha n lu ai, bungli n lu ai, gumhpraw yawm wa ai, matsan mayan hkrum ai, myit daw myit hten ai, tsawra myit n nga ai, jai lang hkrum ai, anhte hpe garan ginhka ai lam ni, myit masin n kaja ai akyang lailen ni hte garan ginhka ai lam ni hpe madi madun ai. Ndai ni hte kaga law law ni anhte a kata kaw nga ai shaloi, shing nrai anhte hpe shinggrup da ai shaloi, anhte a prat na sanghpaw ni gaw n hkru n kaja ai lam ni hpe hkam sha hpang wa nna, htingnut mat wa chye ai.
Tsun ga nga yang, Elia zawn anhte mung Karai Kasang ra sharawng ai shara kaw nga ra ai, shi a atsam hte simsa lam a Karai Kasang the hkrum shaga na matu rai ra ai. Bai nna, Karai Kasang hte galoi mung hkrum zup na shara nga ra ai, shi anhte hpe gara aten, gara shara hta la nga ai hpe mung chye ra ai. Shi gaw galoi mung hpang hkrat ai wa n re ai majaw, aten masat da ai aten hpe n nga ai majaw, dai kaw anhte hpe galoi mung la nga na re. Karai Kasang hte Yesu hte hkrum zup na shara nga ai kun? Gara kaw rai ta? Dai shara gaw na a salum hte myit masin rai ra ai – Karai Kasang nga ra ai na a hkraw kata chyoi pra ai shara rai ra ai. Karai Kasang nga ai shara a matu aten shagu hkyen lajang nna jin jin rai nga ra ai. Ndai Karai Kasang the hrum zup ai shara kaw na nsen, myit tsang ai lam, pawt sindawng ai lam, matai htang ai lam, masu hkalem ai lam, nhtang tsun ai lam, myit marin ai lam, n hkru n kaja ai lam, hkrit tsang ai lam, teng sha nga yang Yesu tsun ai lam yawng gaw masha langai hpe awu asin di kau ya ai lam ni hpe shapraw kau ra ai (Mk 7, 15-16). Bai nna, Karai Kasang hpe n mu lu ai shara (nbung laru kaba, wan hkru ai aten ni hta) n tam ai sha, anhte a myit masin a katsi zim re ai aten hta mu lu na hpe myit mada let myit galu ra ai.
Lahkawng, sape ni zawn, Yesu anhte hpe tsun ai shaloi kam hpa na matu sharin la ra ai: “MYIT SHAJA NGA MU, HKUM HKRI MU, NGAI RE N NGAI”, hpa majaw nga yang, shi gaw anhte hpe madi shadaw ya lu ai hte anhte a prat a nbung laru hpe simsa hkra galaw ya lu ai wa rai nga ai. Hkristu hte rau nammukdara ntsa hkawm sa wa ai Petru zawn anhte a prat na nbung laru ni hpe nden marai hte ninghkap nna pru wa ra ai. Raitim, “lup mat wa ai Petru” hte n bung ai sha, Yesu Hkristu hpe kam sham ai lam hpe lahkam mi pyi hkrat sum na ahkang n jaw ging ai. De a malai, anhte a prat hta byin nga ai nbung laru kaba lapran hta, matsan dum myit hte sumnung shingdi ai hku woi awn na matu jin jin rai nga ai Yesu hpe ngang ngang jum tek da ra ai. Yesu gaw anhte a simsa lam rai nga ai. Shi hta anhte asak hkrung, shamu shamawt, nga ra ai (Kasa 17, 28). Shi gaw simsa lam a matu hte simsa lam a matu tsun shaga ai nsen rai nga ai. Dai ni Shakawn Kungdawn sara hte rau shagrit shanem let tsun ga: “Madu e, na a matsan dum lama ai hpe anhte mu lu nna, na a hkye hkrang la ai karum shingtau lam anhte hpe jaw mi!”