Readings: 1st: Ex 34, 4-6.8-9; Ps. (Dan 3, 52-56); 2nd: 2Cor 13: 11-13; Gos Jn 3: 16-18
Chyoi pra dik htum ai Trinita a makoi magap da ai lam gaw, Hkristan makam masham hta Makam masham a madung sharin achyin ai lam rai nna, anhte a bawnu hte n rai, anhte a myit masin hte chye na la mai ai. Karai Kasang langai sha hta laklai ai Marai masum nga ai, Karai Kasang a shingra tara langai sha hpe garan gachyan ai, maren mara hte htani htana nga ai ngu ai hpe sharin ya nga ai. Anhte a myit masin gaw 1+1+1 = 1 n re ai sha 3 ngu sharin ya ai ndai sharin achyin ai lam hpe n lu hkam la ai, rai tim ndai Makoi magap da ai lam hpe anhte kam sham ai gaw, Karai Kasang rai nga ai Yesu asan sha sharin ya ai majaw, Kabu Gara Shiga hkaw tsun ai ni ka matsing da ai, Nawku hpung a kaji Kawa ni tsun sang lang dan na matu shakut ai, Nicaea hte Constantinople a Hkristan dogma of faith ni ngu nna lachyum shaleng da ai majaw re.
Dai gaw Kawa Karai Kasang hte Kasha Karai Kasang a lapran na matut mahkai lam hta byin ai lam hte bung nga ai. Kawa Karai Kasang gaw wenyi hte seng ai, shi hkum shi chye chyang lu ai wa re. Shi hkum shi Idea nga ai. Raitim, Shi a machye machyang gaw, anhte hte n bung ai, shadawn sharam nga ai nre majaw, dai Shi hkum nan a myit masa gaw hkum tsup ai hte hpring tsup nga ai. Raitim, hkum tsup na matu, Idea (sh) Mungga gaw, Karai Kasang a nga pra ai lam hta shang lawm ra ai; Mungga gaw teng sha Karai Kasang a Masha langai mi rai ra ai. Shing rai, Kawa Karai Kasang gaw, htani htana prat kaw nna, Shi hkum hpe chye chyang let, Kawa a hkum tsup ai hkrang sumla rai nga ai Kasha hpe shinggyim hkumhkrang sa la shangun nga ai. Bai nna, teng sha nga yang, Kawa hte Kasha yan gaw N-htum n-wai ai Kaja ai hte Tsawra ai ni re majaw, Shada da chye hkat ai hte rau, Shada da mung tsawra hkat ma ai. Anhte pyi, tinang hkum hpe myit yu ai shaloi, tinang hkum tinang lama ma chye ai, tinang hkum hpe tsawra ai. Anhte a matu kaja dik ai hpe ra sharawng ga ai. Anhte nga ai majaw kabu ga ai. Raitim Karai Kasang a Tsawra myit gaw, shi a Chye chyang ai zawn, shadawn sharam n nga ai, Hpang jahtum n nga ai, dai majaw ndai Tsawra myit mung, Karai Kasang a nga pra ai lam hta hkum tsup hkra shang lawm lu hkra, Hpang jahtum n nga ai hte atsam rawng ai hte grai hpring tsup ra ai; ndai Tsawra myit gaw Karai Kasang a tara kasa – Chyoi Pra ai Wenyi rai nga ai.
Hkristan prat hta ahkyak ai lam: 1) Nawku Hpung kata akyu hpyi ai lam yawng gaw Chyoi Pra ai Trinita a Mying ningsang hta hpang nna, Trinity hpe shagrau sha-a ai hte ngut kre ai. 2) Sakramentu yawng hpe (anhte hpe baptisma hkam ai, N-gun shaja hkam ai, namman chya ai, anhte a yubak mara ni hpe raw dat kau ya ai, hkung ran ai, anhte a Jau, Deacon aya dang ya ai) Chyoi Pra ai Trinita a mying ningsang hta jaw ya nga ai. 3) Nawku Hpung a nsen ni shani shagu masum lang ngoi ai shaloi, Yesu a hkum hkrang hkam la ai lam hte anhte yawng hpe hkye hkrang la ai lam a matu Chyoi Pra ai Trinita hpe hpung shingkang jaw na matu shadum ya nga ai. 4) Anhte hkum anhte shaman ya ai, jau, hkinjawng wa mung shaman ya ai, Chyoi Pra ai Trinita a Mying ningsang hta rai nga ai.
Chyum Laika hta madung tawn ai lam: Ga Shaka Dingsa hta Trinita hte seng nna n chye na ai hte makoi magap da ai lam ni sha nga ai. Raitim Ga Shaka Ningnan hta Chyoi Pra ai Trinita hte seng nna asan sha sharin achyin ya nga ai.
1) Annunciation hta, Kawa Karai Kasang gaw shi a lamu kasa hpe Nu Maria hpang de shangun dat ai shaloi, Chyoi Pra ai Wenyi Karai Kasang gaw shi a ntsa e du sa nna, Tsaw Htum ai Wa a Atsam shi hpe ka-up da nna, Kasha Karai Kasang gaw shi a hkritung hta hkum hkrang dagraw la ai.
2) Yesu Kashin Kamun hkam ai shaloi, Kasha gaw Yawhan Baptista kaw nna myit malai lu ai hkalup hpe hkam la ai shaloi, Kawa a Nsen na lu nna, Chyoi Pra ai Wenyi gaw Hkrudu zawn dan pru nna, Yesu a ntsa de yu hkrat wa ai.
3) Sumsing lamu de lung wa ai shaloi, Yesu gaw shi a sape ni hpe, kam sham ai ni hpe, Kawa, Kasha, Chyoi Pra ai Wenyi a mying ningsang hta, baptistma jaw na matu, lit jaw da ai.
4) Yawhan a labau: Yawhan a Kabu Gara Shiga daw kaba 15–18 hta, Chyoi Pra ai Trinita langai hte langai a lit hpe Yesu sharin ya ai lam hpe hkrak tup ka da ai: a) Kawa Karai Kasang gaw Shi hpan da ai ni hpe hpan da nna, lajang ya nga ai. b) Kasha Karai Kasang anhte hpe hkye hkrang la nna Karai Kasang hte htinglu htinglai ya ai. c) Chyoi Pra ai Wenyi Karai Kasang gaw anhte hpe shachyoi shapra ya ai, n-gun atsam jaw ya ai, sharin achyin ya ai, Karai Kasang hpang de woi sa ai.
Sharin hkamla mai lam ni: 1) Masha shagu gaw Chyoi Pra ai Trinita a Marai Masum yawng nga ai Chyoi Pra ai Wenyi a nawku htingnu re majaw, tinang hkum hpe mung, kaga masha ni hpe mung hkungga lara nga ga.
2) Trinitarian Karai Kasang gaw anhte hta nga nga ai, anhte a myit mada shara, nden marai, n-gun atsam a npawt nhpang rai nna, anhte a hpang jahtum du lu na shara re ngu ai ngang kang ai kam sham lam hpe anhte hta nga nga uga.
3) Kawa, kanu, kasha ni a dinghku kanawn mazum lam hta tsawra myit hte kahkyin gumdin lam ngu ai Trinitarian hku hkau lam hpe tatut galaw sa wa ga, hpa majaw nga yang baptistma hkam la ai hku nna anhte gaw Karai Kasang a kashu kasha ni tai wa nna, Karai Kasang a Trinitarian dinghku hta lawm nga saga ai.
4) Karai Kasang hte htingbu wa hpe tsawra ai hku nna ndai prat hta ngai–Karai Kasang–nye a htingbu wa vertical hte horizontal Trinitarian hku hkau lam hpe tatut galaw sa wa ga.