Masa Lam Shagu hta Lu Mai Ai Simsa Lam ( Peace in All Circumstances )

Daini anhte akyu hpyi sumru yu na matu, Peace in All Circumstances

(Masa Lam Shagu hta Ngwipyaw Simsa Nga na Lam) ngu ai hpe ga baw shatai ga.

 “Aten, masa lam shagu hta ngwipyaw simsa nga ai,” ngu ai gaw kaning san ai hpe ngu na i? Ja Chyum Mungga hta gaw “aten shagu hta simsa nga na” ngu ai hpe gasadi jaw da nga ai; raitim, dai hpe hkam la lu ai masha ni n law ma ai. Hpa majaw rai kun sagawn yu ga.

“Aten, masa lam shagu hta simsa nga lu na” ngu ai ga-sadi gaw anhte a matu, Chyum mungga a teng man nna, atsam kaba dik ai teng man lam nkau mi hta na langai mi rai nga ai.

Wa Karai gaw anhte hpe shi a simsa ai chyeju hte masat da hkrum ai ni shatai mayu ai.  Shi gaw “mai kaja nga ai” majaw, mai kaja ai ten rai tim, ru yak ai aten hta rai tim, dai simsa ai hpe lu shangun mayu ai.  Ndai Mungkan, anhte hpe n shamu lu hkra, anhte a hkum hpe shi Madu hta ru jung npawt gaw da shangun mayu nga ai.

Htesaloni masha ni hpang de shagun ai laika lahkawng, Daw kaba masum: kaji shi-kru (2 Htesaloni 3:16) hta,

“Ya, ngwi pyaw ai a npawt, dai Madu nan, nanhte hpe tutnawng e lam shagu hta ngwi pyaw ai, a jaw nga u ga.  Dai Madu gaw nanhte nlang hte rau a nga nga u ga law” nga nna Kasa Pawlu tsun ai.

Anhte Simsa ai lam a Karai kasang hpe nawku daw jau ga ai.  Anhte kata hta rawng nga ai Chyoi Pra ai Wenyi mung simsa nga ai.  Galati masha ni hpang de shagun ai laika, daw kaba manga: kaji hkun-lahkawng (5:22) hta mung, anhte shi hte matut manoi jawm pawng hpawm nga ga yang gaw, anhte a prat hta ngwipyaw simsa ai asi ni si na re nga nna tsun da nga ai.  Madat yu ga:

“Wenyi a asi chyawm gaw tsawra ai, kabu gara ai, ngwi pyaw ai, myit galu kaba ai, matsan dum ai, mai kaja ai, kangka ai, myit nem ai hte tinang myit hpe hkang lu ai rai nga ai.” 

Rai tim, anhte mahtang, Karai kasang anhte a kata e n rawng ai zawn, Mungkan lam ni hpe mahtang lata la ga yawng chyam gaw, masa lam amyu myu gaw anhte a simsa lam hpe kashun la kau ya na rai nga ai. 

Chyam dinglik ai hte ru yak jamjau lam ni gaw, anhte hpe wan zawn hkru galip wa na rai nga ai.  Anhte a hkum shan myi yan hpe tengman ai lam yawng a npawt hku nna n mai sawn la ai; anhte a myi hte sha mu mada lu ai lam yawng gaw teng ai n rai nga ai. 

Karai kasang gaw, anhte gara masa lam ni hta ang wa ai rai tim, shi a mai kaja nna, shi tsun ai ga hta sadi dung ai lam hpe kam sham lu u na matu “wenyi myi” anhte hpe jaw da ya sai.

Anhte gaw, anhte hkrai n rai ga ai; Chyum Mungga hpe ka tawn ai Karai, htani htana agrin nga ai Karai, Hkristu hpe si ai ni kaw na bai jahkrung sharawt la ai Karai, sape ni hpe n-gun atsam jaw ai Karai, anhte a kata e galoi mung arawng nga ai.

Nang Karai Kasang hte rau jawm pawng galung gahkin nga ai daram sha, nang ndai dinghta ga ntsa e simsa ai hte nga sa lu na ndai.  Yawhan ka da ai Kabu Gara Shiga, Daw kaba shi-mali: daw kaji hkun-sanit (14:27) hta,

“Ngwi pyaw ai gaw ngai nanhte hta da ya ma sa de ai; nye a ngwi pyaw ai nanhte hpe ngai jaw made ai: mungkan ga na ni jaw ai zawn, ngai nanhte hpe jaw made ai n rai.  Nanhte myit hkum ru myit, hkrit mung hkum hkrit myit” nga nna Madu Yesu tsun da sai.

Ngwipyaw simsa ai gaw anhte a kumhtaw rai nga ai.  Ndai ngwipyaw simsa ai gaw, masha ni a bale balau re ai myit hte ding-yang galai shai nga ai munkan e jaw ai masa lam hte n bung nga ai.  Sumsing lamu a simsa lam gaw galai shai mat ai lam n nga ai Karai kasang a tsawra ai hta npawt jung nga ai.

Yawhan ka da ai Kabu Gara Shiga, Daw kaba shi-mali: daw kaji hkun-sanit (14:27) hta, “Nanhte myit hkum ru myit, hkrit mung hkum hkrit myit” ng anna Madu Yesu anhte hpe matsun nga ai.  Anhte a kaju galim, kadau gadap re ai hkam sha lam ni hpe rim majaw la nna, n shamu n shamawt lu ai Karai Wa a lagaw nhpang e da kau ra ga ai. 

Anhte  a salum ni hpe anhte a kraw lawang e nga nga ai Chyoi Pra ai Wenyi hte dantawk matut mahkai nna – shi shaga ai nsen hpe madat let, anhte hpe shi a ngwipyaw simsa ai  hte jahpring ya nna, aten shagu hta lam madun ya shangun ra ga ai.

Asim sha akyu hpyi myit sumru ga:

1. Aten, masa shagu hta nang hpe jaw ya nga ai ngwipyaw simsa lam hpe bai myit dum u.  Lahkawng Htesaloni, Daw kaba masum: kaji shi-kru (2 Htesaloni 3:16) hta tsun da ai mungga hpe bai myit dum ga:

“Ya, ngwi pyaw ai a npawt, dai Madu nan, nanhte hpe tutnawng e lam shagu hta ngwi pyaw ai, a jaw nga u ga.  Dai Madu gaw nanhte nlang hte rau a nga nga u ga law.”

• Na a ngwipyaw simsa lam a matu “Mungkan” hpe gara hku mu mada ai?  Na a kraw lawang hta hkam -sha lam ni hpe kadai madu da nga ai kun?  Dai hpe chye lu na matu, Yawhan, Daw kaba shi-mali: kaji hkun-sanit (Yawhan 14:27) hpe bai dum ga:

“Ngwi pyaw ai gaw ngai nanhte hta da ya ma sa de ai; nye a ngwi pyaw ai nanhte hpe ngai jaw made ai: mungkan ga na ni jaw ai zawn, ngai nanhte hpe jaw made ai n rai.  Nanhte myit hkum ru myit, hkrit mung hkum hkrit myit.”

• Chyoi Pra ai Wenyi hpe, Shi nang hte ni htep nga ai hpe madun rit, ngu nna hpyi u.  Nang shi hte gara madang pawng hpawm nga ai hpe madun rit, ngu nna hpyi u.  Na a myi hpe Mungkan a lam ni kaw nna dawm la nhtawm, Karai kasang a ngwipyaw simsa ai lam hta sha, na a simsa ai hpe gawgap da nu.

Dai hte seng nna -Yawba Laika, Daw kaba sumshi-masum, kajai mali (33:4) hta, “Karai Wa a Wenyi gaw ngai hpe hpan da ni ai; n-gun chyalai rawng ai wa a nsoi nsa, ngai hpe jahkrung ni ai” nga nna shadum da nga ai.

Mungga hkap madat la ng ani yawng Chyoi Pra ai Wenyi kaw na Sumsing lamu a ngwipyaw simsa ai hpe hkam la lu myit ga law.