Daini na akyu hpyi sumru yu na ga baw hpe: Peace is a Fruit (Simsa Lam Gaw Asi Langai mi Rai Nga) Ngu nna masat ga.
Ndai ga baw hte seng nna chyum mungga daw mi hpe jawm madat yu ga:
Galati, Daw kaba manga: daw kaji hkun-lahkawng the hkun-masum (5:22-23):
“Wenyi a asi chyawm gaw tsawra ai, kabu gara ai, ngwi pyaw ai, myit galu kaba a, matsan dum ai, mai kaja ai, kangka ai, myit nem ai hte tinang myit hpe hkang lu ai rai nga ai: dai lam hte hpe hkum lu na tara mi n nga ai”.
Ya, anhte, simsa ai ngu ai gara kaw na sa wa, pru wa ai kun, jawm dinglik yu ga. Simsa ai ngu ai hpe anhte galaw la lu ai lam n rai nga ai; Chyoi Pra ai Wenyi a kumhpa she rai nga ai ngu ai hpe ndai chyum mungga shadum ya nga ai.
Dai simsa lam hpe jaw ya lu ai Chyoi Pra ai Wenyi, anhte a kraw lawang hta rawng nga ai majaw chyeju dum ra ga ai. Shi anhte hte rau galoi mung nga nga nna, anhte hpe shi a mai kaja ai apu asi ni hpe shapraw ya lu hkra garum la na matu hpyi ra ga ai. Bai kahtap madat yu ga:
“Wenyi a asi chyawm gaw tsawra ai, kabu gara ai, ngwi pyaw ai, myit galu kaba a, matsan dum ai, mai kaja ai, kangka ai, myit nem ai hte tinang myit hpe hkang lu ai rai nga ai.” (Galati 5:22-23)
Bai nna, dai mai kaja ai wenyi a apu asi ni hpe shapraw ya lu na matu, anhte Karai kasng hte matut mahkai nga ra ai hpe mung, chyum mungga hta Madu Yesu shadum ya ai. Yawhan, Daw kaba shi-manga: daw kaji mali (Yawhan 15:4) hpe madat yu ga:
“Tsabyi lakung gaw tsabyi ru madung hta n jung n noi yang gaw, shi chyu sha asi n si lu ai zawn, nanhte mung ngai hta n jung n noi myit yang gaw, asi n si lu na myit dai.”
Dai majaw simsa ai ngu ai gaw Chyoi Pra ai Wenyi hta anhte manoi nga ai majaw pru ai asi she rai nga ai. Anhte a mu-jut ni, anhte shada kawnawn mazum ai lam ni, anhte tsun shaga ai ga ni, amu bungli ni, myit mang ai hte salum hta hkam sha ai lam yawng hpe, Shi Madu kaw ap da ai shaloi, pru wa ai asi kaja rai nga ai.
Anhte a myit, simsa ai hte rai n lu nga ai rai yang, anhte a myit masin jut shara ra kaw shi a chyeju hte rai n lu du hkra ai majaw rai nga ai. Anhte shada a lapran na kanawn mazum lam ni hta myit ngwi simsa lam rai n nga ai rai yang, anhte hte kaga masha ni a ntsa tawn da ai shi a tsawra myit hpe, rai n lu hkam la ai majaw rai nga ai.
Tinang hpe kaga masha ni mu mada, shadu ai lam ni, tinang a myit simsa lam hpe ka-up kau ya ai rai yang gaw, anhte a ntsa Shi Madu mu mada, manu shadan ai lam ni hpe, anhte rai n dum n chye ai majaw rai nga ai.
Anhte a prat hpe ngwi pyaw simsa ai hte lai di mayu ai rai yang – anhte a prat jut shagu de Shi Madu a atsam rawng nna, tsawra ai, galai shai shangun ai chyeju hpe du shang wa shangun ra ga ai.
Dai majaw Roma, Daw kaba shi-mali: daw kaji shi-sanit (14:17) hta,
“Karai Kasang a mungdan gaw, sha sha, lu lu rai na hku n re ai sha, Chyoi Pra ai Wenyi e, dinghpring ai, ngwi pyaw ai hte kabu gara ai, rai nga ai” nga nna Kasa Pawlu tsun da nga ai.
Ya, asim sha akyu hpyi sumru yu ga:
- Galati Daw kaba manga: kaji hkun-lahkawng (5:22) hpe bai myit dum ga: “Wenyi a asi chyawm gaw tsawra ai, kabu gara ai, ngwi pyaw ai, myit galu kaba a, matsan dum ai, mai kaja ai, kangka ai, myit nem ai hte tinang myit hpe hkang lu ai rai nga ai.”
- Na a prat, gara daw hta Chyoi Pra ai Wenyi a apu asi n si ai nga taw ai kun, sumru yu u. Na a prat hta gara lam ni hta Shi Madu a simsa lam n shanu nga ai kun, sumru yu u.
- Na a prat hpe Chypoi Pra ai Wenyi hte grau sung, ngangkang ai hku pawng hpawm nga ai de woi sa na matu shi kaw hpyi u. Roma Daw kaba matsat: kaji jahku (Roma 8:9) hta, ning nga tsun da nga ai:
“Nanhte hta e Karai Kasang a Wenyi rawng nga mit yang gaw, nanhte hkum shan myit hta e n rai, Wenyi hta e nan rawng nga myit dai”.
“Chyoi Pra ai Wenyi hte kanawn mazum ai lam hta rawt jat galu kaba wa ai” ngu ai gaw “anhte shada da kanawn mazum lam hta rawt jat wa ai” hte maren sha rai nga ai. Shi gaw, Kawa yan Kasha Yesu zawn Triniti Karai Kasang hta na “Marai Langai mi” rai nga ai.
Anhte masha marai langai ngai hte hku hkau chye chyap na matu aten la ra ai zaw, Chyoi Pra ai Wenyi hte hku hkau na matu – Shi hpa hpe ra sharawng ai, shi kadai re ai, kaning san ai, ngu ai lam ni hpe aten la nna hkaja ra ga ai. Nang shi hpe shakut nna tam jang, nang shi hpe teng sha mu lu na re.
Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!