Daini na akyu hpyi sumru yu na ga baw hpe: “Be who you are, Nang hpe Karai Kasang jaw ai prat hte hkawm nga u,” ngu ga baw hpe la ga.
Shawng nnan Chyum ga hpe madat la ga, “Kaning rai nme law, nang gaw nye a kraw lawang hpe shachyaw nna, nye nu a hkritung e, nang ngai hpe shachyaw nit dai nga nna” Shakawn Kungdawn 139:13 hta hti lu nga ai.
Karai Kasang gaw nang hpe laga masha rau bungpre ai the byin tai na matu nre, nang shi gaw nang hpe shi jaw ai prat sha byin tai let nga na matu re she re nga ai. Nang mu chye ai Hkristan hte bung na matu mung nre nga ai. Shi gaw nang hpe na a grup yin na masha ni ra sharawng ai (sh) hkap la ai zawn rai nga ai ni hterau bung hkra galaw na matu n tsun ai. Anhte ni Karai Kasang hpe mu mada ai myit ni gaw anhte ni e mu lu ai anhte a kanu kawa ni zawn zawn la chye nga ai. Retim Karai Kasang gaw dai hku ndi nga ai. Karai Kasang gaw anhte hpe makoi magap ai lam ngalaw ai sha, anhte gaw kadai re ai hpe grau chye wa nna, dai anhte hpe shaga la da ai prat hta e shi a kasha ni zawn shi Karai Kasang hpe kam hpa let asak prat hpe sak hkrung na she anhte hpe hpang da nga ai.
Shakawn Kungdawn 139:13 hta “Kaning rai nme law, nang gaw nye a kraw lawang hpe shachyaw nna, nye nu a hkritung e ngai hpe shachyaw da nit dai” nga nna tsun da nga ai. Karai Kasang gaw nang hpe mau hpa hte laklai ai hku hpan da ai. Shi gaw nang hpe nang rau sha seng ai nang madu ai arawn alai myit masa langai mi hte shaga la ai lam nang hpe jaw da nga ai.Shi gaw anhte shakut nna hkan sa na matu galaw da ai shinggan lam yawng hpe lai nna mu lu nga ai. Karai Kasang gaw shi anhte hpe 100% hpring tup tsawra nga ai hte anhte hpe tsawra hkap la nga ai hta mahta nna prat hpe gawgap nga sa lu na matu dai kaga lam ni yawng hpe kau da let Shi madu rau hkawn sa na matu she shaga nga ai.
Na a laklai ai lam hpe mu tam ai gaw Karai Kasang hte rau na a myit masin de hkawm sa ai kaw nna hpang wa ai. Nang kadai re ai hpe teng sha myit yu nga ai rai yang, nang hkum nang lai nna n yu ra ai, Chyoi Pra ai Wenyi hte rau, nang hkum nang teng man ai hku yu ra ai. Na a n’shim lum ai lam ni kaya kahpa ni a majaw hkum myit kaya nga u. Nang hpe kaga ni hte n bung hkra galaw ya ai lam hpe hkum htingnut kau. Karai Kasang nang hpe gara hku mu mada ai lam tsun dan na ahkang jaw u. Na a myit masin a teng man ai ra sharawng ai lam ni hpe shi hpe tsun dan na ahkang jaw u. Bai nna, nang n-gun ja ai hte dinghpring ai hku sak hkrung lu na matu, shi a n-gun rawng ai tsawra myit ntsa hta gawgap da u, nang a matu ngang kang ai npawt nhpang hpe shi hta tawn da na ahkang jaw u.
Dai ni nang hkum nan tai lu na, nden marai hte Karai Kasang nang hpe jahpring ya na ahkang jaw u. Kaga ni myit mada ai hte maren galai shai na matu shakut ai hpe jahkring kau u. Bai nna, sumsing lamu na Kawa a tsawra myit hta ngang ngang kang kang jung da ai na a masat dingsat hte manu dan ai lam hte asak hkrung nga u.
Chyoi Pra ai Wenyi gaw na a myit masin hpe lam madun ya na matu akyu hpyi u. Shi nang hpe gara hku mu mada ai lam tsun dan na ahkang jaw u. Nang hpe hpa majaw hpan da nna, laklai ai hkra galaw da ai hpe shi hpe san yu u. Bai nna, dai ni nang hkum nan tai lu na matu shi nang hpe n-gun jaw na ahkang jaw u. Nang n re ai wa tai na matu shakut shaja ai lam hpe jahkring kau ai shaloi, chyoi pra ai Wenyi ai lam madu ai lawt lu lam hte hpring chyat nga u ga akyu hpyi nga u.
Ya, asim sha nga nna sumru yu ga,
1. Nang kadai re ai, nang hpe Karai Kasang shaga la ai hpe myit sumru yu u. Teng man ai hku sak hkrung mayu ai myit law htam wa na matu Chyum mungga the na myit masin hpe hpring tup shangun u.
“Hka hta myi man gaw myi man hpe shadan dan ai zawn, masha a myit masin gaw masha hpe shadan dan nga ai, nga nna” Ga Shagawp 27:19 hta mu lu nga ai.
2. Gara nga sat nga lam ni hku nna Karai Kasang nang hpe jaw prat nre hta (sh) nang kadai re ai ngu ai hta nre ai sha, nang shakut nga ai kun? Ding man ai hku asak hkrung na malai, masha e mu mada ai hkrang nsam hpe sha nang yu jahtuk nga asak prat hpe gaw gap da nga kun?
3. Chyoi Pra ai Wenyi hpe shi nang hpe gara hku mu mada ai lam tsun dan na matu hpyi nem u.
Nang karai re ai hpe atsawm sha chye wa lu nna dai hte maren nga sa na lam hpe pat shindang da ai lamni yawng hpe tawn kau lu na atsam hpe Chyoi pra ai Wenyi kaw hpyi la u.
Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!
