Karai Kasang a mungga hpe nang gara hku hkap la ai kun? Ga shadawn, chyum laika hta Yesu a ga hpe hti ai shaloi, dai hpe myit sumru yu nna, chye ginhka nna, garan gachyan ai kun? Shing nrai, nang hti ngut ai hpang, hti ai shaloi, lak lai ai masa hpa mung n byin ai sha ngut mat ai kun?

Chyoi Pra ai Missa hkungga hta Karai Kasang a mungga hpe ndau shabra ai hpe na ai shaloi nang gara hku bai htang nga ai kun? Dai gaw nang hpe shadut na matu ahkang jaw ai kun? Kaja ai lam galaw na matu hte na a makam masham hpe sak hkrung na matu kalang ta shadut ya ai majaw, na a shinggyim manang ni a prat hta kaja ai Impact byin wa lu ai kun?

Yesu a ga gaw anhte a myit masin hta Shi hkai da ai nli rai nna Yesu myit mada ai lam gaw anhte a matu galoi mung asi si ai hkan nang hkan sa ai ni tai na matu rai nga ai. Kaga masha ni anhte kaw na Yesu hte anhte a makam masham hpe sharin la lu ai shara rai ra ai. Karai Kasang a mungga hpe asan sha hkap la nna hpa mung n galaw ai sha, mying hte sha hkan nang hkan sa ai ni tai wa na matu ahkang n jaw ging ai.

Dai majaw Yesu tsun ai mungga ni hpe garan gachyan ra nga ga ai. Dai hpe galaw na matu anhte jai lang na aten hte gumhpraw ni hpe sawn yu n ra ai. Kaning rai nme law, Yesu gaw Shi a sharin achyin ai lam ni hpe ndau shabra na matu anhte bang da ai aten hte sutgan ni hpe htam latsa bai jaw na rai nga ai.