Daini na Ja Chyum Mungga hpe hti sumru yu ai shaloi e, Mara galaw ai num sha hpe Yesu mara raw ya ai lam na la lu ga ai. Shiga madat nga ai nu wa hpu nau ni e, Madu Yesu gaw, grai nan tsawra ra kam hpa sharawng na zawn re ai Karai Kasang rai nga mali ai. Hpaw majaw nga yang e, shut hpyit mara lu ai ni hpe tut e hkap la chye ai wa nan re. Bai yawng a mara ni hpe mung hkyam sa mara raw ya ai wa Karai Kasang, bai nna, mara lu ai ni myit malai lu nna, shi Madu kaw bai n htang wa na aten hpe ala dingda nga ai Karai Kasang re.

Anhte shut hpyit mara kap ai ni, mara kaw na n lu tawt lai ai rai yang e mung, makau grup yin na singgyim masha ni gaw, amyu myu tsun jahpyak taw nga na teng sha rai nga ai. Raitim Madu Yesu gaw dai hku n rai nga ai. Shi gaw matsan dum lama ai myi hte yu mada nna, chye madat ya ai masin salum, bai hkap tau la chye ai lata hte ala dingda nga ai re. Shingrai mara kap ai ni anhte yawng mung, mara hkyam sa ya ai lang law law hkrum sha nga ai rai yang e, shi Madu Yesu hpe law law tsawra kam hpa nga na rai nga ga ai. Dai majaw grai tsawra kam hpa ging ai Madu Yesu kaw tut nawng kam hpa shingbyi let, kaja ai Hkritstan prat hte sak hkrung nga sa ga ngu ninggun jaw dat  ga ai.