Readings: 1st: Jer 20, 7-9; Ps 63; 2nd: Rom 12, 1-2; Gos: Mtt 16, 21-27
Daini gaw, pranwan ladaw hta 22 ngu na Laban shani rai nga ai. Shawng de na zawn, chyoi pra ai kanu nawku hpung gaw, Karai Kasang kaw nna asan sha shaga ai hpe hkum tsup ai hku, kaja ai hku htai la na matu shakut shaja ai hta, anhte shani shagu hkrum katut nga ai yak hkak lam ni hte pat shingdang ai lam ni hpe chye na hkam la let, anhte hpe kata lam hte shinggan lam lahkawng yan hpe lai di nna, n ra sharawng ai lam ni hpe lai di lu na matu, anhte hkum anhte hpe ninghkap ai lam ni hpe ap nawng na matu n-gun jaw nga ai. Hkristu hkum nan hpe hkrung nga ai, chyoi pra ai hte gingdan ai hkungga hku nna, si ai kaw nna asak hkrung lam de hkye hkrang la hkrum lu na matu lam madun lai wa sai.
Ndai Laban shani na chyum mung ga yawng gaw, lam langai sha de woi sa wa ai – shinggan na pat shingdang ai lam ni, kata na ninghkap ai lam ni pyi nga tim, Karai Kasang hpe tinang hkum hpe ap nawng ra ai lam. Anhte nkau mi gaw Yeremia zawn matut nna aput a ngun nga ai (Yer 1, 4. 17), Petru zawn, Karai Kasang a myit ra ai lam hpe hkan sa na matu n-gun ja ai hku shakut nga ai kaga masha ni a maga de “ding bai dingna” hte “hka madi ai n ba” hku nna tinang hkum hpe madun dan nga ai.
Ndai Laban shani na daw 1 hta Yeremia –Shi gaw yawn hkyen ai: “Madu nang ngai hpe masu kau sai” shing nrai “hkalem kau sai,” “ngai hpe dang sha kau sai” Shi tsun nga ai gaw, “Karai Kasang e, ndai lam a matu ngai n’hkap la ai! Karai Kasang nang ngai hpe hpa majaw ndai hku galaw ai kun? Ndai lam yawng hpe hkam la na matu ngai hpa mara galaw kau ai kun? Yeremia ninghkap tim, Karai Kasang a npu e nga nga ai: “…ngai mung hkalem hkrum na ahkang jaw kau nngai”. Kalang lang Karai Kasang ra sharawng ai hpe galaw yang, hkam kaja, sut su, yawng tsawra hkrum na ngu ai myit masa npu hta asak hkrung nga ga ai. Raitim dai gaw galoi mung n’teng ai. Karai Kasang hpe sadi dung ai gaw kalang lang tsin-yam tsindam, chyam dinglik lam, myit daw myit hten ai lam ni hpe shabyin ya ai, shi gaw hkrit hpa tsin-yam tsindam ni hpe hkam sha shangun ai. Raitim, ndai lam ni yawng nga tim, Shi gaw anhte hpe shaman ya nna makawp maga ya nga ai.
Daw Lahkawng hta, Pawlu gaw tara hta grau nna chyeju ga hpe jai lang nna anhte hpe ndai hku hpyi nem ai: “Karai Kasang ra sharawng ai chyoi pra ai hte hkrung ai hkungga zawn, nanhte hkum nan hpe nawng ya mu.” Ndai shara hta, ninghkap ai lam nnga ai sha, n-rup n tsen lam n nga ai sha, Karai Kasang a npu e nga nga na matu Pawlu shaga nga ai. Anhte a hkum hkrang hpe madun dan ai gaw anhte a atsam marai ni hte anhte a hkum hkrang yawng hpe ap nawng kau ai lam rai nga ai. Karai Kasang hpe tsep kawp ap nawng ai lam re. Ndai hku tsep kawp ap nawng ai lam gaw, dinghpring ai, kabu gara ai, simsa ai, Hkristu hta awng dang ai prat hpe lu la na matu ahkyak nga ai.
Teng sha nga yang, tinang hkum hpe tsep kawp nawng ya ai ngu ai gaw, dai hte rau du sa ai lam yawng hpe hkap la ai lachyum re. Dai ni lahkawng lang ngu na shaga la ai lam hta, Pawlu gaw ndai mungkan hte n rai, Hkristu hte maren hkan sa ra ai ngu nna ngang ngang kang kang tsun nga ai. Anhte hkum nan Karai Kasang hpe tsep kawp ap nawng kau ai shaloi, Hkristu hte bung lu na re. Hkristu hte bung ai ngu ai gaw Hkristu zawn asak hkrung ai lachyum re.
Shi a hpung shingkang hpe mada yu let shi a asak hkrung lam hte si hkrung si htan hta shang lawm ai lachyum rai nga ai. Lachyum gaw ya Hkristu gaw Chyoi Pra ai Wenyi a marang e anhte hta asak hkrung nna amu galaw nga ai (Gal 2, 20). Ndai lam gaw hpung shingkang rawng ai chyoi pra ai ni galaw ai lam rai nga ai. Shanhte gaw Hkristu a asak hkrung lam, si hkam ai lam, bai hkrung rawt ai lam ni hta shang lawm ai hku nna shi a npu e nga nga nna, shi hte maren hkan sa ma ai. Ya gaw, Shi a hpung shingkang hta shang lawm nga ma ai.
Daini na kabu gara shiga hta, prat a maw lanyet hpe mu lu ai. Lai wa sai bat hta Hkristu gaw messiah re ngu nna ndau shabra ai Petru nan, dai ni “Satan” ngu nna daru kau hkrum nga ai. Shi a sasana magam bungli hpe pat shingdang ai wa re majaw Hkristu shi hpe daru kau ai. Ndai lam gaw, Petru Hkristu gaw Meshia re ngu tsun tim (Karai Kasang shi hpe hpaw shadan dan ai hte maren), Hkristu a sasana magam bungli a shingra tara hpe atsawm n chye na shi ai hpe madun dan nga ai.
Hkristu hpa majaw ndai hku tsun ra ai hpe Petru n chye na ai. Raitim, Karai Kasang a shaga la ai lam gaw shi a hpung shingkang hta shang lawm na matu sha n-ga, shi a nni nkri hta shawng shang lawm na matu mung rai nga ai. Ndai gaw Hkristu galaw ai lam rai nga ai. Shi hkum nan hkrung ai hkungga hku nna nawng ya ai ngu ai gaw, anhte a hkye hkrang la hkrum na matu, tinang hkum hpe n myit ai sha, yawng mayawng hpe ap kau ai lachyum rai nga ai. Raitim, Petru gaw Hkristu a si hkrung si htan ra kadawn ai lam hpe n chye na shi ai: “amyu ting hten za mat na hta, amyu masha ni a matu marai langai mi si na gaw grau kaja nga ai.” (Yh 11:50).
Myit n-gun kya ai wa gaw, teng man ai sape tai ai ngu ai ndai paradox hpe mu nna, loi loi hte myit daw myit hten mat na re. Raitim Madu hpe teng sha sadi dung let hkan nang mayu ai rai yang zingri zingrat hkrum na matu, yak hkak hkrum na matu hkyen lajang da ra ai hte anhte a tengman ai sape tai wa na matu si na matu pyi hkyen lajang da ra ai.
Sai hpring tsup ai hkan nang hkan sa ai ni gaw, shanhte a lam hta du wa na tsin-yam tsindam, wudang ni hpe galoi mung hkrit tsang na n rai. Hpa majaw nga yang, shanhte a yak hkak ai lam ni, zingri zingrat hkrum ai lam ni a lapran hta, shanhte a lahkam shagu hta Yesu gaw shanhte hpe n-gun jaw, lam madun ya na matu galoi mung nga nga na hpe chye nga ai majaw re.
Dai majaw, tsin-yam tsindam, zingri zingrat ai lam (sh) si hkrung si htan hpe hpa majaw hkrit ra ai kun? Asak gaw gara hku mi rai rai aten kadun laman sha rai nna, dai hpe lai nna anhte a prat hpe n’madu ai, Karai Kasang madu ai. Yesu hpe sadi dung let hkan nang ai majaw tsin-yam tsindam hkrum ai rai yang lani mi hta shabrai lu na hpe myit mada nga ga ai.
Ndai mungkan hta anhte a prat hta anhte a lam de n du wa na re raitim, hpang jahtum e ndai ya na prat hte htani htana prat hpe garan ginhka ai lamu ga jarit hpe lai di ngut ai shaloi shabrai nga na teng sha rai nga ai.