Kasa htingnu na hkuwawt kaw nna, Wa Sarabyin Leo XIV gaw, dai shani na nawku daw jau ai lam hta mu lu ai “myit mang ai lam hte galaw sa wa na matu madung masat masa ni” hpe myit sumru let, shi a Angelus Mungga ga hpe tsun shaga lai wa ai.
Roma masha ni hpang de San Pawlu a laika hta, hkang da ai ga shagu hpe shingdaw nna, “Na a htingbu wa hpe, na a hkum hte maren tsaw ra u” (Rom 13:9). Ndai lam hta jat bang da ai gaw, shawng na chyum daw kaw na la ai rai nna, masha shagu gaw “shada da tsaw ra ai hta lai nna, kadai hpe mung hka n kap uga ” ngu ai hpe ahkyak shatai tsun da ai.
Wa Sarabyin Leo gaw, hka hpe raw dat kau ya ai lam hpe gara hku hpyi shawn na, gara hku jaw na ngu ai hpe Yesu sharin ya ai lam hpe madi madun da nga ai. Raitim, Wa Sarabyin gaw, “anhte hpe mayam n shatai ai hka langai mi nga ai, dai gaw shada da tsawra hkat ai hka re” nga nna ahkyak shatai tsun da nga ai. Masha langai hte langai lu la ai lanu lahku ai lam, kaja ai lam, myit tau ya ai lam ni gaw anhte hpe lawt lu shangun nna lit la chye shangun ai.
Tsawra myit lam lahkawng
Kabu gara shiga hta, Hkristan ni shada da tsawra myit hpe hkan sa na matu lam lahkawng hpe Yesu tsun da nga ai.
Shawng nnan na gaw, hpunau nauna shading sharai ai lam hpe jaw, hkam la lu ai lam rai nga ai. “Ndai gaw, grai law hkra malap kau hkrum ai, n-gun kya ai shingni langai mi rai nna, asan sha tsun shaga ra ai, loi loi hte galaw ra ai” nga nna Wa Sarabyin Leo sang lang dan ai.
Shada da tengman ai hku tsun shaga lu na matu- langai hte langai, dai hpang wuhpung kaji langai hte, dai hpang wuhpung wuhpawng ting hte- tengman ai lam hpe man hkrum rai nna manghkang ni hpe shamat shaprai wa ai de galai shai kau ra ai.
“Kaga masha ni hpe marawn jahtau, n kaja ai hku tsun shaga ai gaw grau loi ai, raitim hpa mung n galaw lu ai sha, masa lam law law hpe n-gun n rawng hkra tawn da ai” nga nna Wa Sarabyin matut tsun ai, “Kabu Gara Shiga gaw, de a malai, tsawra myit hku nna lu la ai lawt lu lam hpe sharin ya nga ai.”
Lahkawng ngu na lam gaw masha shagu hpe kahpu kanau zawn tsawra hkat na matu shaga nga ai. Yesu a matu, ndai lam gaw akyu hpyi ai lam hpe pyi myit hkrum lam de galai shai kau ya ai.
Dai shani na Kabu Gara Shiga hta, Yesu tsun ai gaw, “Nanhte hta na marai lahkawng gaw, ga ntsa e myit hkrum nna, hpyi myit yang gaw, sumsing lamu na nye Wa gaw, dai hpe nanhte a matu jaw ya na ra ai” (Mt 18:19). Ndai ga sadi gaw ra sharawng ai lam, yawn hkyen ai lam, myit mada lam ni hpe garan gachyan lu ai lam hte akyu hpyi ai lam gaw masha ni hpe kahkyin gumdin lam hta rawt jat galu kaba wa lu na matu gara hku tsun shaleng dan ai lam rai nga ai.
“Makam masham n nga yang, marai langai hpra gaw shi hkrai sha hkamsha nna, kaga masha ni hpe n chye ai masha, hpyen zawn mu nna, kam shut chye ai” nga nna shi sang lang dan ai. Chyeju a marang e, anhte langai hte langai gaw, myit hkrum kahkyin gumdin nga lu ai hpunau nauna ni tai wa ga ai: “shada da hkrum zup nna, shada da mara raw ya hkat nna, Madu hta shada da madat mara hkat ra ai”
