Daini na Ja Chyum Mungga hpe hti sumru yu ai shaloi e, Yesu a Sape tai mayu yang hkan sa ra ai tara lam ni na la lu ga ai. (Lk 14:27) hta ning nga ka da ai. Kadai mi raitim, tinang a wudang hpai let, nye a hpang n hkan ai wa gaw, nye a sape n tai lu ai. Anhte masha shagu hta Wudang nga ga ai. Masha langai hpra a wu dang ngu ai gaw, Madu Karai gaw masha shagu a matu, lit magam n kau mi jaw da nga ai. Dum nta kata hta galaw sa ra ai lit magam, ap nawng ai magam lam ni hta galaw sa ra ai lit mung lu nga ai.

Matut nna madu tinggyeng galaw sa ra ai lit magam, Madu a kashu kasha ni a matu galaw ra ai lit magam nga n na, dai lit magam ni hpe jaw da nga ai.

Raitim masha n kau mi gaw, dai lit magam ni hpe hkap la na yak la nga ai. Bai jaw ya sai lit magam ni gaw, Madu Karai a myit ra ai lam re ngu hkap la na matu ninghkap chye nga ma ai. Ndai lit magam ni gaw ngai hte n seng ai nga nna ning dang chye ma ai. Raitim mung  ndai lam yan ni gaw ngai a prat, Madu Karai jaw ya ai laksan kumhpa, Karai Kasang ra sharawng ai lam re ngu nna, wudang lam re ngu ai lit magam hpe hkap la ai rai yang sha, Yesu Madu a jet ai Kasa ni byin na rai nga ga ai. Shingrai anhte mung na la sai mabyin lam ni hta e, shakut hkawm sa lu hkra ta tut hkan sa nga ga law. Daini gaw San pra ai Charles Boromeo a poi shani mung rai nga ai. Dai majaw, Wa saradaw kaba Cardinal Charles Bo a matu mung laksan akyu hpyi ya nga ga law.