Daini na Ja Chyum Mungga hpe hti sum ru yu ai shaloi e, Yawhan a lam Yesu sakse hkam ai lam na la lu ga ai. Dai ni na kabu gara shiga hta e, aten ladaw hte mabyin lam yan ni hpe n chye hti la ai masha unawng ni a lam hpe tsun dan da nga ai. Dai mabyin lam ni gaw, lu sha gam ra ai ten hta lu sha gam na, kabu pyaw hpa poi lam ni galaw ra ai ten hta, dai lamang ni hpe galaw sa na matu saw shaga nga ai. Kasa Yawhan Baptista gaw, lu sha gam ap nawng daw jau ai lam hpe galaw nna, Madu Yesu du sa na lam hpe hkyen lajang na matu tsun ai shaloi, shi hpe Nat hkyung ai wa ngu tsun ma ai.

Madu Yesu a aten hta e, mara kap ai ni myit galai wa na matu hte, bai shanhte hte arau lu sha ai shaloi e mung, lu lai sha lai ai wa ngu tsun ma ai. Nu wa ni e, Anhte masha shagu kaw e, chyoipra ai wenyi Karai Kasang gaw, amu galaw nga ai. Ganing re ai aten ni hta gara hku tsun na, gara hku hkan sa na, ngu ai lam hpe e, Chyoi pra ai wenyi gaw shadut ya nga ai re. Shingrai Myen ga malai nga ai, chye ai ni gaw shaw sha, n chye ai ni gaw lai mat, nga ai hte maren, hkye la Madu Yesu hpe n chye dat ai wa gaw, chyeju kum hpa ni hkam la lu na n rai nga ai law.