Sharin Hka Ja La Ai Lam Hte  Shawng De Hkawm Sa Ga

Anhte ni yawng a sak prat ting hta, n galaw nmai galaw ra na lam yan gaw, sharin hka ja la ra ai lam rai nga ai, dai sharin hka ja la ai lam gaw, kanu a hkritung kata kaw nna hpang di, nsi shi ai aten ladaw laman du hkra rai nga ai, dai hta sharin hka ja la ai lam hpe, jahkrin kau yang, sak prat galu kaba hkawm sa ai lam hpe, jahten kau dat ai hte mung bung nga sana mung rai nga ai.

Grau nna, Ramma sak prat ten ladaw ni hta, sharin hkam la ai lam ni hte, hpring chyat taw nga ai aten ni rai nga ai, dai sharin hkam la ai lam hpe, nhkring kau ding sa gaw, anhte nang ngai yawng a awng dang ai lam hpe, kadai mung jahkring kau nlu sana sha rai nga ai, dai majaw anhte ni gaw, sharin hka ja la ai lam ni hte rau, shanwg de sit sa ra na ra nga ga ai, ramma ten lai mat wa nna, sak ram wa ai ten ladaw ni de hkawm sa ra nga ai ten ni hta raitim sharin hka ja  ai lam ni gaw matut nga taw na sha rai nga ai, ramma sak prawt gaw, sharin hka ja la ai lam ni kaw na, rawt jat wa hkra galaw shakut nga let, sak ram ai ten ladaw a matu, shajin sa wa ra na rai nga ai.

Dai hta sak prat ram wa ai ten du wa yang, ngwi pyaw simsa ai hte nga sa lu na matu, ramma ten ni hta, galaw sa wa ra na magam lam ni gaw, tinang hpe madi shadaw ya lu na rai nga ai, anhte ni a sak prat ting  a matu, daw dan ya lu na ramma sak prat hta, sharin hka ja la ra ai lam ni hpe, n galaw sa wa ai rai yang, htawm hpang prat a matu, myit tsang hpa tai wa sana mung rai nga ai, ramma ni hta, sharin hka ja ra na hpaji lam ni law law nga ai zawn, matut hkawm sa  galaw ra na sak prat a mahkyen lamang ni hpe mung  dawn dan jahkrat sa wa na ra nga ga ai, dai majaw sak prat ting hta sharin hka ja  ai lam ni ding run nga taw yang she, shawn lam hkrun lam a matu, pri nem tsawm htap wa lu na rai nga ai ngu shadum n gun jaw mayu ga ai.

Dai zawn shakut hkawm sa nga ai ten hta, tara agyi langai hku daw dan nhkrum nna, shani shagu shingjawng ai lam ni hpe galoi mung shing jawng nga taw ra ai sha rai nga ai, nkau shingjawng lam ni a majaw, pyaw ai lam ni nga ai zawn, myit daw hkrat sum ai lam ni du hkra byin nga ai lam ni hpe mung hkrum katut wa na sha rai nga ai.Bai galaw lu ai atsam gaw, galaw taw nga ai hta grau nga ai, anhte ramma ni a sak prat hkrun lam hkawm sa hpang ai aten ni hta, Career langai hte sha hpang wa ai ni hkrai rai nga ai law nga ga ai re, Career ngu ai gaw, sak prat hkawm san a lam a matu, n’galaw nmai galaw ra ai kan bau jawng langai mung rai nga ai, dai hta nkau rawt jat mayu ai ramma ni gaw Career  langai hta grau nna, laga shang gumhpraw lu lawm lam ni hpe gin shalat galaw shakut chye nga ga ai, kaja ga yang, anhte ni a sak prat hta galaw lu ai atsam ni gaw, tatut galaw nga ai hta, grau lu galaw ai hpe, malawng maga nchye nga ga ai, Career zawn kan bau magam lam kaw sha nrai nga ai, masha langai a galaw lu ai atsam ni hpe, anhte ni gaw, shadang hpring akyu njashawn nna, tinang a atsam htum sai ngu shadu nna, hkring kau chye nga ga ai ndai lam ni a majaw sha, masha langai hte langai rawt jat awng dang lam ni shai mat wa nga ai mung rai nga ga ai

Ramma ni hta, rawt jat galu kaba mayu ai myit grau ai, kaja katu nga yang tinang a galaw lu ai atsam ni gaw shatsaw nga sai hte  galaw lu nga saga ai mung rai nga ai, anhte ramma ni a myit hta, galaw lu ai atsam ni gaw hpring hkra nga nga ninglen, nshaw jai lang yang, htum mat wa na aten ni gaw lahpawt hpa rai nga ai, dai hta anhte ramma ni a sak prat gaw kadun la nga ai hte, dai aten ni majoi shalai kau dat yang, sak ram kaba wa ai aten ni hta, mayak lam ni la taw nga sana mung rai nga ai.Dai majaw rawt jat galu kaba mayu ai ni a matu gaw, galaw lu ai atsam ni gaw galaw taw nga ai hta grau nga ai lam chye nga ai majaw shakut nga ai ni nga nga ai, hkrak tsun nga yang, anhte galaw nga ai lam gaw, 100 % hta 20 ram sha rai nga ga ai, ngam ai 80 kaw na 50 ram du hkra sha anhte galaw lu ai rai yang, n awng dang na lam hpa nnga nga ai.

Tatut na mabyin masa lam , byin nga tara ni a ntsa, malawng maga gaw myit dik nga chye nga ga ai, dai aten hta, du nga ai shara kaw na nlu tawt lai nna, dai shara kaw sha myit dik chye nga ga ai ndai zawn byin nga ai hpe, Comfort Zone kaw na nlu tawt lai lu ai lam ngu mai tsun nga ga ai, lam shagu hta grau mayu nga yang, madu hkum madu  arang bang ai lam ni shawng nnan hpang galaw ra nga ga ai, dai aten hta anhte ramma ni a galaw lu ai atsam ni ngalaw nmai shatsaw galaw hkawm sa ra nga ga ai, aten ni hpe gara hku hparan lajang nna, gara aten ladaw du yang gara madang du ra nga  ai ngu ai yaw shada lam ni tawn da lu nga yang she, tinang a galaw lu ai atsam ni tsaw lung wa na rai nga ai, dai zawn lam yang maga shagu kaw nna, ramma ni, galaw lu ai atsam ni shatsaw nna galaw nga ai ramma ni a matu, galaw lu ai atsam ni gaw galaw nga ai hta, grau tsaw wa nna, awng dang ai lam mung ni wa lu na rai nga ai.

#Youth

#rvakachinservice