Readings: 1st: Ex 22, 20-26; Ps 17; 2nd: 1Thes 1, 5-10; Gos: Mt 22, 34-40
Daini gaw, pranwan ladaw hta, sumshi ngu na Laban shani rai nga ai. Dai ni nawku hpung gaw ahkyak dik htum ai Karai masa sari sadang rai nga ai tsaw ra myit hpe shadum ya nga ai. Grau nna, Yesu gaw tsawra myit ngu ai lahkawng hpe jaw ya nga ai. Karai Kasang a vertical tsawra myit hte htingbu wa a horizontal tsawra myit. Ndai lam ni hpe hkum tsup hkra sak hkrung ai shaloi, nang, ngai gaw Hkristan langai mi hku nna kaja wa sak hkrung sai ngu nna, asan sha tsun lu na re.
Dai ni na daw 1 hta, Mawshe hku nna Karai Kasang anhte hpe sadi jaw da ai gaw: “Maigan masha hpe hkum roi rip, hkum dip sha…gaida jan hte ma n lu ai ni hpe hkum zingri zingrat.” Teng sha nga yang, dai zawn galaw ai lam ni gaw, dip gamyet sha ai wa a ntsa de shi a pawt sindawng ai hpe hkap la na re ngu Karai Kasang shadum ya nga ai. Dai majaw, ndai kaw sharin la lu ai lam gaw, kaga masha ni hpe tara rap ra ai hku, tsawra myit hte kanawn mazum ra ai lam re. Karai Kasang gaw grau nna n-gun kya ai ni, matsan mayan ni, makawp maga lam n nga ai ni hpe dip gamyet sha ai lam hte n tara ai lam ni hpe matsat nga ai.
Daw Lahkawng hta, Pawlu gaw Htesaloni hpung masha ni hpe moi na tara maigan masha ni hku nna nga lai wa sai lam hte kabu gara shiga a atsam hte gara hku lawt lu wa ai lam ni hpe shadum ya nga ai. Shanhte hpe lawt lu shangun ai gaw Karai Kasang shanhte hpe tsawra ai kumla rai nga ai. Shanhte kabu gara shiga hpe hkap la ai lam gaw Karai Kasang hpe tsawra ai kumla hte maren sha rai nga ai. Shingrai, shanhte a shakut shaja ai lam hpe Pawlu shakawn let, Madu du sa ai ten du hkra tsawra myit hte hkam sharang nga na matu n-gun jaw lai wa sai.
Dai ni na kabu gara shiga hta, Hparishe ni gaw Hkristu hpe kaga “yak hkak ai” ga san langai mi hpe san ma ai: “Sara e, tara hta gara hkang da ai ga gaw kaba dik htum rai ta?” Shawoi na zawn, shi hpe chyam dinglik na matu re. Dai ni Yesu a mahtai hpe atsawm sha yu yang, Yesu gaw tsawra myit a vertical dimension hpe anhte hpe madun dan ai hpe mu lu ai: “Na a Karai Kasang Madu hpe na a wenyi mahkra hte nang tsawra lu na ndai….” Karai Kasang hpe hkum hkrang wenyi hte tsawra na matu, sak jaw ai lam law law hte shagrit shanem ai lam law law ra ai hpe dum ra ai. Karai Kasang hpe tsawra na matu gaw shi zawn byin na matu ra kadawn ai lam langai re.
Tsawra myit a lahkawng ngu na daw gaw, (horizontal) rai nga ai: “Na a htingbu wa hpe na a hkum hte maren tsawra ra na kun?” Ndai lam gaw shawng na hta grau yak ai. Ndai lam gaw anhte n gawn n sawn di nna, manu n shadan ai majaw re. Dai gaw htingbu wa hpe n tsaw ra ai sha Karai Kasang hpe chyu sha tsaw ra lu ai na n re ngu ai myit masa rai nga ai.
Dai majaw, Hkristu gaw ndai hku shadum nga ai: “Ngai Karai Kasang hpe tsaw ra nga nngai, nga nna kadai raitimung, shi a hpunau wa hpe n dawng n yawt ai wa gaw, masu ai wa rai nga ai: kaning rai nme law, shi mu lu ai hpunau wa hpe n tsaw ra ai wa gaw, shi n mu lu ai Karai Kasang hpe tsaw ra lu na n rai” (1Yh 4, 20). Dai majaw, Karai Kasang hpe tsawra ai lam hpe kaja dik htum tsun dan lu ai gaw, htingbu ni hku nna rai nga ai. Karai Kasang hpe atsawm sha tsawra lu na matu kaga masha ni hpe kaja ai hku galai shai shangun ra ai.
Dai majaw, tsawra myit a lam tsun shaga ai hta, tsawra myit hpe nta kaw nna, htingbu wa, manang ni, makau grup yin na ni kaw nna hpang ra ai. San Augustine anhte hpe hpaji jaw nga ai; “Tsaw ra ai hte nang ra sharawng ai hku galaw u. Nang atsin sha nga nga timung, tsaw ra ai hku nna, atsin sha nga nga u; nang jahtau nga ai rai yang, tsawra ai hku nna jahtau nga u, nang sharin achyin nga ai rai yang, tsaw ra ai hku nna shading sharai nga u, nang matsan dum ai rai yang, tsaw ra ai hku nna matsan dum nga u. Tsawra myit a ru gaw kata kaw N nga u ga, dai ru kaw na kaja ai hpa mung n pru lu na re.” Karai Kasang hpe nawku daw jau ai hte tsaw ra ai lam gaw anhte a htingbu htingbyen ni a marang e rai nga ai majaw dai gaw teng man nga ai. anhte a simsa lam hte tsawra myit hpe mu lu jang karai kasang hpe mu lu na re.
Hpang jahtum, ngwi pyaw simsa ai hku nga pra na matu lata la ai ni gaw tinang a htingbu wa hpe ngwi pyaw simsa ai hku nga pra lu na matu garum shingtau la ra ai. Kaja ai hku sak hkrung na matu lata la ai ni gaw kaga masha ni hpe mung kaja ai hku sak hkrung na matu karum ya ra ai. Masha langai a prat a manu hpe, dai prat gaw kaja ai galai shai shangun ai prat ni hpe yu nna shadawn ai. Dai majaw, shakawn kungdawn sara hte rau, “Nye a n-gun atsam Madu e, ngai nang hpe tsawra nga nngai” ngu nna ndau shabra ga.