Wa Sarabyin Leo XIV gaw, shi hkring sa nga ai Castel Gandolfo kaw nna, July 26, Laban shani, Angelus mungga hta, shinggyim masha ni a prat hpe galai shai ya ai sutgan langai hku nna, Karai Kasang a Mungdan a makoi magap da ai lam hpe myit sumru yu let tsun shadum n –gun jaw lai wa ai.
Makoi da ai sutgan hte manu dan ai lung seng (Mt 13:44-52) ngu ai Kabu Gara Shiga ga shadawn ni hpe tsun sang lang dan let, Karai Kasang a Mungdan gaw grai sung ai kabu gara lam hpe jaw ya ai majaw, yawng mayawng hpe tawn kau da ai gaw sum mat ai n rai sai, akyu hkam sha ai lam re, nga nna Wa Sarabyin tsun da nga ai.
“Shi a Mungdan hte hkrum katut ai gaw, prat hpe shadawn sharam n tawn da ai sha, grau kaba wa shangun ai galai shai wa ai lam hpe madi madun nga ai” nga nna Wa Sarabyin tsun ai. “Anhte maga kaw nna lama ma galai shai ra ai rai yang, anhte a prat hpe grau kaba ai byin mai ai lam ni de hpaw ya lu na matu sha rai nga ai.
Wa Sarabyin gaw, Yesu gaw, hkai lu hkai sha ai ni, hpaga la ni, nga hkwi ai ni, laika ka ai ni, muk shachyip ai num ni, nta gap ai ni, uphkang ai ni, sagu rem ai ni a prat kaw na, ga shadawn ni hku nna, Mungdan a tsawm htap ai lam hpe hpaw shadan dan ai hpe madi madun da nga ai.
Ndai ga shadawn ni hku nna, Yesu gaw Mungdan hpe masa amyu myu hta hkrum katut mai ai lam hpe madun dan nna, masha shagu hpe — num la, kaji kaba, matsan mayan, sut su ai ni hpe — sung htum ai gram lajang lam de shaga la nga ai.
Hkristu hta kahkyin gumdin ai Nawku hpung langai
Dai ni na Nawku hpung gaw ndai zawn re ai amyu bawsang amyu myu hpe madun dan nga ai, n bung ai npawt nhpang, htunghking hte lit magam n bung ai masha ni hpe kahkyin gumdin shangun ai, yawng hpe Yesu Hkristu hta kahkyin gumdin ai lam hpe chye na na matu shaga la ai, nga nna Wa Sarabyin Leo tsun ai. “Shi gaw makoi da ai sutgan, manu dan ai lung seng, bra ayai nga ai ni hpe shinggyin la lu ai sumgawn rai nga ai” nga nna mung tsun da nga ai.
Shawng nnan kaw nna, Yesu gaw shi a grup yin hta n rai yang galoi mung n hkrum yu ai masha ni hpe shinggyin la nna, Karai Kasang gaw shadawn shadang n nga ai, shi a tsawra myit gaw grau nna kaji kaba, n hkan yu hpe madun dan ai.
Teng sha ahkyak ai hpe chye na ai
Wa Sarabyin Leo gaw, kam sham ai ni hpe, ramma hkawhkam Shawlumon tam ai kumhpa hpe hpyi shawn na matu saw shaga ai: teng sha manu dan ai lam hpe chye na hkap la lu ai hpaji byeng-ya hpe hpyi na matu.
Hkristan ni gaw, tengman ai sutgan hpe chye na na matu sharin la ra ai: Karai Kasang hte kanawn mazum ai lam gaw, masha ni hpe kabu gara lam de hpaw ya nna, langai hte langai grau kaja ai kanawn mazum lam hpe gawgap ya lu ai, nga nna tsun ai.
