Chyoi Pra Ai Nu Maria Hpe Lamu De Woi Shalun La Ai Poi
Tawra hkungga ai Nu Wa hpu nau hpung masha ni, dai ni gaw “Chyoi Pra Ai Nu Maria Hpe Lamu De Woi Shalun La Ai ” poi nthoi rai nga ai.
Chyoi Pra ai Nu Maria gaw shi a mungkan sak prat htum mat ai hpang, ga kata e lup makoi hten za ai n hkrum ai sha hkum hkrang hpe Wenyi hte hpawn sumsing lamu de woi la hkrum ai lam hpe kam sham ai lam galaw nga ga ai. Ndai lam hpe nawku hpung a kam ra ai lam (dogma) hku nna Wa Sara Byin Pius XII kawn 1950 ning hta matsun masat dat ya sai re. Kaji kajaw shai ai lam nga ai raitim, sin praw hte sin na Chritian nawku hpung masha ni gaw tsa ban mali hkan kaw nna “Yup Pyaw Mat Ai” poi (the feast of Dormition) shing nrai “Lamu de shalun la ai” poi nhtoi hku, masat nna hkap la kam sham hpang wa sai re.
Ndai makam gaw ru di madung n nga ai sha byin wa ai makam n rai nga ai. Chyum mungga hta madi madun da ai lam ni hta mahta nna byin wa ai makam rai nga ai. Ga shaka ding sa hta bai n htang hti yu yang Karai Kasang gaw shi laksan shagrau san da ai shi a nchyang mayam ni hpe
shi hpang de ding tawk woi la ai lam hpe mu lu ai. Hkawhkam laika 2 hta Elia gaw Elisha a man e nan “Wan Gumra leng’ hte sumsing lamu de shalun la ai lam mu lu nga ai.
Ninghpawt Ninghpang laika (5:24) hta mung “Enuk chyawm gaw Karai Kasang hte hkawm sa nga ai rai nna, shi n nga sai, kaning rai nme nga yang, Karai Kasang shi hpe jahtawt la wu ai” nga nna ka da nga
ai.
Dai hte maren, Karai Kasang gaw Moshe hpe sumsing lamu de woi la ai nga nna Israel masha ni kam hpa nga ma ai. Moshe a lup hting lup wa mung labau hta nmu lu nga ai.
1854 ning hta Wa Sara Byin Pius IX gaw “Munificentissimus Deus” ngu ai matsun shadum laika hku nna Chyoi Pra ai Nu Maria gaw mara n kap ai Na-um Na-sin hkam ai wa re nga nna nawku hpung hpe matsun sharin dat ai. Nu Maria gaw Karai a lak san shaman chyeju hkam la lu
ai wa re majaw shi a hkum hkrang mung san seng san pra ai, chyeju hte hpring ai rai nga ai. Ga yun bai tai nna hten bya mat na hpe Karai Kasan ra sharawng na nre. Ndai matsun shadum ai lam gaw nawku hpung shaning law law hkap la kam sham nga ai lam hpe shangang shagrin dat ya nga ai.
Dai re majaw Catholic Nawku hpung hta Chyoi Pra ai Nu Maria hpe hkungga kamhpa shakawn ai lam galaw nga ga ai. Ndai zawn hkungga shakawn ai a marang e Hkyela Madu Yesu a mung sung lam ni, Nawku hpung a masa lam ni hte nawku hpung masha tai taw ai a lachyum ni hpe grau chye na manu shadan wa shangun ai lam re. Anhte shinggyim masha ni hta shanu nga ai chyeju hking htawng hpe grau chye na wa shangun ai. Anhte gaw Chyoi Pra ai Nu Maria zawn chyeju hte hpring ai ni nrai ga ai. Raitim mung Karai Kasang a shaman chyeju hte san seng san pra wa mai ai, anhte hta shanu nga ai Chyoi Pra ai Wenyi a htingnu ni tai wa mai ai, makam masham hta masha nnan, prat nnan hku nna sak hkrum na atsam shadaw ya nga ai hpe grau chye na wa shangun ai.
Wa Sara Byin Pius IX gaw “Munificentissimus Deus” matsun shadum laikai ka hpe 1850 ning a ten ni hta ka shapraw na daw dan ai mung shinggyim a sak hte sari sadang hpe manu shadan wa na matu re ngu kam ai. Tsa ban 20 ning a shawn daw hta shinggyim a sak hte sari sadang hpe manu nshadan ai mabyin ni law law byin lai wa sai. Mungkan ting hpe jahten sharun mat ai mungkan majan ni, masha hpe zingri sat ai “ngarai htawng” ni, u-nawng u-wa hpe jahten ai lak nak grau nna Nuclear lak nak ni jai lai wa ai mabyin ni ng alai wa sai. ndai mabyin ni a akyu gaw dai ni du hkra anhte hpe naw ka-up da nga ai. Russia hte Ukraine majan, Israel hte Iran majan, anhte Myanmar mung a mabyin ni hpe sha pi yu dat ga. Shada naw sat hkat nga ga ai. Malu masha hte arung arai ni hpe sha nre, shinggyim masha hpe manu shadan ai htung lailen ni hpe gabai kau nga ga ai. A sak kaba sai ni, machyi kaba hkrum sha ai ni, u-hpung u-hpawng hta garum la na lak san ra nga ai ni hpe makawp maga lakawn la na htung lai len ni hpe kabai kau nga ga ai.
Dai hta grau nna, Chyoi Pra ai Nu Maria hpe lamu de woi shalun la ai hpe hkap la kam sham ai lam gaw, anhte shinggyim masha shagu gaw Karai Kasang a kasha ni ngu ai sari sadang lu ai ni, san seng san pra ai ni re hpe myit dum shangun nga ai. Chyoi Pra ai Nu Maria hpe shakawn
shagrau ai lam mung, anhte gaw lani mi na nhtoi hta Nu Maria zawn sha Karai Kasang a man e shagrau sha-a hkrum na hpe kam hpa nna anhte a hkum hpe anhte shagrau sha-a nga ga ai re. Dai re majaw nawku hpung hte anhte yawng a kanu Chyoi pra ai Nu Maria a kyu hpyi madi shadaw ya ai a marang e anhte gaw Karai Kasang a tsawra matsan dum lama ai lam hpe ndai mung kan hta karan ya ai ni tai na matu, shinggyim asak hte sari sadang hpe makawm maga ai ni tai na matu saw shaga nga ai.
Dai ni hti ang ai “Shin Ran laika” hte Korinhtu masha ni hpang de
San Pawlu shagun dat ai laika langai hta mung Madu Yesu gaw si ai hte hten bya ai lam hpe awng dang mat wa ai lam, Chyoi Pra ai Nu Maria gaw Karai Kasang ga ndat da ai “Eva” nnan, tsa dan a baw gabye na jan re lam ni hpe madung dat ka da nga ai. Kana San Elibeth hte hkrum
ai ten Nu Maria gaw shi hte matsan tsin yam hkrum sha ai ni hta mau hpe magam shabyin ya ai karai kasang hpe shakawn ai “Magnificat” kyu hpyi gat tsun lai wa sai. Nu Maria a kyu hpyi ga hte rau Karai Kasang a mung dan ni wa ra ai lam grau myit jung nna part nnan, masha nnan, masha ni grau nna yak hkak jam jau nga ai ni hpe daw jau let sak hkrum hkawm sa wa na matun-gun jaw shatsam dat ai.
