Alam Wudang Bum, Myitkyina; September 14 Ya, 2026 Ning
“Karai Kasang gaw, machyi hkrum ai lam hpe Wudang a marang e, asak hte simsa lam a myit mada ai lam de gale kau ya ai.”
Hkristu hta tsawra ai hpunau ni e,
Dani, anhte yawng Madu Yesu a Chyoi Pra ai Wudang hpe hkungga shagrau na matu – Myitkyina Saradaw sasana ting hte seng ai, Alam Bum hta jun da ai Wudang kaba nhpang de, jawm du hpawng nga ga ai.
Nawku Hpung anhte hpe grai lachyum sung ai ga-san langai mi san nga ai: dai gaw, “Masha shagu, li la ai tinang a wudang ni hpe hpai taw nga ma yang, Wudang gaw shanhte a matu hpa lachyum pru a ta?”
De a mahtai hpe “Yawhan daw kaba masum, daw kaji shi-kru (3:16)” hta mu lu ga ai. Dai gaw: “Karai Kasang gaw mungkan ga hpe tsawra ai majaw, Shi a Kasha Shingtai hpe nan jaw kau wu ai,” ngu ai rai nga ai.
Dai majaw, Wudang gaw “Karai Kasang anhte hpe Kade daram tsawra nga ai” ngu ai Kumla rai nga ai. Ndai Tengman ai lam hpe daini anhte hkrum hkra nga ai ru yak lam ni hte shingdaw nna sumru yu ga!
- Anhte gaw anhte hkrum nga ai yu yak jam Jau, hkra-machyi ai lam ni hta pyaw dum nna, dai lam ni hpe arawng la shagrau ga ai n rai; Karai Kasang a tsawra ai hpe she shagrau ga ai.
Wudang hpe anhte yu dat ai shaloi machyi hkrum ai, kau da hkrum ai, mazut roi rip hkrum ai hte si ai lam ni hpe sha anhte mu ga ai. Hkristan ni gaw dai lam ni hpe shagrau ai n rai;
ga-shadawn,
-majan byin ai hpe kaja ai ngu nna n tsun ga ai;
-shada mazut daw-sa ai gaw Karai Kasang a myit ra lam re ngu nna n sawn ai;
– Dai hte maren, maga mi de n tara ai hte machyi hkrum ai lam ni hpe tem-si rai, a katsi sha hkam la ra ai ngu nna mung n yin la ga ai.
Daini anhte shagrau ai gaw Yesu shi a Wudang hku nna madun ai “Tsawra myit”hpe rai nga ai.
- Wudang gaw, masha hpe sat ai laknak langai mi rai nga ai; Yesu mahtang dai wudang hpe hkye hkrang la ai lam a laknak shatai dat ai.
- Wudang gaw, hkrat sum ai lam a kumla re; Yesu mahtang dai hpe “Awng Padang” a kumla de gale kau ya sai.
- Wudang gaw, masha si ai Shara re; Yesu dai hpe Bai hkrung rawt ai lam a chyinghka shatai ya sai.
Ndai gaw Hkristan ni a mungsung rai nga ai.
Bai Madu Yesu a Wudang anhte hpe shadum nga ai:
- Nhkru n kaja ai lam, mazut daw-sa ai lam, si hkrung si htan lam ni hta jahtum na ga-ningja n rawng ai;
- Karai Kasang hta she jahtum na ga-ningja rawng nga ai. Karai Kasang a jahtum na ga gaw “sak hkrung” ai lam rai nga ai.
Daini, anhte galaw nga ai Nawku Hpung a nawku daw jau ai lamang mung dai lam hpe shadan shaleng ya nga ai: “ Wudang hta nni nkri hte si ai lam gaw grai tsawm htap nga ai majaw Wudang hpe shagrau awlaw ga ai n rai; Karai Kasang a tsawra ai gaw ‘si- hkrung si-htan lam’ hta grau atsam kaba nga ai majaw rai nga ai.”
- Alam Bum ntsa na wudang gaw Wunpawng Sha ni hpe ga tsun nga ai.
Ndai wudang hpe sharawt mada yu ga. Ndai shara kaw nna yu dat yang, makau grup-yin tsan tsan de anhte mu lu ga ai. Bum lagaw kaw nna tsang hte tsang, grau tsaw ai de du magang, anhte a ningmu ni mung grau dam lada wa magang rai nga ai.
Ndai gaw Alam Wudang Bum a wenyi mu-jut langai mi rai nga ai. Anhte a myi ni hpe sharawt mada yu na matu saw shaga nga ai.
Anhte Wunpawng Sha ni Li la ai wudang ni hpe shaning law law, hpai wa saga ai:
majan nhpan, hpyen-yen IDP tai ai, bu htawt hkawm ra ai, hten za mat ai, matsan chyaren hkrum sha ai, dinghku masha ni hka bra ai, du na aten ni a matu myit tsang ai, hpaji lam hta dingbai dingna hkrum ai (jawng-ma ni jawng daw daw ai), kan bau bungli shamat kau ai, mazut roirip daw-sa ai hkrum nna, myit kraw lawang hta wunma kap ai, ndai zawn re ai lam ni law law hte hkrum saga ai.
Bai, Dinghku ni law law san ai, “Galoi du hkra naw hkam sharang ra na rai ta?”
Nkau mi ga, “Anhte jamjau hkrum nga yang, Karai Kasang gaw kanang wa nga nga a ta? Karai Kasang anhte hpe malap da sai kun”, nga nna tsun aput nga ma ai.
Wudang mahtang anhte hpe mahtai jaw nga ai; dai gaw –
Karai Kasang gaw shinggyim masha ni a jamJau jamhkau lam ni hte tsan ai shara hta n tsap nga ai. Shi hkum-nan, shanhte hte rau shang lawm ai. Yesu, shinggyim masha ni hpe grai pyaw ai shara hta nga taw nna n hkye la ai. Anhte a lapran de shi du sa ai. Anhte a mare lam ni hta hkawm nga ai. Hkap ningdang kau ai hpe hkrum ai. Roi rip zingrI ai hkrum ai. Shi mung hkrap ai. N Tara ai hku jeyang dawdan hkrum ai. Wudang hpai nna, dai hta si hkam sai.
Dai majaw, ma Kanu langai mi, shi a kasha mat mat yang, Kanu myi-pwi hkrat ai hpe Yesu chye madat hkam sha nga ai.
Kawa langai mi kasha hpe hkye na matu shakut ai shaloi, shi a hkrit tsang ai hpe Yesu chye ya nga ai.
Ramma langai ngai, shi a shawng lam hpe jahtum kau ya hkrum nna, hpawt-ni na aten hta hpa byin wa na kun, ngu nna mau ung-ang nga ai shaloi, Yesu dai ramma a myit kaji ai lam hpe chye madat hkam sha lawm nga ai.
Nta dinghku ni, shanhte lu hpai ai daram hpe sha, gun nna hprawng htawt hkawm ra ai shaloi, Yesu mung shanhte hte rau hkan nang nga ai.
Machyi hkrum ai masha shagu hpe, “Nang hkrai n re” ngu nna
Wudang shadum ai.
- Zaibru jang na Magri Lapu hkrang hpe mada yu ga.
Anhte shawng nnan na la sai Bu Hkawm Laika hta Israela masha ni, zaibru jang e hkawm sa ai lam hpe na la saga ai.
Shanhte pu-ba masai majaw myit kadun wa ma ai. Zaibru jang na wan lapu ni e achye hkrum nna machyi ma ai.
Shanhte shamai shatsai hkrum na matu, Karai Kasang gaw magri wan lapu hpe hpun-dung hta noi da na matu Moshe hpe shangun ai. Dai wan lapu hpe sharawt mada ai ni asak lawt lu ma ai.
Madu Yesu gaw, ndai mabyin hpe shi kaw sha-ang nna tsun ai: “Moshe gaw magri wan lapu hpe hpundung hta noi da ai zawn, Masha kasha mung ga kaw nna sharawt da ai hkrum na ra ai,” (Yawhan, daw kaba masum, daw kaji shi-Mali 3:14).
Yesu anhte hpe “sharawt mada na matu” tsun nga ai.
Anhte ru yak jamjau lam ni hte hkrum wa ai shaloi, myit kaji myit daw nna baw gum nga mat chye ga ai. Hten za mat sai ni hpe yu ai, machyi wunma ni hpe yu ai, n tara ai lam ni hpe yu ai, nju ndawng myit rawng wa ai, myit mada lam n nga ai hpe yu ai.
Dai shaloi, Yesu mahtang “Baw sharawt nna mada yu u” nga nna anhte hpe tsun nga ai. Lahta e tsun sai lam ni gaw kaja wa teng teng byin nga ai lam rai nga ai.
Rai tim, Wudang gaw dai hta jan ai, grau tsan ai ningmu hpe jaw nga ai.
- Wunma ni kaw nna shamai shatsai ai de,
- Nju ndawng ai kaw nna shada da bai htingram ai de,
- Majan kaw nna simsa lam de,
- Si ai kaw nna bai hkrung rawt ai de,
- Myit htum ai kaw nna myit mada lam de chyan yu na matu tsun nga ai.
Dai majaw, ndai anhte a Alam Wudang Bum gaw grai ahkyak nga ai. Anhte Wunpawng Sha ni, anhte a makau group-yin hta byin nga ai manghkang ni hpe sha, n yu mau nga ai sha, Hkristu hpe sharawt madu yu nna, shawng lam prat nnan hpe jawm tam sa wa na matu n-gun jaw nga ai.
- Wudang gaw “mazut daw-sa ai lam” hte nhtan shai nga ai.
Wudang ntsa na anhte asan sha na la ra ai lam langai mi naw nga ai; dai gaw, mazut -dawsa ai lam hpe shagrau awlaw ai lam n galaw na matu rai nga ai.
Wudang ntsa Jen noi si hkam ai Yesu a man e, anhte put-di nga ga yang, masha law law sat kau hkrum nga ai hpe hpa zawn n nawn ai lam n mai nga ai.
Wudang hpe anhte pup nga yang, nju ndawng ai ngu ai gaw anhte a salum na ga-si n mai byin ai.
Anhte Wudang kawan akyu hpyi ai shaloi wudang hpe hpai ga ai rai yang, shada htingram hkat ai ngu ai lit hpe mung gun hpai da ra ga ai.
Wudang gaw, “Ngai simsa lam de du lu hkra, nye a hpyen ni hpe a grawp kau ra ai” ngu nna kam ai masha shagu hte wuhpung shagu hpe ninghkap nga ai.
Yesu madun ai lam gaw kaga rai nga ai.
Mazut daw-sa ai hpe grau laja ai daw-sa lam hte n tai ai,
Nju ndawng ai lam hpe tsawra ai hte awng dang ai,
Matai htang ai hpe mara dat ya ai hte awng dang ai,
Si-hkrung si-htan hpe asak hte awng dang ai.
N tara ai lam hpe yu shalai kau ga ngu ai n rai. Jet ai simsa lam hpe lu na matu teng man ai, Tara rap ra ai, lit la chye ai, shamai shatsai ai hte shada htingram ai lam ni lawm ra nga ai.
Wudang sharin ai gaw:
Tara rap ra ai gaw matai htang ai de n mai gale mat ai;
simsa ai hpe nju ndawng ai hte n mai gaw gap ai.
Wudang gaw masha a myit sawn shachyaw ai hte shai nga ai.
“Myi a matu myi, a sak a matu asak” ngu ai gaw masha a sawn hpan ai rai nga ai. Yesu bai sharin ya ai gaw, “Na a hpyen ni hpe tsawra u. Mara raw ya u. Htingram u. simsa lam tsun u” ngu ai rai nga ai.
Anhte gaw:
- Shada prat tup hpyen tai nga na matu hpan da hkrum ai n rai,
- Anhte a mungdan hpe – “shanhte” “anhte” ngu nna garan ginhka nga na matu masat da ai n rai,
- Anhte gaw shinggyim dinghku langai sha rai ga ai,
- Anhte a lapran hta n bung ai Amyu lakying ni, htunghking hte ga ni, Labau Lara ni, n bung ai mung masa ningmu hte hkam la ai lam ni nga na re. Raitim, dai ni yawng a npu e – “Shinggyim masha shagu gaw Karai Kasang a hkrang sumla rai nga ai” ngu ai tengman lam nga nga ai.
- Ngai hte myit n hkrum ai wa mung Karai Kasang a kasha rai nga ai.
- Anhte a wuhpung hte shai ai wuhpung na masha ni mung shinggyim masha ni rai ma ai.
- Hkristu gaw “anhte Amyu ni” a matu sha si hkam ai n rai; Yawng a matu si hkam sai rai nga ai.
- Wudang hte Ramma ni
Tsawra ai ramma ni e, nanghte hpe alak mi n-gun jaw shadum mayu nngai. Nanhte gaw, nanhte a shawng lam yup-mang shingran ni hpe jahtum kau ya hkrum ai aten hta kaba wa ai ni rai nga myit dai.
Nanhte hta na nkau mi, nga shara n lu mat ai, nkau mi, hpaji lam mahkrun daw mat ai, nkau mi tinang tsawra ai ni n nga mat ai, nkau mi masha shada mazut daw-sa ai lailen ni a grup-yin e kaba wa ra ai.
Raitim, daini ngai nanhte hpe tsun mayu ai gaw:
Majan gaw nanhte a prat ban a masat dazik n tai u ga.
Nanhte gaw, mazut daw-sa ai lam hta grau myit dai.
Nanhte hkam sha ai wunma ni hta grau myit dai.
Nanhte a hkrit tsang ai lam ni hta grau myit dai.
Nanhte gaw, Karai Kasang a tsawra ai kasha ni rai nga myit dai.
Yesu a Wudang tsun nga ai:
Daini byin nga ai mazut ai lam ni gaw nanhte a shawng lam hpe n dawdan ya lu ai. Nanhte gaw Myanmar Mungdan Ningnan hpe gaw gap ai ni tai wa na re.
Sara/ Sarama, tsai-du, engineer, Jau, Brother, Mama, Mung up du, shingni, sut hpaga hte simsa lam gaw sharawt ai ni tai lu na myit dai.
Grau nna, shada da htingrai htingrat let, simsa lam gaw gap ai num- sha /la-sha ni rai myit dai.
- Nju ndawng ai lam hpe wunli hkum shatai; makam masham hkringhtawng hpe dagraw mu.
- Matai htang ai lam hpe hkum hkam la; magrau grang ai hpe hkringhtawng dagraw mu.
- Lai sai ten na wunma ni hpe du na aten ni a matu laknak hkum shatai mu. Dai wunma ni hpe simsa lam a mahkrai she shatai mu.
- Wudang hte Myanmar Mung Nawku Hpung
Daini na aten hta, Wunpawng Buga Kahtawlik Nawku Hpung hte Myanmar Mung ting na Kahtawlik Nawku Hpung gaw –
Ru yak kyin dut hkrum nga ai hpunau ni hte rau Wudang nhpang e tsap ra ga ai.
Nawku Hpung gaw shinggyim wuhpung wuhpawng a machyi madai ai hpe n mu n chye ai zawn n mai da ai.
Nawku Hpung gaw matsan mayan ai ni a nsen hpe madat ya ai Nawku Hpung rai ra ai.
Shanhte hpe Manang tai ya ai, shamai shatsai ya ai, kraw si ai hpe daw jaw ai, ma kaji ni hpe hpaji sharin ya ai, masha a sari shadang hpe makawp maga ai, Simsa lam a matu tsun shaga ya ai, hka bra nga ai wuhpung ni hpe ma hkrai tai ya ai Nawku Hpung tai nga ra ai.
Nawku Hpung gaw masha shagu a prat hta gun hpai nga ai lit ni hpe la kau ya lu na gaw n rai tim, shanhte myit mada ai lam n mat mat ai sha, dai lit ni hpe gun hpai lu hkra gaw garum ya lu ai.
Kalang lang gaw, masha ni shada da a ntsa, n jaw n tara ai hku shagun hkat ai lit (wudang) ni hpe gun la kau lu hkra gaw garum ya lu nga ai. Dai gaw anhte galaw ra ai sasana bungli a daw chyen rai nga ai.
- Hkristu a lam gaw shagrit shanem ai lam rai nga ai
Lahkawng ngu na Chyum Mungga, Hpilipi masha ni hpang de shagun ai laika hta Yesu a lam hpe tsun dan da nga ai.
“…Shi gaw tinang dai Shakawn kau nna, mayam a ahpraw nsam dagraw let, shinggyim masha hte bung hkra tai wa sai .”
Dai majaw, Wudang gaw Ningbaw Ningla hte seng ai lam hpe mung sharin ya nga ai.
Yesu gaw ga-up gamyet, adip arip ai ladat hte lam n woi ai; daw jau ai amu hte lam woi ya ai.
A dip arip shadut jahkat ai hku awng padang hpe n la ai; shi hkum hpe ap nawng kau ai.
Machyi, dip da hkrum nga ai shinggyim wuhpawng a ntsa e shi n tsap ai; shanhte a kata de shi shang nna shanhte hte rau rai nga ai. Ndai kasi hpe daini, Myanmar mungdan hta ra nga ga ai.
Daini na anhte a shinggyim wuhpawng hta, “Ngai daru magma ahkaw ahkang kade lu na rai” ngu nna san ai ningbaw ni hpe anhte n ra ga ai; “Ngai kade mi lu daw jau na i” ngu ai ni hpe ra nga ga ai.
“Kaga wuhpung ni hpe gara hku dang manga kau Lu na kun” ngu ai ni hpe n ra ai; “Anhte a mungdan hpe gara hku tsi shamai lu na kun” ngu nna san ai ni hpe ra ga ai.
Wudang anhte hpe tsun ai gaw:
Jaw ai galu kaba lam gaw dawjau ai;
Jaw ai atsam gaw ap nawng kau ai lam re;
Jau ai ningbaw ningla gaw lit la gwi ai lam re;
Jaw ai Awng Padang gaw shada htingrai htingrat, htingram hkat ai lam rai nga ai.
- “Karai Kasang gaw Mungkan Ga hpe tsawra wu ai”
Daini na Kabu Gara Shiga hta, “Karai Kasang gaw Mungkan Ga hpe tsawra wu ai” nga nna Yesu tsun ai.
Amyu lakying langai hpe sha n rai; mungdan langai mi sha mung n rai; Shi hte htuk ai, myit hkrum ai ni hpe sha mung n rai – “Mungkan Ga hpe” tsawra wu ai.
Mungkan ting hpe, Masha shagu hpe, Amyu lakying shagu hpe, Amyu Ga shagu, Kun dinghku shagu hpe,
Ma kaji shagu hpe, Machyi hkrum ai masha shagu hpe, Hpyen yen shagu hpe, Hpyen la shagu hpe, Tara jawat hkrum ai marai shagu hpe, Myit mada lam shamat kau sai marai shagu hpe, Karai Kasang shanhte yawng hpe tsawra Wu ai.
Dai majaw, Wudang nhpang e anhte kaja wa tsap nga ga ai rai yang, nga yawng nga pra hpe tsawra ai, ninggawn tawa hte seng ai Karai Kasang a tsawra myit gaw anhte a salum ni hpe kaba wa shangun ra ga ai.
- Wudang gaw Simsa lam de mahkrai tai ya ai
Tsawra a hpunau, shu/sha ni e,
Ya hpang de, anhte a shu/sha ni Alam Bum na Wudang hpe yu nna, byin lai wa sai majan nhpan ni hpe bai dum shingran let, “anhte a Amyusha ni machyi hkrum nga ai aten hte ndai wudang nang e tsap let sakse tai ya sai zawn, Mara dat ya chye ai lam hpe mung dai kaw na sharin la saga ai” ngu nna tsun na mara ai!
“Ndai wudang anhte a yawn myi-prwi si ni hpe mu ya sai; dai hte maren, simsa lam a ningpawt mung rai nga ai” ngu nna mung tsun na ma ai nhten!
Alam Bum na Wudang ndai gaw Shada htingram nna bai hku hkau wa ai lam a wudang tai nga u ga.
Shamai shatsai ya ai wudang rai u ga.
Simsa lam a wudang rai u ga.
Wunpawng Buga hte Myanmar Mung ting a myit mada shara Wudang tai nga u ga.
Tsawra ai hpunau ni, shu/sha ni e,
Hpungdim hku nna htet da mayu ai gaw: Anhte a myi ni hte Wudang hpe sharawt mada yu ga!
Nanhte a hkrit tsang lam ni hpe Wudang nhpang de la sa mu.
Machyi wunma kap ai nanhte a kun dinghku ni hpe woi sa mu.
Dum nta shingbyi shara n lu / hpyen yen hkawm nga ai ni hpe woi sa mu.
Si mat wa sai ni hpe woi sa mu. Mat taw nga ai ni hpe woi sa mu.
Shawng lam myit mada shara n nga ai ramma ni hpe woi sa mu.
Wunpawng Buga (Kachin State) hpe woi sa mu.
Myanmar mungdan hpe woi sa mu.
Majan a majaw, shada daw-sa ai lam ni a majaw, hka bra, daw hka nga ai shinggyim wuhpung wuhpawng ni hpe woi sa mu.
Anhte yawng a matu Yesu tsun ai ga hpe bai madat yu ga:
“Karai Kasang gaw, Shi a Kasha Shingtai hpe jaw kau ai du hkra, mungkan ga hpe tsawra wu ai.”
Wudang mung anhte hpe tsun nga ai:
Tsawra ai gaw nju ndawng ai hta Grau n-gun Ja nga ai.
Matsan dum lama ai gaw matai htang ai hta Grau n-gun rawng nga ai.
Myit mada ai lam gaw myit htum ai hta Grau atsam rawng nga ai.
Asak gaw si- hkrung si-htan hta Grau atsam rawng nga ai.
Dai majaw, Wudang hpe majoi yu chyai ai hku n rai ga; wudang hpe asak jahkrung ga:
Mara dat ya lu ai ni tai ga.
Shada htingram hkat ai ni tai ga.
Dawjau ai ni tai ga.
Simsa lam a mahkrai tai ga.
Alam Bum na Wudang ndai gaw anhte a ginra buga a matu “Myihtoi kumla” tai nga u ga law.
Kasha Yesu a Wudang lagaw nhpang e yawn let tsap nga ai Hkawn-sek Maria mung – Kachin, Wunpawng Amyusha ni hpe shanhte a machyi hkrum ai lam ni hta manang tai ya nga u ga.
Wudang hta si hkam nna hpung shingkang hte bai hkrung rawt wa sai Madu Yesu mung, Jinghpaw mungdaw hpe shaman ya u ga; Myitkyina mare hpe shaman ya u ga, Myanmar mungdan ting hpe shaman ya u ga. Majan kaw nna simsa ai, Tara rap ra ai, shada htingram ai hte asak ningnan ngu ai nhtoi de woi wa ya rit ga.
Na a Wudang a marang e, mungkan ga hpe hkye la sai majaw;
Hkristu e, Nang hpe anhte nawku shakawn ga ai law. Amen.
Alam Wudang Bum gaw shadawn shadang tsaw de pre ( 2800″ ) tsaw ai shara rai nga ai.
