Readings: 1st: Ish 22, 19-23; Ps 137, 1-3.6. 8; 2nd: Rom 11, 33-36; Gos: Mtt 16, 13-20
Karai Kasang a sung htum ai lam ni kade daram sut su nga ai ahka– shi a hpaji byeng-ya hte machye machyang kade daram sung nga a hka…Shi kaw hpung shingkang a nga nga u ga. Amen!” Dai ni na daw 2 kaw na ndai mau hpa hte tsawm htap ai kabu gara ai lam a ntsa kaw nna, ndai 21 ngu na Laban shani hta anhte a myit sumru ai lam hpe laksan hku nna nawku hpung gaw anhte hpe “chyoi pra ai hkrit hkungga” hte hkungga lara ai lam, Madu hpe lata la ai shaloi, shi hpe shakawn shagrau ai lam galaw hpang wa ga ai. shi hkum shi anhte hpe hpaw shadan dan ai raitim), shi a hkang da ai tara ni hpe hkungga lara lu na, shi a galu kaba ai lam hpe manu shadan lu na, mau hpa lam ni hte hpawng de nna, dai ni Pawlu yan Petru zawn shi teng sha kadai re ai hpe kaga masha ni hpe tsun dan lu na matu re.
Num kasha langai hpe ndai hku san ai: “Na a kawa gaw kadai rai nna, shi hpe gara hku tsun dan na kun?” Shi gaw mau hpa myit sumru ai lam hta mat mat ai zawn, second loi mi na hkra zim rai mat ai. Hpang jahtum, shi gaw nden marai lu la nna, ndai hku bai htan ai: “Nye Wa i?” Shi bai htan ai. “Shi gaw jahpawt ngai garai n rawt shi yang nta kaw na pru mat wa ai; ngai yup pyaw nga sai aten hta nta de bai wa ai, kalang lang chocolate, ice cream, cake, hkaulan pung, hte muk shading ni hpe lang wa ai wa, “Dai gaw nye wa re, raitim, ngai shi hpe galoi mung n chye na ai” Hpang jahtum, shi hkrap let tsun wa ai. Ndai num kasha gaw shut ai kun, mara shagun ra ai kun? Yawng n re! Ndai gaw shi lu da ai shi a kawa a sumla rai nna, shi a mara n kap ai hta, shi gaw dai hpe ka da nna, shi a hkam sha lam ni hpe tsun dan ai. Ndai num kasha zawn (shi a mabyin hta teng ai wa) anhte nkau mi gaw Karai Kasang hpe grai jahpoi asawng ai hku mu mada ai, nkau mi gaw shi hpa na matu tsap nga ai, hpa galaw lu ai ngu ai hpe shut ai hku mu mada ai, rai tim nkau mi gaw shanhte a matu Yesu kadai re ai ngu ai hpe shanhte a ningmu the sawn la ai. Na a matu Yesu gaw kadai rai ta?
Yesu gaw shi a sape ni hpe san ai ga san hpe anhte hpe san ai rai yang—‘Masha Kasha gaw kadai re ngu masha ni tsun ma ai kun?’—teng sha nga yang, anhte yawng gaw Shi gaw Yesu, Trinita hta lahkawng ngu na wa rai nna, Shi gaw Yosep yan Mari a kasha Yesu re ngu tsun na re. Ndai mahtai ni gaw anhte a myit masin hpe shadut ya na re.
Raitim, anhte a myit masin kata de sung sung myit yu yang, ‘Anhte a matu Yesu gaw kadai rai ta? Yesu hte anhte hkum nan hku hkau lam nga yang, anhte a mahtai gaw: Shi gaw Yesu, nye a Karai Kasang, Hkyela Madu, nye a matu galoi mung nga nga ai Jinghku rai nga ai.
Yesu hpe tinang nan chye chyang lu na matu Chyum Laika hpe hti ra ai, grau nna Mahte, Marku, Luka hte Yawhan laika ni hpe hti ra ai. Hpa majaw nga yang, ndai Kabu Gara Shiga mali hta she, Yesu gaw kadai re ai hpe sung sung chye na lu na re. Chyoi Pra ai Missa Hkungga hta Yesu galoi mung nga nga ai majaw mung, Chyoi Pra ai Missa Hkungga hpe ayan sa lawm ra ai.
Karai Kasang a mungga hti madat ai daw hta atsawm sha madat hkam la nna, chyoi pra hkum hkam ai daw hta Yesu hpe Jau hku nna, nawng jau ya nna, Yesu hpe hkam la ai. Chyoi pra hkum hpe shabyin ai shaloi, shinggyim masha ni a muk hte tsabyi gaw, Yesu a hkum hte sai, galai shai mat wa ai.
Chyum Laika hpe hti lu yang; Chyoi Pra ai Missa hkungga hta myit maju jung nna, sadi maja let shang lawm nna, hti dan ai Karai Kasang a mungga ni hpe mung, jau, hkinjawng wa hkaw tsun ai Kabu Gara Shiga hpe mung, atsawm sha madat mara la ra ai.
Shi a shamu shamawt ai lam shagu hpe sadi maja let —, anhte dai zawn rai yang, hpang jahtum e, Chyoi Pra ai Wenyi a chyeju gaw anhte a ntsa e nga na re. Anhte a Madu hte Hkyela Madu Yesu hte grau sung ai hku hkau lam a npawt nhpang rai na re.
Dai shara kaw nga ai sape ni hta, ‘Nang gaw hkrung nga ai Karai Kasang a Kasha Hkristu rai nga ndai’ ngu tsun ai wa gaw Simun Petru chyu sha rai nga ai. Yesu gaw shi hpe htan ai hta, ‘Yona a kasha Simun e, nang a lu ndai, kaning rai nme law, hkum shan hte asai gaw nang hpe ndai lam shadan dan ai nrai, sumsing lamu na nye Wa she shadan dan ai’ (Mahte 16:16-17).
Simun Petru gaw Yesu a teng man ai lam hpe chye lu ai gaw Karai Kasang kaw na jahtoi ya ai chyeju rai nga ai. Sape ni hta na Petru hpe hpa majaw lata la ai kun? Petru gaw Yesu hte galoi mung ni htep ai majaw rai na re; shi hta Madu a hpung hta galoi mung nga lu na matu kawsi hpang gara ai myit nga ai.
Ga shadawn, Yesu bum de ahpraw nsam galai na matu sa wa ai shaloi, Petru mung dai kaw lawm nga ai (Mahte 17). Yesu hka ntsa hkawm ai shaloi, Petru mung hka ntsa hkawm nna Yesu hpang de sa wa ai (Mahte 14:29). Yesu hpe rim la na hkyen ai shaloi, hpyen ma Malku a na hpe kahtam nna Yesu hpe makawp maga ya ai wa gaw Petru nan rai nga ai (Yawhan 18:10).
Petru gaw Yesu a lup sung hku kata de shawng nnan shang ai kasa mung rai nga ai, (Luka 24:12). Bai nna Petru gaw Yesu hkrung rawt ai hpang shawng nnan dan pru ai kasa rai nga ai, (Luka 24:34). Teng sha nga yang Petru hta mung shi a n-gun kya ai lam ni nga ai, hpa majaw nga yang shi gaw Yesu hpe ningdang kau ai raitim shi ningdang kau ai lam ni a majaw myit malai lu ai.
Yesu gaw Petru hpe shi a marang e Nawku Hpung a ningbaw aya hpe jaw nna shagrau ya ai: ‘Ngai nang hpe tsun de ga, nang gaw Petru rai nga ndai: ndai lunghkrung ntsa e nye a Nawku Hpung hpe ngai de da na we ai rai nna, nga rai chyinghka ni gaw dai hpe dang kau lu na n rai’ (Mahte 16:18) ngu tsun ai. Ndai gaw ya anhte shang lawm nga ai Kahtawlik Nawku hpung langai rai nga ai. Anhte a shawng ningnan na Wa Sarabyin rai nga ai Peter kaw nna, ya anhte a Wa Sarabyin rai nga ai, Petru a hpang 267 lang ngu na Wa Sarabyin Leo XIV du hkra rai nga ai.
Anhte a prat ngut ai hpang, Masha Kasha gaw kadai re ngu masha ni tsun na nga ma ai kun? Dai aten laman Yesu hpe gara hku htai na kun?