Daini na Ja Chyum Mungga hpe hti sumru yu ai shaloi e, aten shagu maja nga ra ai lam na chye lu ga ai. Kabu gara shiga kaw na jin jin rai nga ai ga shadawn hte e, n myit mada da ai aten hta du sa wa na ra ai Madu Karai Kasang hpe hkap tau la lu na jin jin rai ra na sadi jaw da nga ai. Nanhte gaw n shang e shingkyit kyit, wan shadaw shachyi da nga mu. Shing kyit kyit da ai gaw, galaw sa na matu jin jin re ai lachyum rai nga ai. Wan shatu da ai gaw, kam sham myit hte kaja ai lai kyang ni a kumla re. Dai zawn re ai myit masin hpe gram lajang da lam ni rai nga ai.

Anhte shinggyim masha ni gaw mai kaja ai lam hpe galaw na matu abwi sha nga nna aten gang da chye nga ga ai. Dai majaw kabu gara shiga hta e, anhte gaw Karai Kasang ra ai lai ladat hte sak hkrung nga sa lu na hte, n myit mada ai aten hta, Madu du sa na hpe jin jin rai nga ra ga ai. Dai rai nna, sadi dung ai hte myit hpe shajin da let, Madu Karai du sa wa na hpe ala taw nga na matu yawng hpe saw shaga nga ai re. Lagut zawn aten n`tam ai du sa wa na si hkrung si htang lam a matu tut e lajang shajin da ra na lam yawng hpe sadi jaw da nga ai majaw tut e sadi maja let nga sa ga law.