Hkristu hta tsawra ai Nu Wa hpu nau ni e, ndai laban gaw pran wan ladaw hta laban (7) rai nga ai. Karai Kasang gaw anhte hpe shi a “tsawra matsan dum ai lam” hpe myit yu na matu ndai bat hta mung saw shaga taw nga ai.
Mungkan shingra tara masa (worldly nature) gaw anhte hpe shut ai ni hpe bai matai htang na hte tinang tinggyeng a matu sha galaw na matu aja awa tsun nga ai. Mungkan shingra tara hte shai hkra asak hkrung hkawm sa na matu, Karai Kasang a kashu kasha ni hku nna asak hkrung hkawm sa na matu ndai bat na mungga hku na anhte hpe shadum ya nga ai.
1.David madun ai matsan dum myit hpe kasi la ra ai. (1Samuel 26:2,7-9,12-13, 22-23) Chyum mungga daw langai hta David hte Sawlu Hkawhkam a lam hpe na la lu na rai nga ai. David gaw Sawlu hkawhkam hta grau nna mying kaba wa ai ten masha ni mung shi hpe ra wa ai. Dai majaw hkawhkam Saulu gaw David hpe manawn wa ai rai nga ai.
Hpa majaw nga yang Shi a shara mat na hpe shi hkrit wa ai. Dai majaw David hpe sat na matu lam tam wa ai. Raitim Karai Kasang gaw David hpe makawp maga ya ai rai nga ai. David gaw hkawhkam Sawlu hpe sat lu na ahkaw ahkang lu nga ning len dai ahkaw ahkang hpe n la lai wa ai.
David a manang rai nga ai “Abishai” gaw Sawlu hkawhkam hpe sat na maw ai shaloi David gaw“shi hpe hkum sat u; Madu a namman chya hkam ai wa hpe, kadai wa mi mara n kap ai hku hkra lu na rai ta?” ngu nna duru kau ai rai nga ai. Tsawra matsan dum chye ai myit gaw gawng kya ai lam n rai nga ai. Anhte a ningun atsam mahtang rai nga ai hpe David a mabyin hku nna anhte hpe shadum ya nga ai. Masha ni hpe matai htang na malai masha ni hpe mara dat ya luhkra mahtang shakut ra ai.
David a kasi gaw Karai Kasang a myit masin salum hpe madun ya nga ai. Anhte mara shut ai shaloi mara raw sacramentu hku nna shi jaw bai sit shang wa ai rai yang galoi mung mara dat ya nga ai. Karai Kasang gaw anhte hpe mara dat ya na matu shi a salum hpe galoi mung hpaw da nga ai.
2. Madu Yesu Hkristu hpe kasi la ra ai. (1 Cor 15: 45-49) Chyum mungga daw lahkawng hta gaw “Adam dingsa hte Adam ningnan” a lam hpe na la lu na rai nga ai. Adam dingsa gaw anhte shingyim masha ni a shingra maka (Nature) hpe madun ai hte Adam ningnan rai nga ai Madu Yesu gaw sumsing lamu a shingra maka hpe madun ya nga ai.
Adam dingsa lam hku anhte hkawm sa wa ai yang gaw tinang a matu sha myit wa ai, tinang a tingyeng a hkyu lu la na matu sha tam wa ai dai majaw mara de du shangun wa na rai nga ai. Madu Yesu Hkristu gawAdam ningnan rai nga ai hte shi madun ai lam gaw tinang hkum nan masha a matu ap nawng ai hte tsawra matsan dum lama ai myit rai nga ai. “Anhte ni gaw sumsing lamu hte seng ai Christian hpung masha ni tai wa sai majaw Madu Yesu Hkristu hpe kasi la na matu” San Pawlu hku nna anhte hpe saw da ai lam rai nga ai.
Anhte ni yawng gaw Adam dingsa a lam ni hpe kau da nna Madu Yesu Hkristu a lam hta hkawm sa wa ra ai. Dai lam ni gaw n-gaw nwai myit, mara dat ya ai hte tsawra matsan lama ai myit ni rai nga ai.
3. Madu Yesu jaw da ai tara hpe hkan sa ra ai. (Lk 6:27-38) “Nanhte a hpyen ni hpe tsaw ra mu; nanhte hpe n dawng n yawt ai ni hpe kaja ai hku galaw mu; nanhte hpe dagam ai ni hpe shaman ya mu; nanhte hpe aroi arip di ai ni a matu akyu hpyi mu” ngu ai tara gaw Madu Yesu Hkristu jaw da tara rai nga ai.
Shi a tara hpe madat hkan sa na matu pyi grai yak ai rai nga ai. Shi a tara hpe hkan sa na matu gaw grau pyi yak na rai nga ai. Raitimung, dai tara gaw Christian masha ni a matu akri namta (Essence) rai nga ai. Madu Yesu Hkristu gaw tinang a hpyen wa hpe hkam sharang na matu tsun da ai nre, tinang a hpyen wa hpe tsawra na matu tsun da ai rai nga ai. Hpyen hpe matai htang ai lam ni hpe koi gam na matu sha tsun da ai n rai nga ai.
Hpyen wa a matu akyu hpyi ya na lam she tsun da ai rai nga ai.Dai gaw anhte hpe Karai Kasang tsawra ai majaw rai ngaai. Anhte mara shut ai shaloi Karai Kasang gaw shi a tsawra ai myit hpe dawm kau ai Karai Kasang n rai ngaai. Shi a n-gaw nwai myit hpe anhte hpe madun dan ai zawn masha ni hpe mung madun na matu ra sharawng nga ai. Dai majaw Madu Yesu Hkristu gaw “Nanhte a Kawa matsan dum chye ai hte maren, nanhte mung matsan chye dum mu” ngu nna LK 6: 36 hta tsun da nga ai.
Tsawra matsan dum chye ai gaw Christin a kumla langai rai nga ai. Dai majaw kaja wa Christian langai hku nna asak hkrung hkawm sa na nga yang gaw Madu Yesu hpe kasi la let shi a tara hpe hkan sa rai asak hkrung hkawm sa ra ai rai nga ai.
Shani shagu na asak hkrung hkawm sa lam hta galaw ra ai lam ni gaw: (1) Mara dat ya ra ai. Matai htang mayu ai myit hpe rap di kaw nna, tinang hpe shut ai wa hpe mara dat ta ra ai. Tinang mara dat ya ai wa gaw n ging dan tim mara dat ya lu hkra Shakut ra ai.
(2) Akyu hpyi ya ra ai. Tinang hpe n tara ai hku galaw ai masha ni a matu akyu hpyi ya ra ai. Karai Kasang gaw shanhte hpe shaman Ya nna, shanhte a myit masin galai shai lu na matu akyu hpyi Shakut ya ra ai.
(3) Tinang lu ai hpe gam garan ya ra ai. Tinang a aten, hpaji machye machying hte tinang kaw nga ai ja gumhpraw, arung arai ni hpe sharawng awng ai hte (generously) gam jaw lu hkra shakut sa wa ga.
(4) Hpyen wa hpe tsawra ra ai. Tinang a hpyen hpe tsawra myit madun na matu, shanhte hpe tsawra namatu yak na re raitim Tsawra myit madun lu hkra shakut ra ai. Tinang a hpyen wa hpe tsawra ra ai wa gaw Madu Yesu hkang da ai Christian ni a tara hpe hkan sa ai rai nga ai.
Conclusion
Tsawra ai nu wa hpu nau e, tsawra lam hpyi shawn ai lam gaw grai yak na re, ratimung Christian ni a asak rai ngaai. Christian prat hpe grau hkum sup shagun ai rai nga ai.Anhte hpe shut ai masha ni hpe mara dat ai hte shanhte hpe tsawra myit madun ai lam gaw Karai Kasang a tsawra myit hpe madun dan ai lam rai nga ai.
Anhte ni daizawn magam bungli ni galaw sa wa ai shaloi kabu gara shiga a sakse ni tai wa ai. Masha ni hpe myit mada lam jaw ya lu ai. Ndai bat na laban hta Missa Hkungga hta atsawm shanglawm let Karai Kasang a tsawra matsan dum ai chyeju hpe hpyi la nga ga. Madu Yesu zawn hpyen wa hpe tsawra ai hte mara dat ya lu ai ningun atsam hpe lu la hkra ra nga ai shaman chyeju ni hpe anhte mung Madu kawhpyi la nga ga.
Hti ang ai Ja Chyum Mungga Ni –
Daw I –1Samuel 26:2,7-9,11-13,22-23;
Daw II – 1Cor 15: 45-49;
Kabu Gara Shiga – LK 6:27-38