Tsawra hkungga ni nu wa hpu nau ni anhte a prat hta shani shagu byin nga ai mabyin ni hta anhte tsun shaga kanawn mazum ai lam hta byin chye ai mabyin langai nga ai dai gaw anhte shada da mara shagun hkat ai lai kyang htung rai nga ai.

Anhte ndai mara shagun chye ai lai kyang htung ni hpe matut ai lam dawm kau lu na matu gaw anhte ma kaji ten hta grai ahkyak nga ai .Masha kaba ni galoi mung mara shagun taw nga ai ngu ai gaw shanhte a prat hta ndai lai htung ni hte  kaba wa  ai majaw shut ai lam hpe jaw ai shadu nna dai hpe sha bai kahtap kahtap rai nna galaw nga chye ga ai.

Mara shagun ai lai len gaw  mabyin langai hta myit maju jung na malai shut ai lam hpe sha maju jung nna pawt a ngwun tsun chye nga ai lam rai nga ai.Anhte a kashu kasha ma ni a matu kaji ai ten kaw nna na taw nga ai mara shagun ai ga hpe  ga shadawn hku nna tsun ga nga yang  kashu kasha ni a majaw ndai rai ga mat sai, nanhte a majaw Ah Nu yup gan gan ra ai,nanhte a majaw kanu kawa grai pu pa ai, nang gaw ashawng daram, Kanau dara nbyin ai, grai anya ai, nang gaw grai machyi ja ai, nang gaw ga nmadat ai, grai ningdang ai, kanu kawa tsun ga nmadat ai majaw rai nga ai ngu ai ga ni gaw kanu kawa ni a matu rit kawp tara ni jahkrat ai, akyu ara hpe jaw ai ngu tsun mai tim mung, bawnu myit nyan machye machyang nbawng ring shi ai ma ni a matu gaw  ndai gaw “Ngai hkum nan gaw Manghkang kanu wa re ngu ai myit hkam la chye ai.

Anhte kashu kasha ni a prat hta Mara shagun ai htung lai len gaw gara hku akyu du hkam ra ai a ta?

Ndai Mara Shagun ai ga ni gaw shanhte a myit kraw kata na n sen byin wa chye ai. Anhte gaw mara shagun dat ai hte  ma ni hpe lit la chye ai, chye na mat na re ngu shadu chye ai. Kaja wa nga yang myit tsam pu ai lam ngu ai  myit n ngang grin ai myit kahpra ai hte  hkrit ai lam ni sha law jat na rai nga ai.

Anhte kashu kasha ni gaw kanu kawa ni hpe shim lum la jaw ya ai ni, dum nta hte  dinghku masha ni hpe shimlum lam jaw ya ai shanhte a shara ngu nna masat ai lam n nga ai wa chye ai.Ndai ten ma ni gaw hpa lam ni hta mung kanu kawa ni hpe ntsun sai, jahkrum bawngban ai lam ni nnga sai, lagu galaw ai, kanu kawa hta grau nna jasam ni hpe grau hku hkau hkam hpa mat chye nga ai.

Ma prat ten hta nga yang mung myit hkam sha lam ni hpe atsawm sha nlu hparan ai, ra ai hta grau nna hkam sha lam hpe hkang ai, masha ni ra ai hpe galoi mung hkan nang ai ni hku nna kaba wa chye nga ai.

N kau ni gaw lahta na lam hte  shai ai lam rai nga ai masin grai pawt loi ai, kaga masha wa hpe ladu shalai mara shagun chye ai ni hku nna kaba wa chye nga ai. Anhte a kashu kasha  ma ni gaw anhte kanu kawa ni hpe hkum hkrang myit masin shim lum lam hpe jaw ai madi shadaw ya lu ai ni hku nna she ra kadawn nga ma ai.

Aten shadu grai dan dawng ai hku nna mung ndan dawng  ai hku nna mung mara shagun hkam nga ra ai ma ni gaw anhte kanu kawa ni a ntsa myit ndun mat ai, jahkrit shama ni kanu kawa hku nna hkam sha chye nna, kanawn mazum lam hta mung nhtuk wa chye nga ai.

Anhte kanu kawa ni law malawng hpa majaw mara shagun chye ai kun?

Anhte kadai kanu kawa ni mung yaw shada lam nga nga hte tinang a kashu kasha ni hpe mara shagun ai lam gaw nrai nga ai. Shanhte mung dai masa lam hku nna sha kaba wa ai majaw byin chye ai rai nga ai. Kanu kawa ni hku nna kun dinghku sut masa lam zawn re lam hta n hpri nem ai majaw pu ba ai majaw mung byin chye nga ai.Ma ni hpe myit ra hkrai hkan ya ai, kanu kawa a majaw kashu kasha ni myit nsu ai hten ai nga nna tsun hkrum na hpe tsang ai lam mung lawm na re.

 Lai htung hte maren kashu kasha ni gaw kanu kawa hpe hkrit hkra tawn da ya she ga madat na re ngu ai lai htung ni a majaw mung mai byin ai.

Anhte kanu kawa up hkang ai ni hku nna mara shagun ai ga tsun na malai gara  hku tsun shaga galaw ra na kun?

Anhte kanu kawa up hkang ai ni hku nna kashu kasha ni a ntsa sha n ga, dum nta masha ni yawng hta mung mara shagun tsun shaga ai lam hpe mai byin ai daram jahkring kau yang grau kaja nga ai.Anhte kun dinghku dum nta masha  shada da langai hte  langai mara shagun hkat ai,mang hkang langai byin wa jang hparan na matu shawng n myit ai sha kade majaw re ngu mara shagun ai lam ni hpe shawng shajin ga  ai.

Ma a majaw mang hkang langai byin shagu akyu ara hte seng nna sha madung da tsun ga. Hpa majaw n galaw mai ai, galaw dat ai majaw byin chye ai lam ni zawn re ai hpe sha tsun bawngban ai lam galaw nna rit kawp tara jahkrat ya ga.Mara shagun ai ga hpe ntsun yang kaja ai.

Anhte kashu kasha ma ni gaw myit masa hpe hkang ai lam nlu galaw shi ai majaw shanhte a hkam sha lam hpe shanhte atsawm sha nchye nga ai. Anhte kanu kawa ni tsun dan nna myit sim ngang grin hkra shawng asawng ra nga ai.

Ma a majaw mabyin lam langai ngai byin wa ai shaloi, kadai galaw dat ai, hpa majaw galaw dat ai ngu ai ga san ni  san na hta hpabaw byin wa sai rai, hpa ni byin wa ai rai ngu ai ga sa ni hte shawng sit shang ra nga ai.

Anhte kanu kawa ni gaw shinggyim masha re majaw shut ai lam hpe galaw chye nga  ga ai.Raitim mung shut ai hpe chye jang ma hpe bai tawngban chye ai lai kyang hpe mung galaw ya ra nga ai.Dai gaw ma a prat a matu kaja dik ai kumla langai hpe galaw ya ai lam rai nga ai.

Anhte a Ma ni shut ai hpe galaw hkrup ai shaloi mara shagun ai lam n galaw ai sha ma a ra rawng ai lam hpe sharin ya yang grau kaja ai.Hpang kalang nga yang gara hku mara jaw na ngu myit nga na malai hpang kalang bai n byin na matu gara hku sharin ya na ngu ai hpe mahtang myit nna tsun sharin ya yang grau kaja na rai nga ai.

Hpang jahtum hku nna tsun mayu ai gaw anhte kashu kasha ma ni gaw kanu kawa hpe yak hkak hkrum na matu galaw nga ai nrai nga ai. Shanhte hkum nan yak hkak ai ten hpe lai dik taw nga ai rai nga ai. Shanhte hpe mara n shagun ai sha shanhte a chye mayu ai, hkaja mayu ai myit hpe madi shadaw garum ya ai kaw nna anhte kanu kawa ni ra sharawng ai lit la chye ai myit nga nna tinang hkum tinang hkam hpa chye ai ni hku nna kaba wa lu na rai nga ai.