Daini na Ja Chyum Mungga hpe hti sumru yu ai shaloi e, Chyinghkrang tum ga shadawn hte Matsi ga shadawn ni hpe na la lu ga ai. Chyinghkrang tum gaw, hkai tum ni mahkra hta na kaji dik nli tum rai nga tim mung, tu kaba wa ai shaloi e gaw, U numji ni law law sa hkring sa la lu hkra, akyu rawng nga ai. Dai hte maren sha matsi mung, shadung muk hpe bai shalaw jahtam ya lu ai atsam rawng ai rai nga ai. Dai zawn sha lahpawt ai myit n nga ai sha, kaga wa hpe, kanoi hpun tum ram sha Alu jaw ai raitim, kanoi hpun kaba daram bai kaba la ai gingdan ai chyeju ni bai hkam la lu na gaw teng sha re ai hpe Madu Yesu shadum ya nga ai.

Dai gaw anhte galaw daw jau dat ai Alu n law la ai kaji sha gaw, anhte hpe kaba la ai chyeju ni bai hkam la lu ai lam hpe madi madun ya nga ai. Dai gaw anhte galaw ai kaji la ai amu gaw, Karai Kasang chyeju hte, kaba dik ai chyeju ni anhte bai hkam la lu ai nan rai nga ai. Shingrai shiga madat ni e, Madu Karai gaw anhte a lahpawt ai myit n nga ai shawang tsawra myit hte, jaw lu jaw sha ai hpe grai nan ra sharawng nga ai. Dai majaw anhte hpe htam latsa ging dan ai shaman chyeju ni bai jaw ya nga ai re. Shingrai anhte yawng gaw, makau grup yin hta e, kaga masha ni a matu akyu jaw ya lu ai ni byin hkra asak hkrung nga sa ga law.