Mara Nau Mu Chye Ai Myit Hpe Shamat Kau U

Madu hkum madu mara shagun ai lam nau nmai jau ai, galoi mung nkaja ai lam ni hkrai hkum tsun nga u, bai madu hkum madu yu kaji lai kau yang mung, Galai Shai Lu Ai ngu ai kam ai myit ni mat mat wa chye nga ai ngu shawng nnan e n gun jaw mayu ai, masha laga wa hte shingdaw dat yang, myit kaji ai zawn hkam sha wa nga shagu, lai wa sai manga ning na madu hkum hte, ya tatut tinang a hkrang hte nbung mat nga sai lam gaw nang myit dum dat u, nmyit mada da ai mang hkang mayak lam ni hpe tawt lai lu mat ai zawn, tinang hta nga ai lam hte, ndai shara madang tsang hta du hkra nang shakut lu sai mung rai nga ai, dai pyi nshayawm dat nga shi ai madu hkum madu hpe masat shagrau la u,.Bai Shawoi na zawn sha hte pyi ndai shara de du wa lu ai rai yang, ya na nang a atsam marai hte, kam ai lam ni bai pawng bang dat yang, matut bai du wa lu na nang a byin wa lu chye ai lam ni gaw ya nang tak

tawn da ai hta pyi grau taw na gaw teng sha rai nga ai ngu tsun mayu ai.

Tsawra ai Ramma ni tinang a ban dung de du wa lu na matu, myit sawn lu ai ngyan hte, myit hkam sha lam lahkawng ra nga ai, langai akyu nshang wa ai ten, hpang langai hpe kam hpa lu nga ai, bai matut hkawm sa ai lam, pu ba wa ai ten,, myit hkam sha lam ni daw hten mat wa ai ten, dai aten ni hta, n gan pru mat wa na matu, tinang hpa majaw nnan hpang wa ai rai, bai myit sawn sum ru na matu ra nga ai, mani mana zawn sha bai dum wa lu na matu bai gayat bang na ra nga ga ai re, kalang marang ni hta, shawng de matut hkawm sa na lam matu tam nmu, myit mada shara nnga mat ai ten ni mung nga na, dai aten ni hta, mi nan raw nga shalai kau dat ai ten ni na hkam sha lam zawn myit daw ai lam, pawt sin dawng ai lam, hkra machyi hkam sha lam ni hpe bai sawn dum dinglik yu let, dai hpe bai asak bang let, jahtum du hkra hkawm sa na ra nga ai, awng dang shakut sa ai hkrun lam loi nga yang masha shagu hkan galaw taw nga sana mung rai nga ai, dai majaw tsaw dik ai shara de du mayu yang, ndang la ding sa asum njaw kau ai myit marai n gun atsam ni shangai shaprat la ra na gaw teng sha rai nga ai ngu

Dai majaw mani sha kade mi myit daw hpa lam ni, n hkam sharang na mabyin ni byin wa wa, hpang jahpawt yup rawt ai hte gaw ninghtoi ningnan sha rai nga ai, dai ni ngu ai gaw, mani na hte nbung lu nga ai, dai majaw dai ni hpe langai kaw na mai kaja hkra bai hpang na i mani byin lai wa ai lam ni hpe bai sawn yu let, myit malai lu taw nga na kun ngu ai hpe daw dan nna shakut ra na ga anhte nang ngai nan sha rai nga saga ai grau kaja ai htawm hpang hpe lu mayu yang, lai wa sai ten byin lai wa ai lam ni hpe jahkring hkring bai hkum nhtang yu nga sa, ja gumhpraw hte mari la nlu ai aten ni hpe myit malai taw nga nna aten hpe bai hkum jahtum kau, byin grin lai wa na lam ni hpe bai sawn yu taw na malai hpa ni bai gram let mai kaja hkra matut galaw na ngu ai lam ni hpe sha myit maju jung let hkawm sa lu na ahkyak kaba dik mung rai nga ai hpe shadum ya mayu ai. Dai majaw shani shagu gaw mai kaja dik mau mwi langai a nnan hpang ai lam rai nga ai hpe myit masin baw nu hta dawk bang da na matu ra nga ai.

Tsawra ai ramma ni sak prat hta aten gaw kadai hpe mung nla nga ai, tinang katu

nga ai ten du hkra, myit lawm ai aten du hkra, myit malai lu ai ten ni du hkra nang ngai hpe la taw na gaw nrai nga ai , aten naw ram nga ai ten hta, du ra ai shara de du hkra shaten n gun ra nga ga ai, dai shaten n gun nga na matu shani shanang shamu ai magam nga ra nga ai, htawm hpang de hpa ni shut wa chye ai rai ngu ai hpe mung myit sawn let hkum hkrit nga, bai shakut ai lam shagu tang ndu na mung nau hkum hkrit, shaten n gun lu wa yang, hpang kahtap lahkam na lahkam ni adan sha rai wa lu na rai nga ai,  dai majaw tsawra ai ramma ni kalang pyi byin hkra n galaw ga shi na tinang a byin da masa ni hpe rip kawp hkum bang kau, awng dang ai lam a nam chyim hpe kadai mung myit hta manoi chye nga ga ai, awng dang lam hpe kaw si ai wa byin mayu yang, shawng nnan awng dang ai lam hpe tinang a atsam mrai hte hkrang shachyaw chyam yu na tsawra ai ramma ni a prat hta ra nga ga ai

#youth

#rvakachinservice