1st: Ex 19, 2-6a; Ps: 99, 2. 3. 5; 2nd: Rom 5, 6-11; Gos: Mt 9, 36—10, 8
Daini, pranwan ladaw laban 11, rai nga ai. Bai nna angte a myenmar mungdan hta gaw lai mat wa sai bat manga ya shani galaw ai Yesu a salum ningsang poi hpe galaw nga ga ai. Ndai Laban shani hta, Nawku hpung gaw Karai Kasang anhte hpe shaga la ai lam hpe shadum ya nga ai. Ndai shaga la ai lam hpe lam lahkawng hku chye na mai nga ai; langai ngu na hta, Israela hte Karai Kasang tawn da ai ga shaka hku nna re. Karai Kasang gaw shi a amyu tai na matu anhte hpe lata la nna shaga la mani ai. Lahkawng, ga shaka ningnan Yesu Hkristu hku nna Karai Kasang gaw anhte hpe shi a sape tai na matu shaga la ai. Dai majaw, Karai Kasang gaw anhte hpe shi a amyu shatai nna, Hkristu Yesu hta htinglu htinglai ya sai. Karai Kasang gaw anhte hpe langai hte langai hpe shi a matu ap nawng da ai amyu tai na matu shaga la ai.
Daini na daw 1 hta, anhte a shaga la ai lam a shawng na daw hpe mu lu ai. Ga Shaka Dingsa hta Karai Kasang shi a amyu masha ni hte tawn da ai mying kaba dik ai ga shaka langai rai nga ai Sina bum na ga shaka a lam hpe tsun dan nga ai. Dai hku nna Karai Kasang gaw Israela hpe shi a amyu shatai nna, shanhte hpe kaba dik ai shingran hpe jaw ai, shi a amyu masha ni mung madat mara ai lam jaw ai.
Amyu masha ni gaw shanhte a ga sadi hpe sadi dung ai rai yang, shanhte gaw chyoi pra ai amyu masha ni, Karai Kasang a sutgan ni htani htana tai nga na re. Shanhte a shinggyim shingra tara a majaw hkrat sum mat yang, Karai Kasang gaw shanhte hpe n kabai kau ai sha matut nna tam nga na re. Ndai gaw Karai Kasang galaw ai lam rai nga ai. Anhte hkrat sum tim, Karai Kasang anhte hpe galoi n kabai da ai. Dai majaw, “Shut ai gaw shinggyim masha hte seng ai, mara raw dat kau ai gaw Karai Kasang hte seng ai” ngu ai ga gaw hpaji rawng nga ai.
Shinggyim masha ni hku nna, Karai Kasang hte ga shaka tawn da ai anhte a daw hta galoi mung hkrat sum chye ga ai. Ga Shaka Dingsa prat na Israela ni zawn, “Madu tsun ai hte maren anhte galaw na ga ai!” (Pru Mat 19:8). Anhte gaw, kam sham nna, anhte a ga shaka hpe sadi dung na ngu tsun na matu lawan ai. Raitim, law malawng gaw anhte hkrat sum chye ai. Dai zawn byin nga tim, Karai Kasang gaw anhte hpe galoi mung n kabai da ai. Shi gaw shi tawn da ai ga shaka hpe matut nna sadi dung nga ai.
anhte a shaga la ai lam a lahkawng ngu na daw gaw, prat a lachyum hpe lawan ladan sum mat wa loi ai mungkan hta, masha law law hpe kabai kau ai, karum shingtau lam n nga ai, myit mada shara n nga ai ngu hkam sha nga ai mungkan hta Hkristu a sape ni tai na matu re. Ndai shaga la ai lam hte sasana magam gaw myit daw myit hten ai hte kabai kau hkrum ai mungkan a matu matsan dum lama ai myit hte shangai wa ai re. Dai majaw, dai ni na kabu gara shiga hta, “Yesu gaw masha wunawng wuwa hpe mu jang, sagu rem wa n nga ai sagu ni zawn, myit ru myit tsang hkrum nna, kabai kau hkrum nga ma ai majaw, shanhte hpe matsan dum nga ai” nga nna tsun da nga ai.
Dai majaw, anhte Hkristan ni hku nna langai hte langai gaw lak lai ai shaga la ai lam hpe lu la ga ai. Anhte kashin kamun hkam la ai a marang e, Karai Kasang gaw anhte langai hte langai hpe, dai ni shi a kasa shi lahkawng hpe shaga ai zawn, anhte a kabai kau da hkrum ai mungkan hpe garum na matu, anhte a mying nnan hte lata la nna shaga taw nga sai. Ndai gaw anhte a myit daw myit hten nga ai mungkan hpe hten za ai kaw na sharawt nna hkye la na matu laksan shaga la ai lam rai nga ai. Shada sadi dung ai sagu rem ni tai na matu shaga la ai lam rai nga ai. Karai Kasang hte shi a Kasha anhte hpe matut nna matsan dum lama ai hte karum kahtau ai lam madun dan ai zawn, anhte mung shada da matsan dum lama ai lam madun ra ai, grau nna lam langai ngai hta hkrat sum mat ai (sh) shut mat ai ni hpe madun dan ra ga ai.
Lai wa sai bat Manga Ya shani hta, Nawku hpung gaw, Yesu a Salum Ningsang hpe hkungga shagrau ai poi hpe galaw ga ai.
Nawku hpung a nawku daw jau ai lam labau hta Yesu a salum ningsang hpe hkungga shagrau ai lam ni law law nga lai wa sai. Ya gaw mungkan ting hta Nawku hpung kaw nna Solemnity tsaw dik ai nawku daw jau ai lam hku nna gala w nga saga ai.
Ndai Solemnity poi kaba hpe France mungdan kaw shawng nnan galaw hpang wa ai rai nna, San Pra ai Marguerite Marie Alacoque hpe hpaw shadan dan ai hpang, ndai nawku daw jau ai lam hpe masha law law ra sharawng wa ma ai.
Yesu a Chyoi Pra Htum Ai Salum ningsang hpe ap nawng ai lam gaw, Yesu Hkristu hpe htingrai htingrat ai lam galaw ai lam ni hte grai matut mahkai nga ai.
Salum ningsang gaw Yesu Hkristu a shinggyim hkum hkrang ting a atsam rawng ai kumla langai hku nna tsap nga ai. Mara raw dat ya ai myit masin, n ju n dawng ai lam n nga ai myit masin, yawn hkyen ai myit masin hte tsawra myit rawng ai myit masin rai nga ai.
Yesu gaw Kabu Gara Shiga ni hku nna shi hkum shi hpaw shadan dan ai hte maren, shi a madung myit masa gaw, n ju n dawng ai lam n re ai sha, shadawm sharam n nga ai tsawra myit re ai hpe anhte mu lu ga ai.
Kabu Gara Shiga a shawng na, hpang jahtum na shiga gaw, Karai Kasang gaw ndai mungkan hte dai hta nga ai masha shagu hpe tsawra ai lam rai nga ai. Shi a kasha Yesu hpe tara agyi hku n rai, sagu rem wa hku nna, matsan dum chye ai myit masin hte shangun dat ai.
Dai ni na kabu gara shiga hta, Yesu gaw kawa a makoi magap da ai lam ni hpe kaji kadun ai ni hpe hpaw shadan dan nna, hpaji rawng ai ni hte kungkyang ai ni hpe makoi da ya ai majaw chyeju dum nga ai lam hpe mu hti lu ga ai.
Dai majaw, anhte yawng a matu shi a tsawra myit hte matsan dum lama ai lam kaba ai hpe chye na la lu na matu, kaji kadun ni a lapran hta nga lu na chyeju hpe Karai Kasang kaw hpyi nem nga ga.
Yesu a Chyoi pra htum saalum e, anhte a matu akyu hpyi ya rit!