77. 2016 ning hta San Pra ai Calcutta mare na Teresa gaw, shinggyim wuhpawng kaw nna kabai kau ai ni hpe hkap la ai hku nna, hkum tsup ai, sak hkrung nga ai tsawra myit a matu mungkan ting na masat dingsat langai mi tai wa sai. Missionaries of Charity hpe hpaw ninghtan ai wa rai nna, shi a prat hpe India mungdan lam ntsa ni hta tawn kau da hkrum ai si wa nga ai masha ni a matu ap nawng lai wa sai. Shi gaw tawn kau hkrum ai ni hpe shinggyin la nna, shanhte a hkala nba ni hpe kashin kau nhtawm, matsan dum myit hte si ai aten du hkra manang tai ya lai wa ai. Matsan mayan ni hta shi a tsawra myit gaw, shanhte a arung arai ra kadawn ai lam ni hpe yu lajang ya ai sha n-ga, shanhte hpe Kabu Gara Shiga hpe mung hkaw tsun ai lachyum rai nga ai: “Anhte gaw matsan mayan ni hpe Karai Kasang shanhte hpe tsawra ai, anhte shanhte hpe tsawra ai, shanhte gaw anhte a matu marai langai ngai re ai, shanhte mung Karai Kasang a lata hte hpan da hkrum ai ni rai nna, dai zawn re ai masha ni hpe tsawra ai. Matsan masha ni gaw masha kaba ni, tsawra myit rawng ai masha ni re, shanhte gaw anhte a matsan dum myit hpe n ra ai, anhte a hkungga lara ai lam hpe ra ai shanhte hpe anhte hkungga lara ai hku kanawn mazum ai lam hpe ra ai.”
Ndai lam ni yawng gaw, matsan dik htum ai ni hpe daw jau ai lam hpe akyu hpyi ai hte tsawra myit a asi, tengman ai simsa lam a npawt nhpang hku mu mada ai sung htum ai wenyi lam kaw na pru wa ai rai nga ai, Wa Sarabyin Yawhan Pawlu II gaw shi hpe shaman chyeju hkam la na matu Roma de sa du ai nawku hpung a salang ni hpe shadum ai zawn: “Mother Teresa gaw shi hkum shi kaga masha ni hpe daw jau ai lam hta tsep kawp tawn da lu na n-gun atsam hpe gara kaw na lu la ai kun? akyu hpyi ai hta mung, Yesu Hkristu, shi a Chyoi Pra ai Myi man, shi a Chyoi Pra ai Myit masin hpe atsin sha myit sumru ai lam hta mung, shi hkum nan mung dai hku tsun ai: ‘Atsin sha nga ai a asi gaw makam masham rai nga ai; Teresa gaw shi hkum shi shinggyim masha ni hpe karum shingtau ai wa (sh) shamu shamawt ai wa ngu n sawn ai sha, wudang hta jen da hkrum ai Hkristu a num ningnan langai mi hku nna, shi a nni nkri hkrum nga ai hpunau nauna ni hpe tsawra myit hte daw jau ai wa langai mi hku nna sawn la ai.
78. Brazil mungdan hta, San Pra ai Dulce of the Poor — “Bahia a kaja ai lamu kasa” ngu nna shamying ai — gaw, Brazil mungdan a arawn alai ni hpe hkan nna, dai kabu gara shiga hkaw tsun ai wenyi hpe shadan dan ai. Shi hte kaga wuhpung na Mama lahkawng hpe mung ndai poi langai hta sha san pra ai hku masat da ai lam hpe tsun let, Wa Sarabyin Francis gaw, shinggyim wuhpawng kata na shingdu tawn da hkrum ai ni hpe tsawra ai lam hpe bai myit dum let, sanpra ai masha nnan ni gaw “chyoi pra ai asak hkrung lam gaw mungkan hta tsawra myit a hkrun lam re ai hpe anhte hpe madun dan ai” nga nna tsun ai. Mama Dulce gaw n mai byin ai lam hpe gyin shalat ai lam hte, pat shingdang ai lam ni hpe matsan dum myit hte ra kadawn ai lam ni hpe atsam rawng ai makam masham hte htai ya ai. Shi gaw machyi masha ni hpe U lawng kaw hkap la hpang wa nna, dai kaw nna mungdan kata hta kaba dik htum shinggyim nga pra masa magam bungli langai hpe hpaw ninghtan lai wa sai. Shi gaw lani mi hta wan hku law ai masha ni hpe garum shingtau ai, shi a sumnung shingdi ai lam hpe galoi mung n sum kau ai sha, Matsan dik ai wa a tsawra myit a matu matsan ai ni hte rau shi hkum shi matsan hkam ai. Shi gaw loi mi the sha nga nna, myit rawt let akyu hpyi nna kabu gara let daw jau ai. Shi a makam masham gaw mungkan hte tsan gang shangun ai n rai, anhte hta na kaji dik htum ai ni a hkra machyi ai lam de grau nna sung sung shang yu shangun ai.