Laika Hti Mayu Myit
Ramma langai a matu, laika hti ai akyang langai byin wa lu na matu, laika hti mayu ai myit rawng wa hkra, shawng nnan, shangai shaprat la ra na rai nga ga ai, laika hti ai ngu ai gaw, lam langai hku tsun ga nga yang, Sara Nnga Hkaja La Ai Lam ngu nna mung mai tsun nga ai, Sara ni hta hpaji sharin la na nga yang, shawng nnan, sharin manu, sara, ahkying aten hte, sharin mayu ai myit ni nga yang she mai na rai nga ai, laika hti ai ngu ai shara hta, laika buk, laika hti mayu ai myit hte ahkying aten kaji mi jaw lu ai hte hpring tsup nga nga sai mung rai nga ai.
Laika hti ai lam byin mat wa yang, laika nhti yang nmai ai akyang de byin mat wa na rai nga ai, dai zawn laika hti ai akyang hpe shani shagu galaw shaman wa na nga yang, Sara Nnga Hkaja La Ai lam hpe sak prat ting hta galaw sa mat wa ai zawn byin mat wa na rai nga ai,ndai zawn hka ja sharin la ai zawn byin mat yang, hpa ni byim wan a rai ngu ai ga san san na shara nga wa na rai nga ai.
Laika buk laika kata ni hta, laika ni hpe hti sumru ai lam kaw na sak prat ting a matu, sharin hka ja la nga ai ngu mung nshut nga ai kaji ai ten, asak ( 2 ) ning jan kaw na sharin hka ja ai lam ni hte sharin la nga ai wa nsi ai aten ni du hkra rai nga ai.anhte ni hta ntsa lam hku nna, sharin hka ja la ai lam ni hpe, tinang hte nseng ai zawn mu mada chye nga ai, kaja wa nga yang, anhte ni hta, sak prat ting hka ja la ai lam ni hte tsang gang nga taw na ngu ai gaw nmai byin nga ai, lu na sha na,bu hpun na ngu ai lam ni a matu, sharin hkam la ai lam ngu ai nnga yang, sak hkrung nga pra lu ai lam nmai byin nga ai lam hpe nchye ai majaw mung rai nga ai. Sharin hkam la ai lam nnga ai shani hte sharin hkam la ai lam nnga ai ni a sak prat gaw, si mat wa ai hte mung bung nga sana re ndai lam hpe laika nhti ai ni gaw nchye hkam sha lu nga ai, lai ka hti ai lam hpe anhte nang ngai shani shanang malu masha sha bang ai zawn sha, akyang shabyin ya ra nga ai, malu masha ni gaw, hkum gawng shingyan a matu, ra kadawn ai n gun atsam ni jahpring ya lu nga ai zawn, laika hti ai lam mung myit hkam sha lam a matu n gun atsam shatsaw ya lu nga ai lam ni rai nga ai hpe shadum n gun jaw mayu nngai.
Dai majaw kaji ai ten kaw nna, laika hti ai akyang hpe ladat jaw jaw galaw sa wa nga yang, kaba wa ai aten ni hta, n’galaw nmai magam lam langai hku myit kraw kata hta jung noi nga mat na mung teng sha rai nga ai, laika hti ai ni hta, laika hti ai ladaw hte tinang hka ja hti lai wa ai laikan hpan hta hkan nna, machye machyang ni hpring wa nna, myit sawn dinglik ai lam n gun natsam ni mung madu lu wa na rai nga ai, ndai zawn byin ai lam ni sha, laika hti ai lam a akyu ara ni rai nga ai, laika hti ai lam hta, aten jau ai hpang hkrat ai ngu nnga nga ai , nnan hpang mayu ai aten gaw aten kaja dik nan rai nga sai ngu nna mung n gun jaw mayu ga ai.
Laika hti ai lam galaw byin mat wa ai ramma langai gaw, sak hkrung hkawm sa nga pra lam ni mung kalang ta sharin hka ja la lu mat lu nga ai lam mung rai nga ai, masha langai a matu, nga pra sak hkrung lam ni hpe chye mat wa yang, sak prat hta, hpring tsup sai ngau nna mung mai tsun nga ai ndai zawn laika hti ai zawn nyak ai lam yan langai gaw, sak prat a matu, ahkrak shang lawm nga ai lam hpe chye na matu, madung lam yan gaw laika hti mayu ai myit rawng wa hkra shangai shaprat shaman la na ahkak ra nga ga ai ngu nna mung shadum mayu ai.
