(MUNGKAN MATUT MAHKAI NINGHTOI)
Acts 1:1-11
Eph 1:17-23
Gos Mt 28: 16-20
Daini na Chyum mungga ni hta, Kasa ni hpang de Chyoi Pra ai Wenyi hpe Sumsing lamu na shangun dat na ngu ga sadi jaw nna, anhte a prat hkrun lam hte mungkan ting hkaw tsun na lam Shi hpe sakse hkam na matu hkang da ai hpang, Madu Yesu gaw shi a Sumsing lamu hpung shingkang hte lung wa ai lam hpe tsun dan da nga ai. Raitim, sumsing lamu de lung wa sai Yesu gaw, “Ngai nanhte hte rau tut nawng e rau nga nga nngai, rai sa, aten htum hkra, nanhte hte rau nga nga nngai” (Mt 28-20) ngu ai ga sadi a majaw anhte hte rau naw nga nga ai. Shi gaw aten shagu, shara shagu hta anhte hte rau nga nna, Chyoi Pra ai Wenyi a n-gun atsam hpe, ga ntsa de n-gun nnan shapraw ya nga ai.
Kasa Laika hta, Yesu sumsing lamu de lung wa ai lam, Chyoi Pra ai Wenyi a ga sadi, Yesu gaw kasa ni hpe ntsa de na Atsam hpe Yerusalem mare hta ala nga na matu matsun ai lam, kasa ni hpe shi a lam sakse hkam na matu sasana magam matsun ai lam ni hpe tang madun da ai. Dai ni na Shakawn Kungdawn (Shakawn Kungdawn 47) hta, shi a Sumsing lamu de lung wa ai hku nna, hkrung rawt sai Madu gaw hpung shingkang hte “shi a tingnyang hta dung nga ai” ngu tsun shadut da nga ai.
Daw Lahkawng hta, Karai Kasang gaw lamu kasa yawng a ntsa e shagrau sha-a ai Hkristu a hkrung rawt ai hte sumsing lamu de lung wa ai hta shi a atsam hpe hpaw shadan dan ai lam Pawlu sharin ya nga ai. Yesu gaw ya aten hta asak jaw ya ai Chyoi Pra ai Wenyi hta anhte hpe hkap la lu ai lam naw nga nga ai, lani mi hta anhte mung, Sumsing lamu a hpung shingkang de lung wa na re, Shi a chyeju hte, Shi anhte hpe tsawra myit hte daw jau ai sasana magam hku nna, Shi hta anhte a Makam masham hpe sak hkrung hkawm sa lu na hpe kam hpa nga ai.
Dai ni na Kabu Gara Shiga hta, Kawa hpang de bai wa ai hte, Yesu gaw mungkan ga ntsa shi a sasana magam hpe ngut kre hkra galaw ai lam tsun da nga ai. Raitim, Yesu gaw sumsing lamu de lung wa na aten garai n du shi yang, sape ni hpe shanhte a prat the shi hpe sakse hkam nna, Kabu Gara Shiga hkaw tsun na hte mungkan ting hpe kabu gara shiga hkaw tsun na lit hpe ap ya sai. Shi a Sumsing lamu de lung wa ai shaloi she, Yesu Karai Kasang a asak hkrung lam hte hpung shingkang hta hkum tsup hkra shang wa ai hpe mu lu ai. Hkrung rawt ai hpang na Hkristu a lam hpe tsun dan ai hta, Sumsing lamu hta gara hku asak hkrung na ngu ai hpe anhte hpe tsun dan da ai. Dai hpung shingkang hpe garan gachyan na myit mada lam gaw anhte a prat hpe shadut ya ra ai.
1) Anhte gaw hkaw tsun ai ni hte kabu gara shiga hkaw tsun ai ni tai ra ai: Hkristan tai na matu gaw hkaw tsun ai ni hte kabu gara shiga hkaw tsun ai ni tai ra ai. Hkaw tsun ai hte ndau shabra ai lam gaw shai hkat nga ai. N-gup ga hte hkaw tsun tim, asak aprat hte sakse hkam ga ai. Anhte a dan dawng ai Hkristan prat hku nna Yesu hpe sakse hkam lu na matu Karai Kasang a Wenyi a lam matsun hpe hpyi ra ga ai.
2) Anhte hta sharin achyin ya ai sasana magam bungli nga ai: Yesu gaw shi a prat hte hkaw tsun nna Makam masham, Myit mada ai lam, Tsawra myit, mara raw dat ya ai lam, hkye hkrang la ai lam ni hpe sharin ya nna, hpunau nauna ni a matu mung dai zawn re ai sasana magam bungli hpe jaw ya sai. Dai majaw, Chyum Laika hte Nawku hpung a sharin achyin ai lam ni hpe shani shagu na nga sat nng sa lam hku nna, Yesu hpe tinang hkrai akyu hpyi ai hku nna, Sakramentu ni hpe hkap la ai lam hte tsawra myit magam bungli ni hpe hkrang shapraw ai hku nna, Chyoi Pra ai Wenyi a karum shingtau lam hte anhte hkam sha ai Yesu hpe kaga masha ni hpang de htawn tsun dan ai hku nna, Yesu hte shi a sharin achyin ai lam ni hpe sharin la ra ga ai.
3) Shi ra sharawng ai hpe hkan galaw lu na matu, Yesu hpe anhte a n-gun atsam hte n-gun jaw lam a npawt nhpang hku nna hkap la ra ga ai: Anhte a Makam masham hte seng nna kam shut ai lam ni, npawt nhpang n nga ai hkrit tsang ai lam, myit tsang ai lam ni hpe mung dang kau lu ga ai. Yesu a Sumsing lamu de lung wa ai lam hte dai sharin achyin ai lam hpe myit sumru yu ai hku nna, anhte mung, Shi hta shi a hpung shingkang hpe garan gachyan na matu shaga la hkrum ga ai.
Daini Paska laban hta 7 ngu na Laban shani gaw Mungkan Matut mahkai Nhtoi rai nga ai. Ndai lam hpe yu nna, Kawa hpe ap ya ai anhte yawng hpe, Htani Htana Asak jaw na matu, Hkristu a akyu hpyi ga hpe manu shadan ra ga ai. Chyoi Pra ai Wenyi gaw Hkristu hte Nawku hpung a akyu hpyi shakawn shagrau ai lam a npawt nhpang rai nga ai. Shi gaw, hpa hpe tsun shaga na, gara hku galaw sa wa na ngu ai lam ni hpe nhtoi jahtoi ya ai Chief Communicator mung rai nga ai. Dai majaw ndai Laban shani kaba hta, Karai Kasang hpe shakawn hkungga nawng jau ai shaloi, Karai Kasang a Wenyi anhte a ntsa e nga nga na matu saw shaga ra ga ai.
Dai ni na aten na matut mahkai lam ni hpe hkap la nna, dai ni hpe uphkang nna, ndai ni hpe mau hpa kumhpa ni hku nna Chyoi Pra ai Wenyi a atsam hte Karai Kasang hte Hkristu hpe anhte a mungkan hpe chye shangun ga. Ndai Laban shani Mungkan Matut mahkai Nhtoi hpe galaw ai shaloi, anhte a mungkan hpe rawt jat galu kaba wa na matu, kaja wa na matu, hpa, gara hku matut mahkai na ngu ai hpe karum ya lu ai, hkingrai jaw ya lu ai, sharin ya lu ai Wenyi hpe jaw ya na matu Karai Kasang kaw akyu hpyi ga. Dai majaw, ndai hku hpyi shawn ga: “O Chyoi Pra ai Wenyi e, yu sa nna, kam sham ai ni a myit masin hpe jahpring ya nna, na a tsawra myit hte sasana magam a wan hpe anhte hta wan shatu ya rit, Alleluia, alleluia, alleluia!