HTAI YA AI WA – Wa Jau Joseph Gawlu Yung Wa
GA SAN – Num ni hpung n bung ai hte ding hku de yang, la wa hpa hpung rai yang, num ni gaw dai la wa na hpung de shang lawm ra ai nga. Hpung n bung ai lam tsun hkat yang, kadai na n-gup kaw na rai tim, anhte Kathtawlik Nawku Hpung masha ni a n-gup kaw na rai tim, dai hku hkrai tsun tsun re ai hpe na lu ai.
Dai majaw, Wa Jau e, dai hku chye tsun ai ni hpe gara hku bai htang tsun ai baw re kun? Hpa majaw dai ga hte hkrai tsun na shadang la ma ai kun? Dai ga gaw kadai wa shawng tsun ai kun? Kalang lang gaw myit n galu wa na zawn nga wa ai.
Dai majaw, ndai lam hpe ngai zawn n chye na ai ni mung chye na la lu na matu naw tsun lam madun sang lang dan ya rit.
Fransica Jangma Bawk Ja e,
Kahtawlik Nawku Hpung a (Canon Law) Tara matsun hta – Kahtawlik num/la hte Kahtawlik n re ai num/la hkungran ai hpe tara shang Sacramentu Chyeju Kumla hku nna masat ai. Dai gaw -shan hkam la da sai Kashin Kamun hkam ai / Hkalup hka ai ngu ai Baptisma a majaw rai nga ai; raitim, seng ang ai Saradaw kaw na ahkang ra ai.
Bai Kahtawlik num/la gaw shan a kasha ni ma hkra hpe Kahtawlik makam masham htung tara hte maren bau kaba na, ngu nna gasadi da ra ai.
Dai hte maren, Kahtawlik n re ai kaga Hkristan wuhpung ni mung shanhte a masat da ai tara nga na re. Dai gaw, tinang a hpung masha ni a wenyi lam hta makawp maga ya na matu rai na re. Ya, Bawk Ja san ai hte maren, numsha ni gaw lasha ni a hpung maga de hkan ra ai ngu ai gaw de n pu e rai chye nga ai. Wunpawng a htunghkying (masha a htung) hku tsun ai mung rai na re.
Bai, Kasa Pawlu Ehpesu masha ni hpang de shagun ai Laika hta mahta nna tsun ai mung mai byin nga ai. 5:22-23 hta ning nga tsun da nga ai:
“Numsha ni e, dai Madu hpe daw nga ai zawn, tinang madu wa a hkang ai hku hkan nga mu: kani grai nme law, Hkristu gaw dai Hpung a baw rai nga ai zawn, dai madu wa mung madu jan a baw rai nga ai: Hkristu shi hkum nan dai hkumhkrang a Hkye hkrang la ai Madu rai nga ai.”
Ndai chyum mungga daw gaw, hpung makam masham hte n seng nga ai; dinghku kata shada hkrit hkungga madat mara tsawra hkat ra ai hpe ngu mayu ai re.
Hpang jahtum hku nna, Kahtawlik nawku Hpung hku nna gaw “numsha ni lasha ni a hpung/makam amsha de hkan ra ai ngu nna tara n jahkrat da ai; shada hkungga lara myit tau chye ra ai lam hpe sha sharin ya ai, ngu nna htai ya dat lu ai.
San ai wa – Momawk Jau Ginwang, Goi Kahtawng, Zaibru Yang kaw nga nna, ya, sumtsan kaw du taw nga ai Fransica Jangma Bawk Ja
