Readings: 1st: Zac 9: 9-10; Ps 145:2-3.4-9; 2nd: Rom 8:9. 11-13; Gos Mt 11: 25-30
Ndai 14 ya Laban shani hta, Yesu shagrit shanem ai lam hte matsan mayan lam hpe shi lata la ai lam hpe myit sumru na matu Nawku hpung gaw saw shaga nga ai. Ndai mai kaja ai lam ni gaw anhte Hkristan hkrun lam hta ra ahkyak nga ai. Matsan mayan ai lam gaw masha hpe shagrit shanem shangun ai, grau nna Karai Kasang a mungdan a matu hte Hkristu hpe kasi la nna lawt lu lam a matu “lata la” ai shaloi rai nga ai.
Daw 1 gaw, du sa na Hkristu a shagrit shanem ai lam hpe tau hkrau tsun dan nna, hkrang shapraw dan nga ai. Ndai lam gaw anhte yawng a matu myit mada shara jaw ya ai lam rai nga ai. Ndai lam gaw madung hku nna myit shagrit shanem ai ni hte wenyi hta matsan mayan ni a matu rai nga ai: “Ziun shayi sha e, kabu gara nga u…yu u, na a hkawhkam wa du wa nga ai…shagrit shanem nna lawze jawn nga ai.” Ndai lam gaw mau hpa n rai ni? Teng sha nga yang, shagrit shanem ai ni hpe karum shingtau na lam hte tara rap ra lam jaw na matu shi du sa ai.
Ndai sa du ai lam gaw anhte yawng a matu re. Karai Kasang a matu anhte a ahkyak ai lam gaw, anhte a account hta kade daram nga ai, anhte a hpaji rawng ai bungli, anhte a awng dang ai mung masa bungli, anhte a awng dang ai hpaga lam hta n madung nga ai. Shagrit shanem ai masha tai na matu gaw Karai Kasang a matu ahkyak ai lam re. Ndai Karai Kasang kaw na du sa ai lam gaw anhte hte ging dan ai lam rai nga ai.
Daw Lahkawng hta, wenyi hta asak hkrung ra ai lam hpe Pawlu shadum da nga ai. Dai gaw shagrit shanem ai myit hpe shabyin ya ai wenyi re majaw rai nga ai. Maga mi de, hkum shan gaw gumrawng gumtawng ai hte n hkru n kaja ai lam amyu myu hpe shabyin ya nga ai. Pawlu tsun ai hkum hkrang gaw shinggyim shingra tara hpe tsun mayu ai. Mungkan hte dai hta nga ai arung arai ni hpe ra sharawng ai myit jasat ni hte matut mahkai shangun ai npawt tara re. Dai hte nhtan shai ai hku nna bai gram lajang ai wenyi gaw sumsing lamu kaw na pru wa ai nhtoi rai nga ai. Dai gaw myit masin hpe sumsing lamu na lam ni de sharawt ya ai.
Shing rai, Wenyi hta rawng nga ai gaw, masha nnan byin wa ai hpe teng sha sakse madun nga ai. Wenyi gaw masha langai hpe arung arai matsan ai aten hta pyi, shamu shamawt shangun nna, hkrung nga shangun nga ai. Dai majaw, Yesu gaw, shaman chyeju hta, “Wenyi hta matsan mayan hkrum ai ni gaw, Karai Kasang hpe mu lu na ma ra ai majaw, a lu ma ai” (Mt 5, 3) ngu sharin ya nga ai. Ndai kaja ai lam hpe lu la na matu Yesu a Wenyi chyu sha karum ya lu ai. Arung arai ra sharawng ai hte myit marin ai myit hta dan dawng nga ai mungkan wenyi gaw ndai lam hpe n lu galaw ai. Ndai lam a majaw Pawlu anhte hpe tsun ai gaw: “Yesu a Wenyi n lawm ai wa gaw, Yesu hte seng ai n rai nga ai.” Dai “Yesu a Wenyi gaw anhte a si chye ai hkum hkrang hpe jahkrung ya ai” majaw rai nga ai.
Kabu gara shiga hta Yesu gaw Kawa a myit masin a sumri hpe hpaw shadan dan ai the jaw ya nga ai. madung gaw shagrit shanem ai lam re. Karai Kasang gaw myit shagrit shanem ai ni hte myit nem ai ni hpe shi hkum shi hpaw shadan dan nga ai. Dai majaw, “Karai Kasang gaw gumrawng gumtawng ai ni hpe ninghkap nna, shagrit shanem ai ni hpe chyeju jaw mu ai” (Ga Shagawp 29: 23). Karai Kasang hpe atsawm sha daw jau ga ai rai yang, anhte a madu Hkristu zawn myit shagrit shanem ra ai. Anhte shagrit shanem ai rai yang, Karai Kasang gaw shi a mungdan a makoi magap da ai lam ni hpe anhte hpe hpaw tsun dan na re.
Dai ni aten hta, Yesu gaw anhte hpe ndai hku tsun nga ai: “Hki ba la ai hte lit li gun ai ni nlang hte gaw, ngai hpang de sa marit, ngai nanhte hpe ban sa shangun na made ai.” Ndai saw shaga ai lam gaw gumrawng gumtawng ai ni a matu n re, hpa majaw nga yang shanhte gaw lit grai li ai (sh) karum shingtau lam ra ai hpe n chye na ai majaw re. De a malai, Karai Kasang a shang lawm ai lam ra kadawn nga ai hpe lawan ai hku chye na na matu, asan sha shagrit shanem ai myit masin rawng ai ni a matu rai nga ai.
Anhte a prat hta n dang hti ai aten ni law law nga ai, anhte gaw ba ai hte n-gun yawm mat ai zawn hkam sha nna, myit daw myit hten ai lam ni byin chye nga ga ai.
Jawngma ni mung tsang hpaji the myit ba, jawng sra/num ni mung shanhte a lit the, kanu kawa ni mung dinghku bungle the, asuya mgam gun ni..,sut masa galaw ai ni mung, matsan ai mung , lu su ai mung shi shara the shi lit magam hta myit ba nga ai hkrai rai nga ai. Anhte langai hte langai, aten langai ngai hta…mabyin masa langai ngai hta n-gun yawm ai, ba ai hte li ai lit hpe hkam sha nga ga ai.
Tinang a dinghku, wuhpung wuhpawng, amyu sha ni a lit hpe gun hpai ai ni a matu rai nga ai. Karai Kasang a myi man hpe teng sha tam ai ni hpe saw shaga ai lam rai nga ai. Hkristu a lata hta yawng hpe ap nawng na matu jin jin rai nga sai ni a matu re. Shi du sa nna, anhte yawng hpe shi a la nga ai. Shi saw shaga ai zawn, anhte yawng hpe mung saw shaga nga ai. Dai majaw, ndai hku mahkawn let shi hpang de sit sa wa ga: “Nye a hkawhkam Karai Kasang e, na a amying hpe ngai htani htana shakawn kungdawn na nngai!