Wa Sarabyin Leo gaw, Castel Gandolfo mare hta hkring sa la ngut ai hpang, August praw 5, bat masum Ya shani hta, shi a General Audience hpe bai galaw hpang sai. San Petru Nawku Htingnu hta zuphpawng nga ai wan hku law ai makam masham hpung masha ni hpe ga shaga let, Wa Sarabyin gaw, nawku daw jau akyu hpyi ai lam a ahkyak ai lam hpe madung tawn nna, ‘Constitution Sacrosanctum Concilium’ hte seng nna, matut nna sharin shaga ya nga ai.
“Kasa Pawlu hpaji jaw ai hte maren, anhte hpe akyu hpyi sharin ya ai gaw Chyoi Pra ai Wenyi nan rai nga ai” nga nna Wa Sarabyin tsun dat nga ai. “Pentekosti shani kaw nna, chyoi pra Wenyi gaw Nawku hpung hta nga nga nna, shi a magam bungli shagu hpe, grau nna akyu hpyi ai lam hpe shadut ya nga ai.” Dai aten kaw nna, Nawku hpung gaw “paschal a mungsung lam hpe galaw na matu, galoi mung n-gun jaw ai” ngu shi sadi hkrup ai.
Akyu hpyi ga gaw shi a tengman ai hkrang hpe bai mu tam ai
“Anhte a aten hta, efficiency-driven hte consumerist myit masa ni uphkang nga ai masa ni hta, akyu hpyi ai lam gaw lachyum n pru ai, kaji kajaw zawn rai nga ai” nga nna Wa Sarabyin matut tsun ai.
“Jak Hpaji hte hpung tang hpaji masa ni gaw mahtai yawng hpe jaw ya lu ai ngu tsun ai” mungkan hta, akyu hpyi ai gaw hprawng lawt ai lam langai zawn (sh) tinang a hkam kaja lam hpe yaw shada ai kaga myit masa ladat langai zawn sha rai na re. Raitim, akyu hpyi ai lam gaw, “shi a tengman ai hkrang hpe bai mu tam na matu manu dan ai” nga nna Wa Sarabyin ahkyak shatai tsun da nga ai.
Karai Kasang hte hkrum zup lu ai shara
Ndai ra kadawn ai lam hpe Tara Upadi Sacrosanctum Concilium gaw grai ahkyak la ai. Dai conciliar laika hta “akyu hpyi” ngu ai ga si gaw, nawku daw jau ai lam yawng hpe tsun mayu ai re ngu masat da ai. Ndai ningmu gaw dawdan lu ai lam rai nga ai, nga nna Wa Sarabyin sang lang dan ai, “hpa majaw nga yang, nawku daw jau ai lam hpe gram lajang ai lam hpe lam madun ya ai, kam sham ai ni a atsam rawng ai shanglawm ai lam hpe shi a madung npawt nhpang shatai ya ai”.
Liturgy hpe shawng nnan “Shi a Kasha hta shinggyim masha ni hte ni htep wa ai hta Karai Kasang a shawng lam, hkrum katut ai shara” ngu nna tang madun da ai.
Shani shagu na sak hkrung lam hpe shachyoi shapra ai
Bat shagu, shani shagu galaw ai Missa hte Liturgy of the Hours gaw “Nawku hpung a asak nsa rai nna, Chyoi Pra ai Wenyi hpe shi a Hkum hkrang hku hkawm sa shangun ai” nga nna Wa Sarabyin tsun da nga ai. Ndai akyu hpyi ga hta, Hkristu gaw “shinggyim masha ni a wuhpung wuhpawng ting hpe Shi hte matut mahkai nna, Shi hkum nan ndai Karai Kasang a shakawn kungdawn ai mahkawn hpe mahkawn hkawn ai hte matut mahkai ya ai”.
“Missa hkunnga hte matut mahkai nna, shi a nhtoi hpe galu kaba shangun ai, Liturgy of the Hours gaw anhte a shani shagu na prat aten hpe chyoi pra shangun ai,” nga nna Wa Sarabyin Leo gaw, akyu hpyi ai aten amyu myu hpe n tsun dan shi yang tsun ai: “jahpawt hta, anhte gaw makam masham hte chyeju dum ai myit hte shani hpe hpang wa ga ai; Vespers shana daw gaw jan shang ai aten hte rau rai nga ai, shana aten hta Karai Kasang a simsa lam hpe kam hpa let yup pyaw mat ga ai.”
Wa Sarabyin Leo gaw, “Hkying hkum shagu gaw myit mada shara a amu rai nga ai”, ngu nna ahkyak shatai nna, “Anhte mungkan ga hta hkawm sa ai aten hta, Madu a hpung shingkang hte bai du wa na hpe Nawku hpung ting hte rau ala nga ai” ngu ai hpe tsun let mungga hpe hpung dim dat ai.